پاکستان مسلم لیگ ن کے رہنما احسن اقبال نے کہا ہے کہ عمران نیازی اپوزیشن کیساتھ میچ شروع کرنے سے مسلسل فرار اختیار کر رہا ہے۔عدم اعتماد کے باؤنسر کے خوف سے اس کی مسلسل کانپیں ٹانگ رہی ہیں۔
اپنے ایک ٹوئٹ میں احسن اقبال کا کہنا تھا کہ عمران نیازی ہمارے نوجوانوں کے لئے کیا مثال قائم کر رہے ہیں؟میچ ہار جاؤ تو کیا کرو؟وکٹ پہ لیٹ جاؤ، ایڑیاں رگڑو،میدان خراب کرو مگر قانون نہ مانو اور خوب بے عزت ہو۔انہوں نے کہا کہ شاہ محمود قریشی اور اسد عمر کی تقریروں سے ظاہر ہوا کہ دونوں میں زبردست مقابلہ جاری ہے کہ پی ٹی آئی کا نیا قائد کون ہو گا؟اسد عمر کمربستہ نظر آتے ہیں کہ ان پر بھی توہین عدالت کا مقدمہ قائم ہو۔ یہ سپریم کورٹ کے فیصلے پر تنقید کر رہے ہیں۔

وفاقی وزیر اطلاعات و نشریات فواد چوہدری کا کہنا ہے کہ سپریم کورٹ پارلیمنٹ سے بالا تر نہیں ہے، ملک میں مارشل لا لگا تو ذمہ دار وہ لوگ ہوں گےجنہوں نے ضمیر خریدے۔
صحافیوں سے غیر رسمی گفتگو کرتے ہوئے فواد چوہدری نے کہا کہ ابھی بہت سی تقاریر باقی ہیں، ابھی 20، 20 اوور کا میچ ہونا ہے، کپتان نظر نہیں آتا لیکن وہ پچ پر ہی ہوتا ہے۔ ایک صحافی نے سوال کیا کہ وفاقی کابینہ کا اجلاس کیوں بلایا گیا ہے؟ اس پر انہوں نے کہا کہ ابھی ایوان سے نکلا ہوں، دیکھتے ہیں۔
ایک اور صحافی نے پوچھا کہ اگر ملک میں مارشل لا لگاتو ذمہ دار کون ہوگا؟ اس پر فواد چوہدری کا کہنا تھا کہ جنہوں نے لوگ اور ضمیر خریدے وہ ذمہ دار ہوں گے، پوری اپوزیشن آئین شکن ہے، سپریم کورٹ پارلیمنٹ سے بالا تر نہیں ہے، اگر ہم آج یہ اصول مان لیں تو جمہوریت ختم ہوجائے گی۔

مسلم لیگ ن کی صدر مریم نواز کا کہنا ہے کہ22کروڑ عوام کاملک ہفتے سے حکومت کے بغیر ہے۔ آئین کی خلاف ورزی اور سپریم کورٹ کے احکامات کو نظر انداز کرنے کا انجام برا ہوگا۔
مسلم لیگ ن کی نائب صدر مریم نواز نے قومی اسمبلی میں تحریک عدم اعتماد پر ووٹنگ پر تاخیر پر ردعمل دیتے ہوئے کہا ہے کہ ایک ایسےشخص کو جو اپنے ہوش و حواس میں نہیں ہے پورے ملک کو منجمد کرنے کی اجازت نہیں دی جا سکتی۔ انہوں نے سوشل میڈیا پلیٹ فارم ٹوئٹر پر ایک پیغام میں کہا ہے کہ یہ کوئی مذاق نہیں ہے ۔ ایسے شخص کو وزیر اعظم یا سابق وزیر اعظم کے طور پر نہیں بلکہ جنونی شخص کے طور پر برتاو کرنا چاہیے جس نے اپنے آپ کو بچانے کے لیے پورے ملک کو یرغمال بنایاہوا ہے۔

مارننگ شو سے شہرت کی بلندی پر پہنچنے والی اداکارہ شائستہ لودھی نے غلافِ کعبہ کی تیاری میں حصہ لینے کی سعادت حاصل کرلی۔
شائستہ لودھی کی ایک نئی ویڈیو سوشل میڈیا پر وائرل ہو رہی ہے جس میں دیکھا جاسکتا ہے کہ وہ اپنے ان جذبات کا اظہار کررہی ہیں جو انہوں نے غلافِ کعبہ تیار کرتے ہوئے محسوس کیے۔
اس ویڈیو میں دیکھا جا سکتا ہے کہ شائستہ لودھی سعودی عرب کی اس فیکٹری میں موجود ہیں جہاں غلافِ کعبہ تیار کیا جاتا ہے اور وہ سعودی ملازمین کی مدد سے غلافِ کعبہ کی سِلائی کررہی ہیں۔
معروف میزبان کی ویڈیو کو سوشل میڈیا پلیٹ فارمز کے کئی پیچز پر شئیر کیا جارہا ہے جس پر سوشل میڈیا صارفین شائستہ لودھی کو یہ سعادت حاصل کرنے پر مبارکباد دے رہے ہیں۔
حال ہی میں بھارت کی سابقہ بھارتی اداکارہ ثنا خان نے بھی غلافِ کعبہ کی تیاری میں حصہ لیا تھا اور اسے سینے کی سعادت حاصل کی تھی جس کی ویڈیو سوشل میڈیا پر ان کے مداحوں کی توجہ کا مرکز بنی ہوئی تھی۔

مسلم لیگ ق کے سربراہ چوہدری شجاعت حسین کا کہنا ہے کہ پاکستان کے سیاسی حالات ایسے بنائے جا رہے ہیں جیسے ملک میں آئین ہی نہیں ہے، وزیر اعظم عمران خان محب وطن ہیں، انہوں نے آئین و قانون کی پاسداری کا علم اٹھا رکھا ہے۔
اپنے ایک بیان مین چوہدری شجاعت حسین نے کہا کہ پوری سیاسی قیادت کی ذمہ داری بنتی ہے کہ اس ہارس ٹریڈنگ کو ختم کرے ورنہ رجحان اتنا بڑھ جائے گا کہ الیکشن اصلاحات دھری کی دھری رہ جائیں گی، الیکشن کمیشن بھی اس حوالے سے اقدامات کرے اور شاید عدالت کو بھی ذمہ داری ادا کرنی پڑے۔ لوٹا کریسی روکنے کے لیے اقدامات کیے جائیں۔
انہوں نے کہا کہ وزیر اعظم نے اپنی تقریر میں ہارس ٹریڈنگ کا بھی ذکر کیا، عمران خان آرٹیکل 63 اے پر بالکل درست موقف رکھتے ہیں، روپے کے لین دین کی جو روش شروع ہوچکی ہے یہ سب سے زیادہ خطرناک ہے، شروع میں ہزاروں لاکھوں کی، پھر کروڑوں اور اب اربوں کی بات سنتے ہیں، خریدے ہوئے لوگ کس منہ سے ملک کی خدمت کرسکتے ہیں۔