اسلام آباد: (ویب ڈیسک) عمران خان وزیراعظم ہاؤس سے بنی گالہ روانہ ہوگئے ہیں، عمران خان کا ذاتی اسٹاف بھی وزیر اعظم ہاؤس سے روانہ ہوگیا ہے۔
عمران خان کے پرنسپل سیکرٹری اعظم خان بھی وزیر اعظم ہاؤس سے روانہ ہوگئے ہیں۔
ان کے علاوہ وہاں موجود شاہ محمود قریشی اور قاسم سوری سمیت وزیر اعظم کا ذاتی اسٹاف بھی وزیر اعظم ہاؤس سے روانہ ہوگیا، دیگر وفاقی وزراء کو بھی وزیراعظم ہاؤس کے عملے نے واپس بھجوا دیا ہے، فواد چوہدری، شبلی فراز اور شیریں مزاری کو بھی واپس بھجوایا گیا ہے۔
عمران خان نے روانگی سے پہلے وزیراعظم ہاؤس کےعملے سے ملاقات بھی کی۔

اسلام آباد: (ویب ڈیسک) اسلام آباد ہائی کورٹ نے مبینہ دھمکی آمیز خط کی تحقیقات اور وزیراعظم کا نام ایگزٹ کنٹرول لسٹ (ای سی ایل) میں ڈالنے کی درخواست سماعت کیلئے مقرر کردی گئی۔
اسلام آباد ہائی کورٹ کے چیف جسٹس اطہر من اللہ 11 اپریل کو سماعت کریں گے۔ درخواست شہری مولوی اقبال حیدر کی جانب سے دائر کی گئی تھی۔
درخواست میں استدعا کی گئی ہے کہ فواد چوہدری ، شاہ محمود قریشی، قاسم سوری اور اسد مجید کا نام بھی ای سی ایل میں ڈالنے کی استدعا کی گئی ہے۔
درخواست میں کہا کہ سیکرٹری داخلہ کو وزیراعظم اور وزراء کے خلاف مبینہ خط سے متعلق انکوائری کا حکم دیا جائے، درخواست پر فیصلہ ہونے تک وزیراعظم، وزراء اور اسد مجید نام ای سی ایل میں ڈالا جائے۔

اسلام آباد: (ویب ڈیسک) تحریک عدم اعتماد پر ووٹنگ کےلیے قومی اسمبلی کا اجلاس صبح ساڑھے 10 بجے شروع ہونے والے اجلاس کا اُس وقت ڈرامائی اختتام ہوا جب اسپیکر اسد قیصر نے وزیراعظم سے ملاقات کے بعد پانچویں بار اجلاس کی سربراہی کرتے ہوئے استعفیٰ دینے کا اعلان کیا اور ایوان کی باقی کارروائی ایاز صادق کے سپرد کی۔
قبل ازیں اسپیکر اسد قیصر کی زیر صدارت قومی اسمبلی کا اجلاس میں اپوزیشن کے 176 اور حکومت کے تقریبا 100 ارکان شریک ہوئے۔

اسلام آباد: (ویب ڈیسک) وزیر اطلاعات فواد چوہدری نے فوجی قیادت کی تبدیلی سے متعلق خبروں کو انتہائی لغو اور بے بنیاد قرار دے دیا ہے۔
تفصیلات کے مطابق سماجی رابطے کی ویب سائٹ ٹوئٹر پر جاری بیان میں فواد چوہدری نے کہا کہ حکومت کو آرمی چیف اور پاکستان کی افواج کی ادارہ جاتی تنظیم کا مکمل ادراک ہے۔
فواد چوہدری نے کہا کہ ایسی افواہیں کہ فوج کی قیادت میں تبدیلی کا سوچا بھی جا رہا ہے انتہائی لغو اور بے بنیاد ہیں اور ایک منصوبے کے تحت پھیلائی جا رہی ہیں حکومت ان افواہوں کی مذمت کرتی ہے اور مکمل تردید کرتی ہے۔

