متحدہ عرب امارات ( یو اے ای ) میں لاک ڈاؤن نہ لگانے کا فیصلہ کیا گیا ہے۔
یو اے ای کے وزیر مملکت برائے خارجہ تجارت ڈاکٹر تھانی الزیودی کا کہنا ہے کہ اومیکرون یا کورونا وائرس کی کسی بھی قسم کی وجہ سے ملک میں اب مکمل لاک ڈاؤن نہیں لگایا جائے گا۔
انہوں نے کہا کہ ڈیلٹا کے دوران بھی ہم نے ملک کو لاک ڈاؤن نہیں کیا تھا کیونکہ معیشت اور صحت کے شعبوں کے درمیان توازن قائم تھا جبکہ اومیکرون ڈیلٹا کے مقابلے میں بہت کم اثر انگیز ہے۔
وزیر مملکت نے مزید کہا کہ مستقبل میں بھی ہم کورونا وائرس کی وجہ سے لاک ڈاؤن کی جانب نہیں جائیں گے۔
یاد رہے کہ متحدہ عرب امارات نے 2020 کے اوائل میں عالمی وباء پھوٹنے کے بعد لاک ڈاؤن اور سفری پابندیوں کا اعلان کیا تھا۔ لیکن یہ پہلا ملک بھی تھا جس نے سخت حفاظتی اور احتیاطی تدابیر کو لاگو کرکے لاک ڈاؤن ختم کیا۔
ڈاکٹر تھانی الزیودی نے کہا کہ 2021 اہم اور حوصلہ افزا اور معیشت کے لیے مثبت تھا اور 2022 کا آغاز بھی بہت مضبوط پیشگوئی کے ساتھ ہوا ہے۔
انہوں نے مزید کہا کہ ہم نے 2021 میں اپنی گولڈن جوبلی منائی اور دنیا کو ایکسپو 2020 میں خوش آمدید کہا۔ ہم نے دنیا کو دکھایا کہ لاک ڈاؤن کے ساتھ نہیں رہا جاسکتا۔
وزیر مملکت کا کہنا تھا کہ ہمیں جلد از جلد کورونا کی صورتحال سے پہلے کے اصولوں پر واپس آنا ہوگا اور صحت اور معیشت کے درمیان توازن کو یقینی بنانا ہوگا۔
