لاہور: (ویب ڈیسک) ڈپٹی اسپیکر پنجاب اسمبلی دوست محمد مزاری کا کہنا ہے کہ وزیر اعلیٰ پنجاب کے انتخاب کیلئے اجلاس کی صدارت کروں گا، الیکشن شفاف اور قانون کے مطابق کراؤں گا۔
دوست محمد مزاری نے کہا کہ عدالت نے الیکشن کرانےکی جو ذمہ داری تفویض کی ہے اسے ایمانداری سے ادا کروں گا، جو زیادہ ووٹ لے کر منتخب ہوا وہی وزیراعلیٰ پنجاب ہوگا۔
ڈپٹی اسپیکر نے مزید کہا کہ دونوں جماعتوں سے درخواست کروں گا تمام عمل امن و امان کے ساتھ انجام دیاجائے، میرے لیے میرا عہد اور فرض اہم ہےجس سے عہدہ برا ہونےکی کوشش کروں گا، امید ہے وزیر اعلیٰ کا انتخاب امن و امان سے ہوگا۔
واضح رہے کہ وزیراعلیٰ پنجاب کا دوبارہ انتخاب کل پنجاب اسمبلی میں ہوگا۔ ن لیگ کی جانب سے حمزہ شہباز اور پی ٹی آئی اور ق لیگ کے متفقہ امیدوار پرویز الہیٰ ہیں۔

لاہور: (ویب ڈیسک) پاکستان پیپلز پارٹی کے شریک چیئرمین اور سابق صدر مملکت آصف علی زرداری نے کہا ہے کہ مفاہمت پر یقین رکھتا ہوں، خریدو فروخت کی سیاست پر نہیں، ملک اور پنجاب کی سیاسی صورتحال پر خود کو مفاہمت کیلئے پیش کیا، تین ماہ پہلے اعلان کیا تھا کہ یہاں بیٹھ کر سیاست کروں گا، ن لیگ کے ساتھ کھڑے ہیں، وزیر اعلیٰ پنجاب کا امیدوار حسن مرتضیٰ ہوتا تو میں پیسے ضرور لگاتا، حمزہ شہباز کے وزارت اعلیٰ کے امیدوار ہونے پر پیسہ کیوں لگاؤں؟۔
سابق صدر آصف علی زرداری سے پیپلز پارٹی کی پارلیمانی پارٹی کے ارکان نے پارلیمانی لیڈر حسن مرتضیٰ کی قیادت میں بلاول ہاؤس میں ملاقات کی، پارٹی کے ارکان نے آصف علی زرداری سے سے وزیر اعلیٰ پنجاب کے انتخابات کے حوالے سے تبادلہ خیال کیا۔
پارلیمانی پارٹی کے ارکان سے گفتگو کرتے ہوئے حمزہ شہباز کو بھرپور سپورٹ کرنے کا اعادہ کرتے ہوئے آصف علی زرداری نے کہا کہ مسلم لیگ ن کے ساتھ کھڑے ہیں، پیپلز پارٹی، مسلم لیگ ن کی اتحادی ہے اور تمام ذمہ داریوں کو قبول کرتی ہے، ذوالفقارعلی بھٹو کا کارکن ہوں، خرید و فروخت کی سیاست پر یقین نہیں رکھتا، وزیر اعلیٰ پنجاب کا امیدوار حسن مرتضیٰ ہوتا تو میں پیسے ضرور لگاتا، حمزہ شہباز کے وزارت اعلیٰ کے امیدوار ہونے پر میں پیسہ کیوں لگاؤں؟ ملک اور پنجاب کی سیاسی صورتحال پر مفاہمت کے لیے خود کو پیش کیا ہے۔
سابق صدر نے مزید کہا کہ مفاہمت کی سیاست پر یقین رکھتا ہوں اور یہ کرتا رہوں گا، میں پہلی دفعہ لاہور نہیں آیا، 3 ماہ پہلے اعلان کیا تھا کہ میں پنجاب میں بیٹھ کر سیاست کروں گا، ابھی تو میں نے پنجاب کی ہر تحصیل میں جانا ہے، پیسے کی سیاست کو یکسر مسترد کرتا ہوں، مسلم لیگ ن کے ساتھ ڈٹ کر کھڑے ہیں، حمزہ شہباز کو وزیر اعلیٰ پنجاب منتخب کروانے کے لیے اپنی پوری کوشش کریں گے، چودھری شجاعت حسین کے کہنے پر نواز شریف، شہباز شریف اور مریم نواز کو پرویز الٰہی کو وزیر اعلیٰ نامزد کرنے کے لئے آمادہ کیا۔
ان کا کہنا تھا کہ چودھری پرویز الٰہی میرے ساتھ کمٹمنٹ کر کے عمران خان سے جا ملے، مسلم لیگ ن نے پرویز الٰہی کو وزیر اعلیٰ بنانے کے حوالے سے اپنی کمٹمنٹ پوری کی، میں کمٹمنٹ پوری کرنے والوں کے ساتھ کھڑا ہوں۔