اسلام آباد: (ویب ڈیسک) اسپیکر قومی اسمبلی اسد قیصر اور ڈپٹی اسپیکر قاسم سوری مستعفی ہوگئے۔
قبل ازیں ذرائع کا کہنا تھا کہ اسپیکر قومی اسمبلی اسد قیصر استعفے پر غور کر رہے ہیں۔ آج اسپیکر قومی اسمبلی اسد قیصر سے ایک وفاقی وزیر کی تلخی ہوئی، تلخی کا واقعہ پارلیمنٹ میں موجود صدارتی چیمبر میں ہوا۔
ذرائع کے مطابق وفاقی وزیر نے اسپیکر اسد قیصر سے کہا کہ آپ عمران خان کی لائن لیں اپنی لائن نہ لیں۔
ذرائع کے مطابق اس پر اسپیکر اسد قیصر نے کہا کہ میں آئین پاکستان کی لائن لے رہا ہوں، تحریک انصاف میں شمولیت آئین پاکستان کے تحفط کیلئے کی تھی

اسلام آباد: (ویب ڈیسک) فیڈرل انوسٹیگیشن ایجنسی (ایف آئی اے) ہیڈ کوارٹر نے ملک بھر کے ایئر پورٹس پر ہائی الرٹ کر دیا ہے۔
ذرائع کے مطابق کوئی بھی سرکاری افسر حکومتی این او سی کے بغیر بیرون ملک نہیں جا سکتا، بغیر این او سی جانے والے سرکاری افسر کو آف لوڈ کرنے کی ہدایت جاری کر دی گئی۔

اسلام آباد: (ویب ڈیسک) اسلام آباد ہائی کورٹ میں عسکری کمان کی ممکنہ تبدیلی کے خلاف درخواست دائر کردی گئی ہے۔
اسلام آباد ہائی کورٹ میں دائر درخواست میں پوچھا گیا ہے کہ کیا وزیراعظم کے پاس آرمی چیف کو ٹھوس وجوہات کے بغیر ہٹانے کا اختیار ہے؟۔
درخواست گزار نے کہا کہ سپریم کورٹ نے اپنے فیصلے میں کہا کہ وزیراعظم کا کوئی بھی فیصلہ سپریم کورٹ کے فیصلے سے مشروط ہو گا، کیا وزیراعظم سیاسی مقاصد کیلئے آرمی چیف کو عہدے سے ہٹا سکتا ہے؟۔
ذرائع کے مطابق درخواست دائر ہونے کے بعد اسلام آباد ہائی کورٹ میں کچھ دیر بعد سماعت چیف جسٹس اطہر من اللہ کریں گے۔ قبل ازیں انہوں نے رات گئے عدالت اور کورٹ روم نمبر ون کھولنے کا حکم جاری کیا۔

اسلام آباد: (ویب ڈیسک) وزیراعظم عمران خان نے کہا ہے کہ کسی صورت ہار نہیں مانیں گے آخری بال تک لڑیں گے۔
ان خیالات کا اظہار وزیراعظم نے سینئر صحافیوں کے ساتھ ملاقات کے دوران کیا۔
ملاقات کے دوران وزیراعظم نے کہا کہ ملک دشمنوں کو کسی صورت کامیاب نہیں ہونے دیں گے، کسی صورت ہار نہیں مانیں گے آخری بال تک لڑیں گے۔ دھمکی آمیزمراسلہ چیف جسٹس کو بھی پیش کیاجائےگا۔ عالمی سازش کسی صورت کامیاب نہیں ہونے دیں گے۔

اسلام آباد: (ویب ڈیسک) سپیکر قومی اسمبلی اسد قیصر وزیراعظم عمران خان سے ملاقات کے لیے وزیراعظم ہاؤس پہنچ گئے۔
اسلام آباد میں وزیراعظم سے سپیکر اسد قیصر کی ملاقات میں دھمکی آمیز خط سے متعلق بات چیت کی گئی۔
ذرائع کے مطابق سپیکر قومی اسمبلی میں تحریک عدم اعتماد پر ووٹنگ کے معاملے پراپوزیشن کے دباؤ سے متعلق وزیراعظم کو آگاہ کیا۔
ذرائع کے مطابق اس سے قبل وزیراعظم عمران خان کی زیر صدارت کابینہ اجلاس میں دھمکی آمیز خط اداروں کے سربراہان کو دکھانے کا فیصلہ کیا گیا۔
اجلاس میں فیصلہ کیا گیا کہ خط سپیکر قومی اسمبلی اسد قیصر ، چیئرمین سینیٹ صادق سنجرانی اور چیئرمین جوائنٹ چیف آف اسٹاف کو دکھانے کا فیصلہ کیا ہے۔