اسلام آباد: (ویب ڈیسک) وفاقی وزیر داخلہ رانا ثنا اللہ نے دعویٰ کرتے اور عمران خان پر ارکان کی خریدو فروخت میں ملوث ہونے کا الزام لگاتے ہوئے کہا کہ تحریک انصاف (پی ٹی آئی) کے کچھ ارکان پرویز الہٰی کو ووٹ نہیں دیں گے، 2018 میں ووٹ چوری کرنے والے کس منہ سے الزام تراشی کررہے ہیں؟۔
پریس کانفرنس کرتے ہوئے رانا ثنا اللہ نے کہا کہ عمران خان خود خرید و فروخت میں مصروف ہیں، یہ رن آف الیکشن سپریم کورٹ کے تحت ہو رہا ہے، وفاقی کابینہ نے آفتاب سلطان کی بطور چیئرمین نیب تقرری کی منظوری دی ہے، آفتاب سلطان میرٹ پر کام کرنے والے انسان ہیں، آفتاب سلطان نیب میں ایک نئی تاریخ رقم کریں گے اور بہترین انداز میں احتساب کے عمل کو آگے بڑھائیں گے، آفتاب سلطان کا نام ہر حوالے سے معتبر ہے۔
انہوں نے مزید کہا کہ ضمنی الیکشن میں ہمارے امیدواروں پر عمران خان کی حکومت کا ملبہ تھا، مسلم لیگ کے ووٹرز نے بھی امیدواروں کو قبول نہیں کیا، ہم نے پورے خلوص کے ساتھ امیدواروں کی مدد کی، ووٹرز نے دل سے ان کا الیکشن نہیں لڑا، ضمنی الیکشن میں تحریک انصاف کی مقبولیت والے بیانیے کی بات درست نہیں، آئندہ لوٹوں کو ٹکٹ دینے کا فیصلہ پارلیمانی بورڈ کرے گا۔
وزیر داخلہ کا کہنا تھا کہ اگر کوئی مہنگائی کو بنیادی وجہ قرار دیتا ہے تو یہ ایک رائے ہوسکتی ہے، ملک کے ڈیفالٹ کا خطرہ دور ہوچکا ہے۔
رانا ثنا اللہ نے ڈالر کی بڑھتی قیمت کو سٹے بازی، غیر یقینی صورتحال کی وجہ قرار دیدیا اور کہا کہ ملک میں ڈیمانڈ اینڈ سپلائی کا کوئی مسئلہ نہیں، مفتاح اسماعیل نے کابینہ کو معاشی صورتحال کے حوالے سے بریف کیا۔

لاہور: (ویب ڈیسک) عوامی مسلم لیگ کے سربراہ اور سابق وفاقی وزیر داخلہ شیخ رشید نے 30 اگست سے پہلے انتخابی شیڈول جاری کرنے کا مطالبہ کرتے ہوئے کہا ہے کہ پرویز الہٰی ہی نئے وزیراعلیٰ پنجاب ہونگے، آصف زرداری نے دو بھائیوں کو لڑانے کی کوشش کی، ملکی معیشت ملکی سلامتی کا معاملہ بن چکی، آئی ایم ایف نے پیسے نہ دیئے تو ڈالر 245 روپے تک پہنچ جائے گا۔
پریس کانفرنس کرتے ہوئے شیخ رشید نے کہا کہ عقل کے اندھےعمران خان کے خلاف آرٹیکل 6 لگانے کی بات کرتے ہیں، حکومت کی تابوت میں آخری کیل رانا ثنا اللہ ٹھونکے گا، مفتاح اسماعیل جس ہنسی کیساتھ مفتا لگاتا ہے لعنت ہے، لاہوریوں نے تو اسحاق ڈار کی واپسی کی تاریخ دی ہوئی تھی۔
انہوں نے مزید کہا کہ آنیوالے وقت میں پاکستان وہاں پہنچ سکتا ہے جہاں چلانے کیلئے کوئی سیاسی جماعت نہ ہو، فضل الرحمان اپنی جیب سے مال نہیں لگاتے، زرداری نے نواز شریف کا مقابلہ کرنے کیلئے دولت اکٹھی کی تھی۔

