کراچی: (ویب ڈیسک) پاکستان کی قومی ایئر لائن پی آئی اے نے بین الاقوامی پروازوں کے کرایوں میں بھی کمی کا اعلان کردیا ہے۔
پی آئی اے نے اندرون ملک پروازوں کے کرایوں میں نمایاں کمی کے بعد بین الاقوامی روٹس پر بھی کرایوں میں کمی کردی ہے۔
پی آئی اے نے کینیڈا کی پروازوں پرکرایوں میں 8 فیصد کمی کردی ہے جب کہ خلیجی ممالک کے روٹس پرکرایوں میں 15 فیصد کمی کی گئی ہے۔
ترجمان پی آئی کے مطابق سعودی عرب کے روٹ پر بھی کرایوں میں 10 فیصد کمی کا اعلان کیا گیا ہے۔
پی آئی اے کے ترجمان کا کہنا ہے کہ کرایوں میں کمی کا اطلاق فوری طور پر ہو گا۔

لاہور: (ویب ڈیسک) پاکستان مسلم لیگ (ن) کے رکن صوبائی اسمبلی الیاس چنیوٹی نے دعویٰ کیا ہے کہ تحریک انصاف (پی ٹی آئی) اور مسلم لیگ (ق) نے مجھے 10 کروڑ روپے کی پیشکش کی ہے۔
خیال رہے کہ پاکستان تحریک انصاف کے پنجاب اسمبلی میں اپوزیشن لیڈر سبطین خان نے ایک ایم پی اے کے منحرف ہونے کی تصدیق کی تھی۔
ن لیگی ایم پی اے الیاس چنیوٹی کو بھی بھی پیسوں کی مبینہ آفر ہوئی ہے، جس کے بارے انہوں نے کہا کہ تحریک انصاف اور مسلم لیگ ق نے مجھے 10کروڑ روپے کی پیشکش کی، مگر میں نے فوری ٹھکرا دی، پہلے مرحلے میں بھی میرے جاننے والے کے ذریعے رابطہ کیا گیا تھا، ایئرپورٹ پر اترا تب بھی کالز آئیں۔

راولپنڈی: (ویب ڈیسک) آرمی چیف جنرل قمر جاوید باجوہ نے ٹنلنگ انسٹی ٹیوٹ آف پاکستان اور نیشنل ایمرجنسی آپریشن سینٹر کا دورہ کیا، سپہ سالار نے حساس مقامات پر اضافی افرادی قوت اور وسائل فراہم کرنے کی ہدایت کرتے ہوئے کہا کہ پولیو ٹیموں کو اضافی سکیورٹی فراہم کی جائے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف نے ایف ڈبلیو او کےجدید ترین ٹنلنگ انسٹی ٹیوٹ کا افتتاح کیا، ادارے کا مقصد سرنگوں کی پیشہ ورانہ مہارت کو فروغ دینا ہے، ادارہ ٹنلنگ کے شعبے میں تحقیق، ترقی اور وسائل کو ہم آہنگ کرے گا، ادارہ تعلیمی اور صنعتی ماہرین کے ذریعے ٹنلنگ کی تعلیم کو فروغ دینے کا پلیٹ فارم فراہم کرے گا۔
آئی ایس پی آر کے مطابق آرمی سپہ سالار نے نیشنل ایمرجنسی آپریشن سینٹر کا بھی دورہ کیا، آرمی چیف کو ملک میں پولیو مہم اور درپیش چیلنجوں کے بارے میں آگاہ کیا گیا۔
جنرل قمر جاوید باجوہ نے حساس مقامات پر اضافی افرادی قوت اوروسائل فراہم کرنے کی ہدایت کرتے ہوئے کہا کہ پولیو ٹیموں کو اضافی سکیورٹی فراہم کی جائے، پولیو سے پاک پاکستان کے لئے موثر کوششیں کامیاب بنانے کی ضرورت ہے۔
آئی ایس پی آر کے مطابق آرمی چیف نے پولیو مہم کے انعقاد اور دیگر اقدامات کو سراہا، جنرل قمر جاوید باجوہ کا استقبال لیفٹیننٹ معظم اعجاز اور میجرجنرل کمال اظفر نے کیا۔

