کراچی: (ویب ڈیسک) رینجرز اور پولیس کی صدر کے علاقے میں مشترکہ کارروائی کے دوران دو سو سے زائد سٹریٹ کرائم کی وارداتوں میں ملوث گینگ کے تین کارندے گرفتار کرلیے گئے۔
رینجرز ترجمان کے مطابق پولیس اور رینجرز نے صدر میں خفیہ معلومات پر چھاپہ مار کارروائی کرتے ہوئے سٹریٹ کرائم کی وارداتوں میں ملوث تین ملزمان گرفتار کئے ، ترجمان رینجرز کا کہنا ہے کہ گرفتار ملزموں سے اسلحہ ، چھینی ہوئی موٹر سائیکل اور دیگر مسروقہ سامان برآمد کیا گیا۔
ملزموں کو سی سی ٹی وی فوٹیج کی مدد سے گرفتار کیا گیا، گرفتار ملزموں میں الطاف حسین ، شاہزیب اور مقصود نامی شامل ہے، ابتدائی تفتیش میں ملزموں نے 200 سے زاِئد وارداتیں کرنے کا اعتراف کیا ہے ، ملزمان کے جرائم کی تفصیلات حاصل کی جارہی ہیں۔

اسلام آباد: (ویب ڈیسک) پاکستان کے خلاف بی بی سی کی ایک اور پروپیگنڈہ خبر من گھڑت قرار دیدی گئی۔ بی بی سی کی 9، 10 اپریل کی درمیانی شب کے واقعات پر خبر آئی ایس پی آر نے بےبنیاد اور جھوٹ کا پلندہ قرار دیدی۔
آئی ایس پی آر کے مطابق بی بی سی اردو کی آج شائع ہونے والی خبر مکمل طور پر بےبنیاد اور جھوٹ کا پلندہ ہے، بی بی سی کی روایتی پروپیگنڈہ خبر میں کئی حقائق نظرانداز کئے گئے، خبر میں متعلقہ ضروری سورسز اور صحافتی اخلاقیات نظر انداز کی گئیں، خبر پاکستان کیخلاف جاری ڈس انفارمیشن کا حصہ ہے۔
آئی ایس پی آر کے مطابق پاکستانی حکام معاملہ بی بی سی کی انتظامیہ کے سامنے اٹھائیں گے، بی بی سی ماضی میں بھی حقائق کے برعکس خبریں دے چکا ہے، ماضی میں متعدد خبروں پر عالمی سطح پر بی بی سی کو ہزیمت کا سامنا کرنا پڑا ہے، برطانوی ٹیکس گزاروں کے پیسے سے چلنے والے بی بی سی کو بھاری جرمانے ادا کرنے پڑے، بی بی سی کی کئی خبریں بے بنیاد پروپیگنڈہ پر مبنی اور حقائق کے برعکس تھیں۔

پشاور: (ویب ڈیسک) خیبرپختونخوا کے گورنر شاہ فرمان نے مستعفی ہونے کا اعلان کر دیا۔
ذرائع کے مطابق گورنر شاہ فرمان کا کہنا تھا کہ شہباز شریف کے وزیراعظم کا اعتماد کا ووٹ لینے کے دن ہی استعفی بھجوا دوں گا۔
دوسری جانب گورنر پنجاب عمر سرفراز چیمہ کی جانب سے بھی استعفی دیئے جانے کا امکان ہے۔ تحریک انصاف کے قائد عمران خان کو وزارت عظمی سے ہٹائے جانے کے بعد گورنر پنجاب کے استعفے کا امکان ظاہر کیا گیا ہے۔
واضح رہے کہ گزشتہ روز قومی اسمبلی میں عمران خان کے خلاف عدم اعتماد کی قرارداد 174 ووٹوں سے کامیاب ہو گئی تھی جس کے بعد پی ٹی آئی کا اقتدار اختتام کو پہنچا۔ نئے وزیر اعظم کے انتخاب کے لیے ووٹنگ کل بروز پیر دن دوبجے ہو گی۔

