کراچی : (ویب ڈیسک) ایشیائی ترقیاتی بینک نے آؤٹ لک جاری کردیا جس کے مطابق گزشتہ 6 ماہ میں پاکستان میں مہنگائی 12 سے بڑھ کر 21 فیصد ہوگئی۔
ایشیائی ترقیاتی بینک نے جنوری تا جون کے معاشی اعداد و شمار جاری کرتے ہوئے کہا کہ مہنگائی اور عالمی معاشی حالات ایشیاء کو متاثر کرسکتے ہیں۔
رپورٹ کے مطابق گزشتہ 6 ماہ میں پاکستان میں مہنگائی 12 سے بڑھ کر 21 فیصد ہوگئی جب کہ سری لنکا میں مہنگائی 14 سے بڑھ کر 45 فیصد اور بھارت میں 5.7 سے بڑھ کر 7 فیصد ہوگئی۔
رپورٹ میں بتایا گیا ہےکہ بنگلا دیش میں مہنگائی 6.1 سے بڑھ کر 7.4، چین میں 1.5 سے بڑھ 2.5 فیصد جب کہ تھائی لینڈ میں 2.2 سے بڑھ کر 7.7 فیصد ہوگئی۔
رپورٹ میں مزید کہا گیا ہےکہ پاکستان میں گزشتہ 6 ماہ میں شرح منافع 5.25 فیصد بڑھا جب کہ سری لنکا میں 9.5، بھارت 0.9 اور بنگلا دیش میں 0.7 فیصد بڑھا۔

اسلام آباد: (ویب ڈیسک) سابق وزیر داخلہ شیخ رشید کا کہنا ہے کہ معیشت قومی سلامتی کی حیثیت اختیار کررہی ہے، فتنہ آصف زرداری نے 2 بھائیوں میں بھی لڑائی کردی، آصف زرداری اراکین کے خرید وفروخت کے ماہر ہیں لیکن الیکشن کے علاوہ ملکی مسائل کا کوئی حل نہیں ہے۔
پریس کانفرنس میں سابق وزیرداخلہ نے کہا کہ راناثنااللہ کی ذہنی حالت ٹھیک نہیں ہے، یہ لوگ عمران خان کے خلاف آرٹیکل 6 لگانا چاہتےہیں، عقل کے اندھے عمران خان کیخلاف آرٹیکل 6لگانےکی بات کرتےہیں، کہا تھا ن سے ش نکلے گی ، میرا مذاق بنایا جارہا تھا، کدھر ہیں نوازشریف اور کہاں ہیں اسحاق ڈار؟
مفتاح اسماعیل ہنس ہنس کر قیمیتں بڑھا رہے ہیں ، یہ لوگ بدترین سیاست کررہے ہیں، لاہورنےعمران خان کےامیدواروں کوجتوایا ہے اور کل پرویزالہٰی پنجاب کےوزیراعلیٰ ہوں گے اور حکومت کےتابوت میں آخری کیل راناثنااللہ ٹھونکیں گے۔
عوامی مسلم لیگ کے سربراہ نے کہا کہ اوورسیز پاکستانی کے ووٹ کے لیے سپریم کورٹ میں رٹ دائر کی ، امید ہے کہ اوور سیز پاکستانیوں کے ووٹ کا حق سپریم کورٹ دے گی، سپریم کورٹ سے مایوسی سے کہہ رہا ہوں ملکی حالات پر ازخودنوٹس لیں ، امپورٹڈ حکومت کے دن گنے جاچکے ہیں، 14پارٹیاں گندے انڈے ہیں۔
سعودی عرب جیسے ملک نے بھی امریکہ کو جھنڈی کرا دی ہے، الیکشن نہیں کرائیں گے تو حالات خراب ہو جائیں گے، 30 اگست سےپہلےعام انتخابات کااعلان ہوجاناچاہیے، ہم پر اتنےکیسز ہو گئےکہ شایداب ہمیں ضمانت نہ ملے، اگرکسی نےکل اسمبلی میں ہنگامہ کیاتوپھردیکھیں گے، اراکین کی ذمہ داری ہےکل اپنی جماعت کیساتھ کھڑےہوں، پاکستان اس نہج پر پہنچ سکتا ہے جسکو چلانے کے لیے کوئی پارٹی تیار نہیں ہو گی،
پرویز الہٰی نے کہا عمران خان کہے گا اسمبلی توڑ دو میں آدھے گھنٹے میں توڑ دوں گا، مولانافضل الرحمان کبھی اپنی جیب سے پیسے نہیں لگاتے، آصف زرداری لوگوں کو دانا ڈالتے ہیں ، عسکری قیادت کی مدت ملازمت میں توسیع کے معاملات میں عمران خان کو دلچسپی نہیں۔