لاہور: (ویب ڈیسک) پنجاب اسمبلی کے 19 نو منتخب ارکان نے حلف اٹھا لیا، تحریک انصاف کے 15، ن لیگ کے 3 اور ایک آزاد رکن شامل ہے جبکہ فیصل آباد سے منتخب ایم پی اے علی افضل ساہی نے بھی حلف لے لیا۔
پنجاب اسمبلی کے سپیکر چودھری پرویز الٰہی نے پی ٹی آئی کے 15 نو منتخب ارکان اسمبلی سے حلف لیا، حلف اٹھانے والوں میں فیصل آباد سے رکن صوبائی اسمبلی علی افضل ساہی، زین قریشی، حسن ملک، عرفان اللہ نیازی، میاں محمد اعظم، مہر محمد نواز بھروانہ، خرم شہزاد ورک، میاں اکرم عثمان شامل ہیں۔
شبیر احمد گجر، ملک ظہیر عباس کھوکھر، محمد غلام سرور، عامر اقبال شاہ، محمد معظم، قیصر عباس خان، سردار سیف الدین کھوسہ، آزاد رکن اسمبلی پیر رفیع الدین نے بھی حلف اٹھا لیا۔
حلف کے موقع پر مہمان گیلری میں شاہ محمود قریشی اور زین قریشی کی اہلیہ بھی موجود تھے۔

اسلام آباد: (ویب ڈیسک) وفاقی وزیر خزانہ مفتاح اسماعیل کا کہنا ہے کہ امپورٹس کو کم کرلیا گیا ہے، روپے پر دباؤ پچھلے مہینے ہوئی 7 ارب ڈالر سے زیادہ کی امپورٹ کی ادائیگیوں کا ہے۔
اسلام آباد میں پریس کانفرنس کرتے ہوئے وزیر خزانہ نے کہا کہ ملک میں دو مہینے کا ڈیزل اور فرنس آئل موجود ہے، اگلے دو ماہ ڈیزل اور فرنس آئل امپورٹ نہیں کریں گے، مارکیٹ میں ٹھہراؤ آرہا ہے۔
انہوں نے کہا کہ روپے کی گراوٹ میں قائم مقام گورنر کا کوئی ہاتھ نہیں، آئندہ ماہ روپے کی قدر بھی مستحکم ہوجائے گی، اگلے ہفتے گورنر اسٹیٹ بینک کو نامزد کردیں گے، اس مہینے کی درآمدات پچھلے مہینے سے کم ہیں ، بینکوں میں ڈالر کی طلب کم ہوجائے گی۔
مفتاح اسماعیل نے کہا کہ پچھلے مہینے 7.5 ارب ڈالر کی درآمدات ہوئی تھیں، ڈالر پر دباؤ سیاسی بحران کی وجہ سے بھی ہے، کوشش ہے درآمدات کو کم سے کم اور برآمدات کو بڑھائیں۔
انہوں نے دعویٰ کیا کہ معیشت درست سمت میں چل رہی ہے ، خواجہ آصف نے بھی کہا تھا ہم اپنا سیاسی کیپیٹل ملک کی خاطر قربان کردیں گے، نواز شریف نے بھی اس بات کی تائید کی تھی،کابینہ میں بھی کوئی مجھے نہیں کہتا کہ مفتاح نے ہمیں مروایا۔