بنوں: (ویب ڈیسک) سی ٹی ڈی کی ہوید کے علاقے میں کارروائی کے دوران 5 دہشتگرد مارے گئے، ملزمان کے قبضے سے اسلحہ کی بھاری مقدار برآمد ہوئی۔
سی ٹی ڈی بنوں کے مطابق تھانہ ہوید کے علاقہ زندی فلک شیر میں کارروائی کی گئی، دہشتگردوں کے قبضہ سے 3 عدد کلاشنکوف، 12عدد میگزینز،9 ایم ایم پستول اور بھاری مقدار میں کارتوس برآمد ہوئے جبکہ نقدی،موبائل فونز،ایک عدد آئی ای ڈی،70 موٹر سائیکلیں اور دیگر سامان بھی قبضے میں لیا گیا۔
ہلاک ہونے والے دہشت گرد ٹارگٹ کلنگ،بم دھماکوں اور سکیورٹی فورسززپر حملوں میں مطلوب تھے۔

لاہور: (ویب ڈیسک) مسلم لیگ ن کی نائب صدر مریم نواز نے کہا ہے کہ پاکستان کی تاریخ کا سیاہ ترین دور اپنے اختتام کو پہنچ گیا، تحریک عدم اعتماد کی کامیابی پر ہم اللہ تعالیٰ کے آگے سر جھکاتے ہیں۔
مریم نواز نے سماجی رابطوں کی ویب سائٹ ٹوئٹر پرلکھا کہ تحریک عدم اعتماد کی کامیابی کے بعد ہمیں مشکل چیلنجز درپیش ہیں، حکومت سے نجات پر ہم اللہ تعالیٰ کے آگے سر جھکاتے ہیں۔
انہوں نے کہا کہ نقصان کو پورا کرنے کیلئے ایک مشکل سفر کا آغاز کیا ہے، اللہ تعالی سے رہنمائی اور کامیابی کے لیے دعا کرتے ہیں۔

راجن پور: (ویب ڈیسک) راجن پور انڈس ہائی وے 74 پل کے قریب ٹرک اور رکشہ میں تصادم کے نتیجے میں 5 افراد جاں بحق اور ایک شدید زخمی ہو گیا۔
بتایا گیا ہے کہ المناک حادثہ تیز رفتار ٹرک کی سبزی فروش سواریوں کے رکشہ کو ٹکر کے سبب پش آیا ، ریسکیو 1122 نے جاں بحق افراد کی لاشیں اور زخمی کو تحصیل ہیڈکوارٹر ہسپتال روجھان میں منتقل کردیا۔ حادثہ میں جاں بحق ہونے والے افراد میں دو سگے بھائی بھی شامل ہیں۔
ٹرک ڈرائیور موقع سے فرار ہوگیا، مرنے والے افراد کا تعلق تحصیل روجھان کے مختلف علاقوں سے ہے۔