اسلام آباد: (ویب ڈیسک) چودھری پرویز الہی اور شاہ محمود قریشی کے ملاقات میں اتفاق کیا گیا ہے کہ پنجاب اسمبلی میں عوامی مینڈنٹ کو نقب لگانے کی کوئی کوشش برداشت نہیں کی جائے گی۔
وزارت اعلیٰ پنجاب کے لیے جوڑ توڑ کا سلسلہ عروج پر ہے۔ پنجاب میں سیاسی ملاقاتوں اوررابطوں کا سلسلہ بھی جاری ہے۔تحریک انصاف کے وائس چیئرمین شاہ محمود قریشی نےاسپیکر پنجاب اسمبلی چوہدری پرویزالہی سے ملاقات کی۔
چوہدری پرویز الہیٰ نے کہا ہے کہ عوامی مینڈنٹ کو نقب لگانے کی کوئی کوشش برداشت نہیں کی جائے گی۔ ضمنی انتخاب میں عوام نے عمران خان پر اعتماد کیا۔پنجاب اسمبلی کاایوان بھی وزیراعلی کے لئے عمران خان پر اعتماد کرے گا۔
ان کا کہنا ہے کہ ارکان پنجاب اسمبلی کی اکثریت ہمارے ساتھ ہے۔وفاق اورپنجاب حکومت کے انتظامی ہتھکنڈے قابل مذمت ہیں۔مختصر عرصے میں شہبازشریف کے زیرسایہ حمزہ شہباز نے جو کچھ کیا تاریخ میں سیاہ حروف سے لکھاجائے گا۔
ملاقات میں شاہ محمود قریشی کا کہنا تھا کہ پنجاب میں انشا اللہ پی ٹی آئی کے نامزد امیدوار چوہدری پرویزالہی وزیراعلی ہوں گے ۔پنجاب اسمبلی میں پی ٹی آئی ،مسلم لیگ ق اکثریت حاصل کرچکی ہے۔
انہوں نے کہاہے کہ ضمنی انتخاب میں عوام نے منحرف ارکان کو نشان عبرت بنادیا۔عمران خان کے بیانیہ کی قوم نے مکمل پذیرائی کی.
ملاقات میں مونس الہیٰ، حسین الہیٰ، راجہ بشارت اور زین قریشی بھی شریک ہوئے۔ملاقات میں وزیر اعلیٰ پنجاب کے الیکشن ڈے کی حکمت عملی پرمشاورت کی گئی۔ حکومت کے انتظامی ہتھکنڈوں کا بھی جائزہ لیاگیا۔

اسلام آباد: (ویب ڈیسک) حکومت نے سابق ڈی جی انٹیلی جنس بیورو آفتاب سلطان کو چیئرمین نیب تعینات کرنے کی منظوری دے دی۔
تفصیلات کے مطابق وزیراعظم شہباز شریف کی زیرصدارت وفاقی کابینہ کا اجلاس ہوا جس میں مختلف امور پر غور کیا گیا۔ کابینہ نے سابق ڈی جی آئی بی آفتاب سلطان کی بحیثیت چئیرمین نیب تعیناتی کیلئے کابینہ نے منظوری دے دی۔
واضح رہے کہ آفتاب سلطان کی شہرت ایک دیانتدار افسر کے طور پر ہے۔ ان کا نام پیپلز پارٹی نے تجویز کیا تھا۔ آفتاب سلطان آئی جی پنجاب تعینات ، نیشنل پولیس اکیڈمی کے کمانڈنٹ بھی رہ چکے ہیں۔
آفتاب سلطان کے والد اور ساس دو دو مرتبہ رکن قومی اسمبلی رہ چکے ہیں۔ آفتاب سلطان کا تعلق فیصل آباد سے ہے۔ انہوں نے پولیس میں اپنے کیریئر کاآغاز 1977ءمیں بطور اے ایس پی پنجاب پولیس کیا تھا۔

اسلام آباد: (ویب ڈیسک) پی ٹی آئی کے سیکرٹری جنرل اسد عمر نے سندھ میں بلدیاتی الیکشن کے التوا پر رد عمل دیتے ہوئے کہا ہے کہ کراچی، حیدرآباد ڈویژن میں بلدیاتی انتخاب صرف 3 دن پہلے ملتوی کردیئے گئے، الیکشن ملتوی کرنے کی وجہ بارش بتائی گئی، یہ ایک مضحکہ خیز بات ہے، الیکشن کمیشن کا نیا فیصلہ سن کر حیرانی ہوئی۔
پی ٹی آئی کے سوشل میڈیا اکاؤنٹ پر اسد عمر کا ویڈیو بیان جاری کیا گیا ہے جس میں انہوں نے بلدیاتی الیکشن کے التوا پر الیکشن کمیشن کو تنقید کا نشانہ بنایا۔
ویڈیو پیغام میں اسد عمر نے کہا کہ عوام بھی الیکشن کمیشن کا نیا فیصلہ سن کر یقیناً حیران ہوگئے ہوں گے، کراچی اور حیدرآباد کے بلدیاتی الیکشن کو ووٹنگ سے 3 دن قبل ملتوی کردیا گیا اور وجہ یہ بتائی گئی ہے کہ بارش ہوگی، مجھے یقین ہے کہ آپ کو بھی اس مضحکہ خیز فیصلے پر اعتبار نہیں آسکتا؟
انہوں نے کہا کہ الیکشن کمیشن کس طرح مکمل طور پر جانبدار ہوچکا ہے اور کوئی پاکستانی یقین نہیں کرسکتا کہ اس الیکشن کمیشن کے ہوتے ہوئے صاف شفاف اور غیر جانبدارانہ الیکشن کمیشن کروائے جاسکیں۔
اسد عمر کا کہنا تھا کہ پی ڈی ایم کی جماعتیں بھاگی بھاگی گئی تھیں کہ ہمیں بچاؤ کیوں کہ وہ دیکھ چکی تھیں کہ جس طرح سے 17 جولائی کو پنجاب میں بلا چلا اس خوف سے یہ بھاگے لیکن اب یہ بچ نہیں سکتے کیوں کہ قوم نے فیصلہ کرلیا ہے کہ قوم نے اپنی اپنی حقیقی آزادی لے کر رہنی ہے۔