اسلام آباد: (ویب ڈیسک) پاکستان پیپلزپارٹی کے چیئرمین بلاول بھٹو زرداری نے کہا ہے کہ پاکستان کے تمام مسائل کا حل جمہوریت اورمزید جمہوریت ہے۔
برطانوی نشریاتی ادارے سے گفتگو میں بلاول کا کہنا تھاکہ ہماری جماعت کی حالیہ جدوجہد کے مقاصد میں عدم اعتماد کو کامیاب بنانا تھا۔
انہوں نے کہا کہ ہمارے مقاصد میں انتخابی اصلاحات، پاکستان میں مستحکم جمہوریت کا قیام بھی شامل ہے جبکہ میری جدوجہد کا مقصد پاکستان میں جمہوری نظام کو مضبوط بنانا ہے۔
ان کا کہنا تھاکہ پچھلےتین سالوں میں آئین، جمہوری نظام، انسانی حقوق اور میڈیاکی آزادی کو نقصان پہنچایاگیا۔
پی پی چیئرمین کا کہنا تھاکہ پاکستان کے تمام مسائل کا حل جمہوریت، جمہوریت اور مزید جمہوریت ہے، جب تک سیاسی اور جمہوری آزادی حاصل نہ ہو معاشی ترقی کےاہداف حاصل نہیں ہوسکتے۔
انہوں نے کہا کہ ہمارا پہلا اقدام ماضی میں کیےگئے غلط کو صحیح کرنا ہے جس کیلئے طویل راستہ طے کرنا ہے۔
ان کا کہنا تھاکہ پیپلز پارٹی وزیراعظم کیلئے پیرکو شہباز شریف کی حمایت کرے گی۔
صحافی نے بلاول سے سوال کیا کہ کیا آپ پاکستان کے اگلے وزیرخارجہ بننے کی تصدیق کریں گے؟ اس پر ان کا کہنا تھاکہ میں پاکستان کے اگلے وزیرخارجہ بننے کی تصدیق نہیں کرسکتا۔

اسلام آباد: (ویب ڈیسک) قومی اسمبلی کے کل کے اجلاس کا ایجنڈا جاری کردیا گیا۔
قومی اسمبلی کا اجلاس کل دن 2 بجے ہوگا جس کا ایجنڈا جاری کردیا گیا ہے۔ ایجنڈے میں کہا گیا ہے کہ آئین کے مطابق ایوان کل وزیر اعظم کا انتخاب کرے گا۔
متحدہ اپوزیشن نے شہبازشریف اور تحریک انصاف نے شاہ محمود قریشی کو وزیراعظم کا امیدوار نامزد کیا ہے جبکہ دونوں کے کاغذات نامزدگی بھی منظور کرلیے گئے ہیں۔
عمران خان کے خلاف تحریک عدم اعتماد کامیاب ہونے کےبعد قومی اسمبلی کے نئے قائد ایوان کا انتخاب کل ہوگا۔

