راولپنڈی : (ویب ڈیسک) الیکشن کمیشن نے پی پی 7 راولپنڈی کے ضمنی الیکشن کے ووٹوں کی دوبارہ گنتی کی پی ٹی آئی کی درخواست مسترد کردی۔
الیکشن کمیشن نےپی پی 7 راولپنڈی میں دوبارہ گنتی کی درخواست پر محفوظ فیصلہ سنادیا۔الیکشن کمیشن نے تحریک انصاف کے امیدوار شبیر اعوان کی دوبارہ گنتی کی درخواست مسترد کردی۔
چیف الیکشن کمشنر کی جانب سے فیصلے میں کہا گیا ہے کہ درخواست گزار دوبارہ گنتی کے لئے خاطر خواہ ثبوت فراہم نہیں کر سکا۔
پی ٹی آئی امیدوار نے الیکشن کمیشن سے 21 پولنگ سٹیشن پر دوبارہ گنتی استدعا کی تھی۔
واضح رہے کہ پی ٹی آئی امیدوار نے ریٹرنگ آفیسر کی جانب سے دوبارہ گنتی کی درخواست کو مسترد کئے جانے پر ہائیکورٹ سے رجوع کیا تھا۔ہائیکورٹ راولپنڈی بینچ نے پی ٹی آئی امیدوار کو الیکشن کمیشن سے رجوع کرنے کا حکم دیا تھا۔

لاہور : (ویب ڈیسک) لاہور میں بارش کا 20 سالہ ریکارڈ ٹوٹ گیا.
لاہور میں گزشتہ 9 گھنٹے سے مسلسل بارش کا سلسلہ جاری ہے۔ جہاں مسلسل برستے بادلوں نے جل تھل ایک کردیا ہے وہیں شہر میں بارش کا 20 سالہ ریکارڈ بھی ٹوٹ گیاہے۔
ترجمان واسا لاہور کے مطابق لاہور میں7 گھنٹے میں 238 ملی میٹر بارش ریکارڈ کی گئی۔ جو کم دورانیہ میں زیادہ بارش کا ایک ریکارڈ ہے۔
اس سے قبل 2018 میں 14 گھنٹوں میں 288 ملی میٹر اور 2019 میں 250 ملی میٹر 10 گھنٹے میں ریکارڈ کی گئی۔
شہر میں اب تک سب سے زیادہ تاجپورہ میں 234 ملی میٹر بارش ریکارڈ کی گئی۔ائیرپورٹ ایریا میں 188 ملی میٹر بارش ہوچکی ہے۔
مغل پورہ کے علاقے میں 171، چوک ناخدا میں 159، پانی والا تالاب کے علاقے میں 158 ملی میٹر بارش ریکارڈ کی گئی۔لکشمی چوک میں 141، گلشن راوی کے علاقہ میں 128، فرخ آباد میں 119 ملی میٹر بارش ہوئی۔
ایم ڈی واسا محمد غفران کا کہنا ہے کہ اتنی زیادہ بارش کے باوجود بیشتر علاقے کلیئر کردیے ہیں۔ تمام ڈسپوزل اسٹیشن فعال ہیں،جنریٹر بھی استعمال کر رہے ہیں۔
انہوں نے بتایا کہ جبکہ لکشمی چوک،کوپر روڈ، دو موریہ، ایک موریہ، فردوس مارکیٹ،جی پی او کلیئر کردیے ہیں۔ نابھہ روڈ،بھاٹی گیٹ،جناح اسپتال،ٹکا چوک بھی کلیئر کر دیا گیا ہے۔

اسلام آباد: (ویب ڈیسک) سپریم کورٹ نے رانا ثنا اللہ توہین عدالت کیس میں ٹھوس شواہد فراہم کرنے کا حکم دے دیا۔
سپریم کورٹ میں وزیر داخلہ رانا ثنا اللہ توہین عدالت کیس کی سماعت ہوئی اور پاکستان تحریک انصاف (پی ٹی آئی) کے وکیل نے رانا ثنا اللہ کے بیان کے ٹرانسکرپٹ جمع کرا دئیے۔
پی ٹی آئی کے وکیل فیصل چودھری نے کہا کہ رانا ثنا اللہ نے ہمارے بندے ادھر ادھر کرنے کا بیان دیا اور ہمارے رکن صوبائی اسمبلی مسعود مجید کو 40 کروڑ روپے میں خرید کر ترکی اسمگل کر دیا گیا۔
انہوں نے کہا کہ ن لیگی رہنما راحیلہ نے ہمارے 3 اراکین صوبائی اسمبلی سے رابطہ کیا اور عطا تارڑ نے ہمارے 3 اراکین صوبائی اسمبلی کو 25 کروڑ روپے کی آفر کی۔
جسٹس منیب اختر نے کہا کہ آپ کے اراکین صوبائی اسمبلی کے ساتھ راحیلہ کی بات کس تاریخ کو ہوئی؟ اور اصل بیان حلفی کدھر ہے؟
وکیل فیصل چودھری نے مؤقف اختیار کیا کہ اصل بیان حلفی لاہور میں ہیں۔
جسٹس منیب اختر نے کہا کہ معذرت کے ساتھ ،اس کا مطلب ہے آپ کو بھی علم نہیں۔ تینوں بیان حلفی پر عبارت ایک جیسی ہے، ہمارے یکم جولائی کے حکم کی کیا خلاف ورزی ہوئی؟ عطا تارڑ اور راحیلہ کے خلاف آپ کی توہین عدالت کی درخواست نہیں۔
فیصل چودھری نے مؤقف اختیار کیا کہ عدالت راحیلہ اور عطا تارڑ کے خلاف سوموٹو لیں۔
جسٹس منیب اختر نے درخواست گزار کے وکیل سے مکالمہ کرتے ہوئے کہا کہ سوموٹو لینا چیف جسٹس کا اختیار ہے اور اگر ریاستی مشینری سے بندے اٹھائے جائیں تو یہ فوجداری جرم ہو گا۔ جب یہ جرم ہو گا توہین تب ہو گی اور کسی جرم کو پہلے فرض نہیں کر سکتے۔
عدالت نے ریمارکس دیئے کہ درخواست گزار کی باتیں مفروضے پر مبنی ہیں۔
سپریم کورٹ نے درخواست گزار کو توہین عدالت سے متعلق ٹھوس شواہد فراہم کرنے کا حکم دیتے ہوئے رانا ثنا اللہ توہین عدالت کیس کی سماعت غیر معینہ مدت تک ملتوی کر دی۔