لاہور: (ویب ڈیسک) آرمی چیف جنرل قمر جاوید باجوہ ملک کے لیے ہر مشکل وقت میں مرد بحران ثابت ہوئے ہیں۔ امن کا زمانہ ہو یا جنگ کا ہمیشہ آگے بڑھ کر قائدانہ کردار ادا کیا۔ ان کےدور میں پاکستان نے کئی اہم سنگ میل عبور کیے ۔ موجود ہ سیاسی بحران میں بھی تمام نظریں ان کی جانب رہیں ۔ انہوں نے نہایت دانشمندی سے قوم کی کشتی کو پار لگایا۔ جس سے ملک ایک بڑے بحران سے بچ گیا۔
جنرل قمر جاوید باجوہ نے 29 نومبر 2016 کو پاک فوج کے 16ویں سربراہ کی ذمہ داری سنبھالی، جیسے جیسے وقت گزرتا گیا، دنیا باجوہ ڈاکٹرائن کی قائل ہوتی چلی گئی۔ بطور سپہ سالار قمر جاوید باجوہ نے امن کی مکمل بحالی کو مشن بنایا، ناقابل تسخیر ملکی دفاع کا بیڑہ بھی اٹھایا۔ چیلنج بہت بڑے تھے لیکن آرمی چیف نے انتہائی خندہ پیشانی سے قبول کئے، متاثر کن اقدامات سے اپنی الگ پہچان بنائی۔
جنرل باجوہ نے دہشتگردوں کا بیانیہ ناکام بنانے کیلئے موثر حکمت عملی اپنائی، آرمی چیف کی ہدایت پر ملک بھر میں دہشت گردی سے نمٹنے کیلئے حتمی آپریشن ردالفساد شروع کیاگیا۔ سپہ سالار کی قیادت میں نیشنل ایکشن پلان پر عمل درآمد اور ملک بھر میں خفیہ معلومات کی بنیاد پر آپریشنز سے دہشت گردی کے ہر قسم کے نیٹ ورک ختم کر دیئے گئے۔افغانستان سے متصل سرحد پر حفاظتی باڑ اورسرحدی قلعوں کی تعمیر سے دہشتگری کا خاتمہ ہوا، اس کے ساتھ ہی بحالی ترقیاتی منصوبوں کو بھی مکمل کیا گیا۔
آرمی چیف جنرل قمر جاوید باجوہ کا اپنے سپاہیوں کے ساتھ رویہ مشفقانہ رہا، بطور سپہ سالار وہ مسلسل کنٹرول لائن اور اگلے مورچوں کے دورے کرکے جوانوں کو اپنی موجودگی کا احساس دلاتے رہے ، مذہبی اور قومی تہوار ہو یا کوئی اور اہم موقع ، آرمی چیف عمومی طور پر جوانوں کے ساتھ اگلے مورچوں پر ہی نظر آئے۔
آرمی چیف جنرل قمر جاوید باجوہ کے دور میں فوجی سفارتکاری کا تصور سامنے آیا ، ان کے غیرملکی دورے اور پاکستان آئے غیرملکی وفود سے ملاقاتوں ، خصوصاً افغان طالبان اور امریکا میں مذاکرات میں کردار سمجھنے میں مدد ملی۔ انہوں نے سعودی عرب، قطر سمیت مختلف ممالک سے تعلقات مزید بہتر بنائے۔ ریاض اور تہران سمیت مختلف مسلم ممالک کے درمیان فوجی تعاون پیدا کرنے کیلئے موجود رکاوٹیں دور کرنے کی کوششیں بھی جاری رکھیں ۔
بحالی امن کے حوالے سے سپہ سالار کے وژن کو ملکی سطح پر تو سراہا ہی گیا دیگر اقوام بھی اس کی گرویدہ ہیں، امریکا کی جانب سے دہشت گردی کے خاتمے میں آرمی چیف کے کردار کو سراہا گیا۔ پینٹاگون میں آرمی چیف جنرل قمر جاوید باجوہ کو گارڈ آف آنر پیش کیا اور اکیس توپوں کی سلامی دی گئی
پاک فوج کے سربراہ نے جب چین کا دورہ کیا تو وہاں بھی انہیں گارڈ آف آنر دیا گیا، برطانیہ اور ایران بھی عالمی امن میں پاکستانی آرمی چیف کے کردار کے معترف ہیں۔
آرمی چیف جنرل قمر جاوید باجوہ کا بین الاقوامی برداری میں تشخص ایک مرد آہن کا رہا مگر اپنے سپاہیوں میں ان کا تاثر سخت گیر نہیں بلکہ مشفقانہ رہا۔ جب انہیں بطور آرمی چیف نامزدگی کی اطلاع دینے کیلئے وزیراعظم ہاؤس بلایا گیا تو وہاں استقبال کرنے والے جونیئر فوجی و سول افسروں سے بے تکلف ہوکر ملے۔
سلامتی کے ساتھ معاشی صورتحال بہتر بنانے کیلئے بھی آرمی چیف جنرل قمر جاوید باجوہ کی خدمات تاریخ کا حصہ ہیں۔ معاشی حالت کی بہتری کیلئے انہیں قومی ترقیاتی کونسل کا حصہ بنایا گیا۔ آرمی چیف جنرل قمر جاوید باجوہ نے حکومت کے معاشی ماہرین ، ملکی معروف کاروباری شخصیات اور تاجر برادری کی اہم شخصیات سے ملاقاتیں بھی کیں۔
آرمی چیف جنرل قمر جاوید باجوہ جہاں امن دشمنوں کیلئے قہر ثابت ہوئے وہیں ازلی دشمن بھارت کو جارحیت پر جواب کے حوالے سے بھی مرد آہن بن کر ابھرے۔ مقبوضہ کشمیر میں پلوامہ حملے کے بعد پاک بھارت کشیدگی کے دوران آرمی چیف جنرل قمر جاوید باجوہ کے کردار کو بین الاقوامی سطح پرسراہا گیا۔ بالا کوٹ پر بھارتی جارحیت کا منہ توڑ جواب دیکر انہوں نے انتہائی کشیدہ صورتحال میں فوج کا مورال بلند کیا، مقبوضہ وادی کی خصوصی حیثیت پر احتجاج اور کشمیریوں کی آواز بننے میں بھی سپہ سالار کا کردار اہم رہا۔
دشمن نے ہمیشہ امن پر وار کیا لیکن پاکستان نے ہمیشہ دوستی کا پیغام دیا جس کا بڑاثبوت کرتارپور راہداری ہے ، دوستی کا یہ راستہ کھولنے میں بھی جنرل قمر جاوید باجوہ کا کردار کسی تعارف کا محتاج نہیں۔ ان کی خصوصی دلچسپی کی وجہ سے منصوبے پر کام 10 ماہ کی مختصر ترین مدت میں مکمل ہوا۔
ایک ہزار 8 سو 54 علما کرام کی جانب سے دہشت گردی اور انتہا پسندی کے خلاف پیغام پاکستان کے نام سے فتویٰ بھی آرمی چیف جنرل قمر جاوید باجوہ کے دور میں جاری ہوا۔ فاٹا کا انضمام اور پرامن انتخابات کے انعقاد جیسے تاریخی اقدامات بھی سپہ سالار کے کریڈٹ پر ہیں۔
اس کے علاوہ ملک کو درپیش اندرونی خطرات ، آفات ، سیلاب ، ٹڈی دل ااور پولیو جیسے مسائل سے بھی نہایت مہارت کے ساتھ نمٹا گیا ۔ جنرل باجوہ کی قیادت میں پاک فوج نے کورونا کے خلاف این سی او سی جیسے بےمثال ادارے کی تشکیل میں اہم کردار ادا کیا۔ موذی وبا سے نمٹنے کے لیے این سی او سی کی خدمات کا اعتراف ورلڈ ہیلتھ آرگنائزیشن نے بھی کیا ۔
ملک میں جاری اعصاب شکن سیاسی بحران میں بھی نظریں آرمی چیف کی طرف رہیں، انہوں نے انتہائی دانشمندی اور بردباری سے صورتحال کو سنبھالا۔ جنر ل قمر جاوید باجوہ نے اپنی کوششوں سے قوم کی کشتی کو بھنور سے نکالا جس سے عوام نے سکھ کا سانس لیا ۔