اسلام آباد: (ویب ڈیسک) وفاقی وزیر خواجہ آصف نے کہا ہے کہ ضمنی الیکشن میں ہمارے بیانیے کو شکست نہیں ہوئی۔
وفاقی وزیر خواجہ آصف نے وزیر خزانہ مفتاح اسماعیل کے ہمراہ پریس کانفرنس کرتے ہوئے کہا کہ 17جولائی کے الیکشن کے بعد مختلف بیانات سامنے آرہے ہیں۔ پنجاب کی 20 سیٹوں میں سے ہم نے 5 سیٹیں حاصل کیں اور ضمنی الیکشن میں 2018 کے مقابلے میں ہم نے زیادہ ووٹ لیے ہیں۔ یہ سیٹیں پہلے ہی تحریک انصاف کے پاس تھیں۔
انہوں نے کہا کہ مریم نواز نے انتہائی زبردست انداز میں انتخابی مہم چلائی اور یہ واحد الیکشن ہے جس پر کوئی انگلی نہیں اٹھا سکتا۔ ہم نے کبھی نہیں کہا تھا کہ پرویز الہٰی ڈاکو ہے بلکہ عمران خان نے کہا تھا یہ پنجاب کا سب سے بڑا ڈاکو ہے اور عمران خان انہیں حکومت دے رہے ہیں۔
خواجہ آصف نے کہا کہ عمران خان ان پر اپنی 178 سیٹیں قربان کر رہے ہیں۔ ضمنی الیکشن میں ہمارے بیانیے کو کوئی شکست نہیں ہوئی اور ان الیکشنز میں مقامی سطح پر سیاسی وفاداریاں اور دھڑے ہوتے ہیں۔
انہوں نے کہا کہ 17 جولائی کے الیکشن میں ہم نے ووٹ کی حرمت کا پاس کیا اور پی ٹی آئی نے 4 سال میں مخالفین کے خلاف حکومتی اداروں کو استعمال کیا۔
چیئرمین نیب سے متعلق بات کرتے ہوئے انہوں نے کہا کہ کابینہ نے اچھی شہرت رکھنے والی شخصیت کو چیئرمین نیب بنایا ہے اور نئے چیئرمین نیب پر کوئی انگلی نہیں اٹھا سکتا۔
وفاقی وزیر نے کہا کہ ڈالر پچھلے 20 سال کی بلند ترین سطح پر ہے اور صرف ہماری کرنسی نہیں بلکہ ڈالر کی قدر بھی کم ہوئی۔ ڈالر کے مقابلے میں پاؤنڈ کو بھی مار پڑی ہے۔ صرف پاکستان کو یہ مسئلہ نہیں پوری دنیا اس کا سامنا کر رہی ہے۔
انہوں نے کہا کہ کوئی شک نہیں پاکستان کی کرنسی کی قدر میں کمی ضرور ہوئی ہے اور ہم نے جانتے ہوئے قصداً حکومت سنبھالی ہے جس کی ہم نے سیاسی قیمت چکائی ہے۔ سیاست بعد میں اور پاکستان کی معیشت کی بحالی پہلے ہے۔
خواجہ آصف نے کہا کہ ہم پر الزام لگایا گیا ہم خرید و فروخت کر رہے ہیں اور یہ پہلا الیکشن ہیں جہاں کوئی نہیں کہہ سکتا کہ دھاندلی ہوئی۔ ہم سیاسی مفادات پر ملک کو ترجیح دیتے ہیں اور فارن فنڈگ کا فیصلہ الیکشن کمیشن کرے گا۔

لاہور: (ویب ڈیسک) پاکستان تحریک انصاف کے ہیڈ آف میڈیا افیئرز فواد چودھری نے کہا ہے کہ ہمارے پاس وزیراعلی ٰکے انتخاب کے لیے عددی اکثریت ہے، امید کرتے ہیں کہ کل کا انتخاب پرامن ہوں گے۔
فواد چودھری نے میڈیا سے گفتگو کرتے ہوئے کہا کہ امید ہے وزیراعلی پنجاب کا انتخاب قانونی تقاضوں کے عین مطابق ہو گا۔
انہوں نے کہا کہ سیاسی جماعتوں نے ملکی مسائل پر اب مذاکرات شروع کرنے ہیں تاہم انہوں نے خبردار کرتے ہوئے کہا کہ قومی اسمبلی نہ تحلیل ہوئی اور اسمبلیوں نے کام کیا تو انتشار پیدا ہو گا۔
فواد چودھری نے دعویٰ کیا کہ شریف خاندان میں دو کیمپ واضح ہو چکے ہیں، شہباز شریف کیمپ نہیں چاہتا کہ عام انتخابات جلد ہوں۔

لاہور: (ویب ڈیسک) پنجاب اسمبلی سیکرٹریٹ نے کل ہونے والے وزیراعلیٰ پنجاب کے انتخاب کے لیے ضابطہ اخلاق جاری کر دیا۔
ضابطہ اخلاق کے تحت ارکان اور اسٹاف کے مہمانوں کے داخلے پرپابندی عائد کردی گئی ہے، میڈیا پریس گیلری کے ذریعے الیکشن کی کوریج کرےگا۔
ایوان میں موبائل فون لے جانے پر پابندی ہوگی، ارکان کو ہدایت کی گئی ہےکہ اسمبلی کی طرف سےجاری کردہ شناختی کارڈ ساتھ رکھیں، ارکان کا اسمبلی سیکرٹریٹ میں داخلہ ڈیوٹی فری شاپ کی طرف موجود گیٹ سے ہوگا۔
سیکرٹری اسمبلی محمد خان بھٹی کا کہنا ہےکہ پولیس اسمبلی سیکرٹریٹ کی چار دیواری کے باہر انتظامی معاملات کنٹرول کرے گی۔