اسلام آباد: (ویب ڈیسک) شہزاد اکبر بھی نیب کے ریڈار پر آگئے، برطانیہ سے ریکور رقوم پاکستان لانے میں بے ضابطگی کا الزام لگ گیا، نیب نے سابق مشیر احتساب کیخلاف چھان بین کا آغاز کردیا۔
قومی احتساب بیورو (نیب) نے وزیراعظم آفس کو ریکارڈ فراہمی کیلئے خط لکھ دیا، وزیراعظم کے نام دسمبر 2019 کی لکھی سمری بھی طلب کر لی۔
نیب کی جانب سے جو تفصیلات مانگی گئی ہیں ان میں برطانیہ کی نیشنل کرائم ایجنسی (این سی اے) کے ساتھ مذکورہ بالا دو پاکستانی شہریوں کے حوالے سے کی گئی مکمل خط و کتابت، ان افراد کے غیر قانونی انداز سے کمائی گئی رقم اور اس رقم کی پاکستان منتقلی کی تفصیلات شامل ہیں۔

اسلام آباد: (ویب ڈیسک) وفاقی وزیر خرم دستگیر نے کہا کہ عمران خان نے جمہوریت کی جڑیں کاٹنے کا کام کیا اور عمران خان کا ایکس وائے کا بیانیہ زمین بوس ہو گیا۔
وفاقی وزیر خرم دستگیر نے پریس کانفرنس کرتے ہوئے کہا کہ حکومت اپنی مدت پوری کرے گی اور سیاسی اتار چڑھاؤ تو جمہوریت کا حصہ ہے۔ پنجاب میں ن لیگ کی اکثریت رہی ہے۔
انہوں نے کہا کہ 2018 الیکشن کے بعد پنجاب اسمبلی میں ن لیگ بڑی جماعت تھی اور پی ٹی آئی ارکان کی تعداد 155 تھی تاہم اب عام انتخابات اکتوبر 2023 میں ہوں گے۔
خرم دستگیر نے کہا کہ عمران خان نے جمہوریت کی جڑیں کاٹنے کا کام کیا۔ پنجاب میں زبردستی پولنگ کو سست روی کا شکار نہیں کیا گیا اور 17 جولائی کو انتخابات پرامن ہوئے۔
انہوں نے کہا کہ عمران خان کا ایکس وائے کا بیانیہ زمین بوس ہو گیا ہے اور جب بھی عمرانی فتنہ سر اٹھاتا ہے ملکی معیشت ڈولنے لگتی ہے۔ ملکی معیشت کو ڈگمگاتے رکھنا عمرانی فتنے کا ایجنڈا ہے۔
وفاقی وزیر ںے کہا کہ اتحادی حکومت میں تمام سیاسی جماعتیں متحد ہیں اور ہمارا مقابلہ فاشسٹ جماعت کے ساتھ ہے۔ چیف الیکشن کمشنر کو غدار قرار دیا جا رہا ہے اور انہیں دھمکیاں دی جا رہی ہیں۔

اسلام آباد: (ویب ڈیسک) حکومت نے مہنگائی کے مارے عوام کو ایک اور جھٹکا دینے کی تیاری کرلی، بجلی 9.90 روپے فی یونٹ مہنگی ہونے کا امکان ہے۔
سنٹرل پاور پرچیزنگ ایجنسی (سی سی پی اے) نے جون کی ماہانہ فیول ایڈجسٹمنٹ کے تحت بجلی کے نرخوں میں 9 روپے 90 پیسے اضافے کا مطالبہ کر دیا۔
نیشنل الیکٹرک پاور ریگولیٹری اتھارٹی (نیپرا) کے مطابق وہ 28 جولائی کو بجلی کے نرخوں میں اضافے کے لیے سی سی پی اے کی درخواست پر سماعت کرے گا۔
دوسری جانب کے الیکٹرک نے جون کی ماہانہ فیول ایڈجسٹمنٹ کے تحت بجلی کے نرخوں میں 11.38 روپے کا اضافہ بھی طلب کیا ہے۔

کوئٹہ : (ویب ڈیسک) بلوچستان کے مختلف علاقوں میں بارشوں سے ہلاکتوں کی تعداد 90 تک پہنچ گئی ہے۔
پی ڈی ایم اے کے مطابق بلوچستان میں حالیہ بارشوں سے صوبے کے مختلف اضلاع میں ہلاک ہونے والوں کی تعداد 90ہو گئی ہے جن میں 31 مرد،28 خواتین اور31 بچے شامل ہیں۔
بارشوں سے63 افراد زخمی بھی ہوئے ہیں، بارشوں سے 2 ہزار 536 مکان مہندم اورایک ہزار17 کو جزوی نقصان پہنچا۔
پی ڈٰ ی ایم اے کے مطابق بارشوں سے 706 مویشی ہلاک ہوئے، صوبے کے مختلف علاقوں میں بارشوں سے 9 پلوں کو نقصان بھی پہنچا ہے۔