پاک فوج کے شعبہ تعلقات عامہ ( آئی ایس پی آر) نے بی بی سی کی  خبر کو جعلی کہانی ، بے بنیاد اور جھوٹ کا پلندہ قرار دیتے ہوئے مسترد کر دیا۔

آئی ایس پی آر کی جانب سے  کہا گیا کہ بی بی سی اردو کی  گمراہ کن سٹوری بنیادی صحافتی اخلاقیات کی خلاف ورزی ہے،یہ ایک منظم ڈس انفارمیشن مہم کا حصہ لگتا ہے، معاملہ بی بی سی حکام کے ساتھ اٹھایا جا رہا ہے۔آئی ایس پی آر کے مطابق  بی بی سی کی پروپیگنڈہ کہانی میں کوئی معتبر، مستند اور متعلقہ ذرائع نہیں۔

یادرہے کہ بی بی سی نے ملک کی سیاسی صورتحال کے تناظر میں ایک اعلیٰ عہدیدار کی برطرفی اور پھر 2 اہم شخصیات کی ہیلی کاپٹر پر وزیراعظم ہائوس آمد کا دعویٰ کیا تھا۔

اسلام آباد: (ویب ڈیسک) قومی اسمبلی میں عمران خان کے خلاف تحریک عدم اعتماد کامیاب ہونے کے بعد نئے وزیر اعظم کے انتخاب کے لیے نامزدگی کے کاغذات آج دن دو بجے وصول کیے جائیں گے جبکہ ووٹنگ پیر دن دوبجے ہو گی۔
قومی اسمبلی سیکرٹریٹ کے مطابق وزیراعظم کے عہدے کے انتخاب کے لیے نامزدگی کے کاغذات آج اتوار کو دن دو بجے تک جمع کرائے جاسکتے ہیں جبکہ کاغذات کی جانچ پڑتال بھی آج ہی دن تین بجے ہو گی جس کے بعد امیدواروں کا اعلان کردیا جائے گا۔ وزیر اعظم کے عہدے پر الیکشن کل دن دو بجے ہو گا۔
قبل ازیں قومی اسمبلی کا اجلاس کل صبح گیارہ بجے طلب کیا گیا تھا جس میں وزیر اعظم کے عہدے کے لیے ووٹنگ ہونا تھی تاہم اب وقت تبدیل کردیا گیا ہے جس کے مطابق ووٹنگ پیر کو دن دوبجے ہو گی۔