لاہور: (ویب ڈیسک) پاکستان تحریک انصاف نے دعویٰ کیا ہے کہ آج چیئرمین عمران خان کی سربراہی میں ہونے والے پی ٹی آئی اور ق لیگ پنجاب کے پارلیمانی پارٹی اجلاس میں 186 ارکان شریک ہوئے۔
اس حوالے سے فواد چوہدری نے کہا کہ ‏لاہور کے مقامی ہوٹل میں پی ٹی آئی اور ق لیگ پنجاب کی پارلیمانی پارٹی کا مشترکہ اجلاس ہوا جس میں 186 اراکین شریک ہوئے۔
شہباز گل نے بھی ٹوئٹ کی کہ ’اللہ کا شکر 186 ، اس وقت تمام ارکان کپتان کی تقریر سن رہے ہیں۔‘
واضح رہے کہ وزیراعلیٰ پنجاب کا دوبارہ انتخاب کل پنجاب اسمبلی میں ہوگا۔ ن لیگ کی جانب سے حمزہ شہباز اور پی ٹی آئی و ق لیگ کے متفقہ امیدوار پرویز الہیٰ ہیں۔

راولپنڈی: (ویب ڈیسک) آرمی چیف جنرل قمر جاوید باجوہ سے ترکیہ کے سفیر نے ملاقات کی، جس میں علاقائی سلامتی کی صورتحال اور پیشہ ورانہ امور پر تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ اور ترک سفیر کی ملاقات میں دونوں ممالک کے مابین دفاعی اور سکیورٹی تعاون پر بھی تبادلہ خیال کیا گیا۔
اس موقع پر آرمی چیف نے کہا کہ ہم ترکیہ کے ساتھ اپنے برادرانہ تعلقات کو انتہائی قدر کی نگاہ سے دیکھتے ہیں جن کی جڑیں تاریخ میں گہری ہیں اور ہماری ثقافتی اور مذہبی وابستگیوں میں جڑی ہوئی ہے۔
آئی ایس پی آر کے مطابق ترک سفیر نے علاقائی استحکام کے لیے پاکستان کے کردار کو سراہا اور پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا۔

لاہور: (ویب ڈیسک) پاکستان تحریک انصاف کے ہیڈ آف میڈیا افیئرز فواد چودھری نے کہا ہے کہ مولانا فضل الرحمان فوری طور پر کسی ماہر نفسیات سے مشورہ کریں۔
انہوں نے پی ڈی ایم کے سربراہ کو یہ مشورہ سماجی رابطے کی ویب سائٹ ’ٹوئٹر‘ پر جاری کردہ بیان میں دیا ہے۔
سابق وفاقی وزیر اطلاعات و نشریات فواد چودھری نے امیر جمعیت العلمائے اسلام (ف) مولانا فضل الرحمان سے کہا ہے کہ اعصابی تناؤ میں کمی کی دوا لیں۔
فواد چودھری نے اپنے ٹوئٹر بیان میں کہا ہے کہ ان کی آنکھوں سے پتہ چل رہا ہے کہ موصوف راتوں کو سو نہیں پا رہے ورنہ ہمیں ان کو جیل کے اسپتال شفٹ کرنا پڑے گا۔