اسلام آباد: (ویب ڈیسک) پاکستان تحریک انصاف(پی ٹی آئی) کی جانب سے قومی اسمبلی سے مستعفی ہونے کے فیصلے پر اراکین میں اختلاف سامنے آگیا، بیشتر اراکین اسمبلی نے فیصلے کی مخالفت کرتے ہوئے استعفیٰ نہ دینے کی تجویز پیش کی ہے۔
ذرائع کے مطابق پی ٹی آئی اراکین قومی اسمبلی کی بڑی تعداد کا کہنا ہے کہ خالی میدان چھوڑنے کا مطلب ہے کہ قانون سازی میں حکومت کو مدد دینا، مضبوط اپوزیشن کی عدم موجودگی سے حکومت نیب قوانین میں ترامیم، الیکشن ریفارمز، اے وی ایم اور اوورسیز پاکستانیوں کے ووٹنگ کے معاملے پر با آسانی قانون سازی کرسکے گی۔
اراکین نے تجویز پیش کی کہ اسمبلیوں کے اندر رہتے ہوئے حکومت کو ٹف ٹائم دیا جانا چاہیے، ماضی میں 29 اراکین کے ساتھ عمران خان نے بھرپور مقابلہ کیا، اب ہم 140 سے اوپر کی تعداد میں ہیں بھرپور اپوزیشن کریں گے۔
قومی اسمبلی سے استعفی نہ دینے کا حتمی فیصلہ کل پارلیمنٹ ہاؤس میں پی ٹی آئی کی پارلیمانی میٹنگ میں کیا جائے گا۔
پاکستان تحریک انصاف (پی ٹی آئی) پارلیمانی پارٹی اجلاس کا شیڈول اور مقام تبدیل کردیا گیا جبکہ عمران خان پیر کو پارلیمنٹ ہاؤس جائیں گے۔
ذرائع کے مطابق عمران خان کی زیر صدارت پارلیمانی پارٹی کا آج ہونے والا اجلاس اب پیر دن 12 بجے پارلیمنٹ میں ہوگا۔
اراکین آج حلقوں میں عوامی احتجاج کے باعث اجلاس میں شریک نہیں ہوسکتے تھے۔
عمران خان کے زیر صدارت پاکستان تحریک انصاف (پی ٹی آئی) کی کور کمیٹی کا اجلاس ہوا، جس میں بطور اپوزیشن حکمت عملی پر مشاورت، پارلیمنٹ کے اندر اور باہر موثر کردار ادا کرنے کا فیصلہ کیا گیا جبکہ عوامی رابطہ مہم اور پرامن احتجاج سے متعلق بھی تبادلہ خیال کیا گیا۔
چیئرمین تحریک انصاف انصاف عمران خان کی زیر صدارت پارٹی کی کور کمیٹی کا اجلاس بنی گالہ میں ہوا جس میں کور کیمٹی ممبران، وزراء اعلی پنجاب، خیبر پختوانخوا، گورنر پنجاب اور سندھ شریک ہوئے۔
پی ٹی آئی کی بطور اپوزیشن پارٹی حکمت عملی طے کی گئی اور فیصلہ کیا گیا کہ پارلیمنٹ کے اندر اور باہر تحریک انصاف موثر اپوزیشن کا کردار ادا کرے گی، عوامی رابطہ مہم اور پر امن احتجاج سے متعلق بھی کور کمیٹی اجلاس میں مشاورت کی گئی اور یہ فیصلہ کیا گیا ہے 12 اپریل کو پشاور میں جلسہ عام کا انعقاد کیا جائے گا جس میں عمران خان خطاب کریں گے، عوامی رابطہ مہم کا آغاز کریں گے۔
اجلاس میں کور کمیٹی نے پارٹی کی تنظیم سازی جلد مکمل کرنے کا بھی فیصلہ کیا ہے اور ہدایت کی ہے آئندہ انتخابات میں ٹکٹوں کی تقسیم کے لئے پارلیمانی بورڈ کو متحرک کیا جائے۔

اسلام آباد:(ویب ڈیسک) پاکستان مسلم لیگ (ن) کی ترجمان مریم اورنگزیب نے پاکستان تحریک انصاف (پی ٹی آئی) کے رہنما فواد چوہدری کے بیان پر ردِ عمل دیتے ہوئے کہا ہے کہ پونے چار سال قوم کو مہنگائی، بے روزگاری اور معاشی تباہی کی سولی پرچڑھانے والا مایوس اور عوام کا مسترد کردہ آئین شکن ٹولہ دوبارہ کنٹینر پر چڑھ گیا ہے جہاں سے وہ اترا تھا۔
انہوں نے مزید کہا کہ اقتدار کی خاطر آئین، قانون، جمہوریت اور اخلاق کو کچلنے والے عوام کی تکالیف ختم ہونے دیں، ملک و قوم کو آپ نے جس حال میں پہنچایا ہے اسے ٹھیک کرنے دیں۔
مریم اورنگزیب نے کہا کہ شوق سے تحریک چلائیں، فی الحال تو ایوان نے آپ کو اٹھا کر باہر پھینکا ہے، عقل کریں اور اس پر سوچیں، عوام کو سکون کا سانس لینے دیں، اپنی بدزبانی، نفرت اور قوم کو مزید تقسیم کرنا بند کریں۔