لاہور: (ویب ڈیسک) صوبائی وزیر داخلہ عطاء اللہ تارڑ نے تحریک انصاف کے رہنما چودھری مسعود کا استعفیٰ پریس کانفرنس میں پیش کرتے ہوئے دعویٰ کیا ہے کہ پنجاب میں استعفوں کا سلسلہ شروع ہو چکا ہے، ابھی ایک استعفیٰ آیا ہے ہو سکتا ہے مزید آجائیں۔
خیال رہے کہ پاکستان تحریک انصاف (پی ٹی آئی) کے رہنما اور سابق وفاقی وزیر اطلاعات فواد چودھری اور پنجاب اسمبلی میں اپوزیشن لیڈر سبطین خان نے الزامات عائد کرتے ہوئے تھے کہا کہ ہمارے ایک رکن اسمبلی منحرف ہو چکے ہیں، 40 کروڑ روپے لیکر ترکی چلے گئے ہیں۔ آصف علی زرداری نے خریداری کا بازار شروع کر دیا ہے۔
فواد چودھری کی جانب سے الزامات کے بعد نیوز کانفرنس میں رد عمل دیتے ہوئے انہوں نے کہاکہ تحریک انصاف نے ایک بارپھررونا دھونا شروع کردیا ہے، فواد چودھری چیخیں ماررہا ہے عطا تارڑ کو گرفتارکرو، لاہوربیٹھا ہوں فواد چودھری گرفتاری کی آوازیں کسی اور جگہ لگائیں، وہ اب تک پانچ جماعتیں تبدیل کر چکے ہیں
صوبائی وزیر داخلہ کا کہنا تھا کہ فواد چودھری یہ وہ دورنہیں کہ آپ چچا کے نام پرپیسے اٹھائیں،ان کی کمائی میں ایک پیسہ حلال کا نہیں، ڈبو ہر روز اپنا لیڈر تبدیل کرتا ہے، اللہ تعالیٰ کو حاضر ناظر جان کر کہتا ہوں، اگر مسعود مجید کو 40 کروڑ آفر کیا تو اللہ عذاب نازل فرمائے، اللہ جھوٹے پر بھی اپنا قہر اورعذاب نازل فرمائے۔
نیوز کانفرنس کے دوران چودھری مسعود نے استعفی میں پیش کرتے ہوئے عطاء تارڑ نے کہا کہ 3 اپریل 2022 کو چودھری مسعود نے تحریک انصاف سے نالاں ہو کر استعفی دیا۔ استعفے کے بعد ان پر رشوت کا الزام لگایا جا رہا ہے، قرآن پر حلف لیکر کہتا ہوں چودھری مسعود کو پیسے نہیں دیئے، فواد چودھری بھی قرآن پرحلف دیں، ان کو 188ووٹ چاہئیں جوان کے پاس موجود ہیں، ہمارے پاس 7 ووٹوں کا فرق ہے، ہم نے تو جلیل شرقپوری کو کروڑوں دینے کا نہیں کہا، ابھی ایک استعفی آیا ہے ہو سکتا ہے اس کے بعد مزید استعفے آجائیں۔
ان کا کہنا تھا کہ مولانا الیاس چنیوٹی کو پرویزالہیٰ کے صاحبزادے نے حج کے فریضے کے دوران 10 کروڑ رشوت دے کربھیجا، مونس الہیٰ آج بھی پرائیویٹ طیارے پر اسلام آباد میں منت ترلے کر رہا ہے، حج کی ادائیگی کے دوران رشوت دینا مکروہ عمل ہے، پرویزالہیٰ بھی عمران خان کی طرح اسلامی ٹچ دینا چاہتے ہیں۔ فیصل آباد سے بزرگ خاتون ایم پی اے کے گھر دو لوگوں کو رشوت دے کر بھیجا گیا، فیصل آباد کی خاتون ایم پی ایز کی فیملی نے ان کو گالیاں دے کربھیجا، پرویزالہیٰ صاحب بس کریں اور کتنا آگے جائیں گے، جیل میں بند تو پرویزالہیٰ کے بیٹے کو کرنا چاہیے، فواد چودھری صاحب میں تو جہلم آکر بھی بیٹھوں گا روکنا ہوگا توروکیے گا۔
صوبائی وزیر داخلہ کا کہنا تھا کہ اب عدالت میں جا کر توہین عدالت کی درخواستیں دے رہے ہیں، جب زبردستی استعفے لیتے ہیں تب توہین عدالت نہیں ہوتی، پنکی، عمران خان پاکستان کو لوٹ کر کھا گئے، آج تک یہ نہیں بتا سکے ’ابسولیٹلی ناٹ‘ کس کوکہا تھا، فتنہ خان پر شیاطین اترتے ہیں،:’ابسولیٹلی ناٹ‘فارن فنڈنگ نہ لینے پرکہنا چاہیے تھا۔
انہوں نے مزید کہا کہ سیاست میں کچھ بھی ہوسکتا ہے، سرپرائزبالکل آسکتے ہیں، ہارجیت اللہ کے ہاتھ میں ہے زورپورا لگائیں گے، ان کے تمام الزامات کومسترد کرتے ہیں، استعفوں کا سلسلہ شروع ہوچکا مزید اپ ڈیٹ رکھیں گے۔ شہباز گل ایک دن بھی جیل میں گزار نہیں سکا، اور روتا رہا۔

رحیم یار خان: (ویب ڈیسک) رحیم یار خان میں پاکستان تحریک انصاف کے کارکنوں نے 40 کروڑ لینے کے مبینہ الزام پر اپنی جماعت کے رکن پنجاب اسمبلی چوہدری مسعود کے گھر کے باہر احتجاج کیا۔
سابق وفاقی وزیر اطلاعات و پاکستان تحریک انصاف کے رہنما فواد چوہدری نے اپنی ہی جماعت کے رکن پنجاب اسمبلی مسعود مجید پر 40 کروڑ روپے لیکر بیرون ملک جانے کا الزام عائد کیا ہے۔
اس الزام کے بعد پی ٹی آئی کارکنوں نے لوٹے اٹھا کر مسعود مجید کےگھر کے باہر احتجاج کیا اور رکن اسمبلی کے خلاف نعرے بازی کی۔
احتجاج کے دوران مسعود مجید کے گھر کے دروازے بند تھے۔ احتجاج کی اطلاع پر پولیس بھی رکن اسمبلی کے گھر کے باہر پہنچ گئی
چوہدری مسعود مجید پی پی 257 لیاقت پور سے پی ٹی آئی کے ایم پی اے ہیں۔