کراچی: (ویب ڈیسک) پیپلزپارٹی کی سینٹرل ایگزیکٹو کمیٹی (سی ای سی) اجلاس میں فیصلہ کیا گیا ہے کہ موجودہ حکومت اپنی مدت پوری کرے گی۔
وزیراطلاعات سندھ شرجیل میمن نے پریس کانفرنس سے خطاب کرتے ہوئے کہا کہ آج پیپلزپارٹی کی سینٹرل ایگزیکٹو کمیٹی کا اہم اجلاس ہوا ہے، پیپلز پارٹی موجودہ صورتحال میں اتحادی جماعتوں کے ساتھ کھڑی رہے گی۔
انہوں نے کہا کہ موجود صورتحال پر کل لاہور میں اتحادی جماعتوں کو اجلاس ہوگا جس میں پیپلز پارٹی بھی شریک ہو گی۔
شرجیل میمن نے مطالبہ کیا کہ عمران خان فوری طور پر الیکشن کمیشن ، مسٹر ایکس اور وائے اور اس قوم سے معافی مانگیں۔ اس الیکشن میں عمران خان جیت کر بھی ہار گئے ہیں۔
ان کا کہنا تھا کہ آج اس ملک میں جو مہنگائی ہے وہ عمران خان کی وجہ سے ہے،جنہوں نے آئی ایم ایف کے ساتھ معاہدہ کیا تھا، اس معاہدے پر عمل اس حکومت کو کرنا پڑا۔
انہوں نے کہا کہ عمران خان نے آئی ایم ایف سے وعدے کرکے ملک میں مہنگائی کی۔
شرجیل انعام میمن نے کہا کہ شہباز شریف کو آئینی اور قانونی طور پر اکثریت حاصل ہے،عمران خان کے پاس اکثریت ہے تو اسمبلی میں آئیں اور شہبازشریف کو ہٹائیں۔
ان کا کہنا تھا کہ عمران خان واحد شخص کو جس کو آئینی طریقے سے ایوان سے نکالاگیا، ان کا اقتدار صرف ایک دھوکہ تھا۔
انہوں نے کہا کہ پیپلز پارٹی ہمیشہ چاہتی ہے اسٹیبلشمنٹ نیوٹرل رہے،پیپلز پارٹی اپنی اتحادی جماعتوں کے ساتھ کھڑی ہے اور آئیسولیشن میں کوئی بھی فیصلہ نہیں کرے گی۔

اسلام آباد: (ویب ڈیسک) پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہاہے کہ سیاسی استحکام آنے سے سرمایہ کاری آئے گی، ملک میں جاری سیاسی بحران ختم کرنے کا صرف ایک ہی راستہ ہے فوری طور پر صاف اور شفاف الیکشن کروائے جائیں۔
عمران خان کی زیر صدارت پی ٹی آئی کور کمیٹی کا اجلاس ہوا، اجلاس میں پارٹی کے سینئر قیادت نے شرکت کی، اجلاس کے دوران کور کمیٹی ارکان نے عمران خان کو سندھ میں متحرک ہونے کا مشورہ دیا ہے۔
ذرائع نے بتایا کہ پنجاب میں انتخابی جیت پر کور کمیٹی ارکان کی میٹھے چاول سے تواضع کی گئی۔
اجلاس کے بعد عوام سے خطاب کرتے ہوئے پی ٹی آئی چیئر مین نے کہا کہ سب سے پہلے اللہ کا شکرادا کرتا ہوں، پنجاب کے ووٹرز،یوتھ،خواتین کا شکریہ ادا کرتا ہوں، یہ ملک کے لیے بہت ہی خوش آئند وقت ہے، قوم میں شعوراورنظریہ سمجھ آگیا ہے، جس دن ہم اپنا نظریہ سمجھ گئے قوم ایک عظیم قوم بن جائے گی، جس قوم کا کوئی نظریہ نہ ہووہ کبھی قوم نہیں بن سکتی، بیرونی سازش کے تحت امپورٹڈ حکومت مسلط کی گئی۔ قائداعظم نے ہندوؤں کی غلامی سے انکارکیا تھا، ہم کسی اورکی غلامی قبول نہیں کریں گے، قوم میں شعوراوربیداری دیکھی ہے، خوش ہوں اب ہم قوم بننے کی طرف جارہے ہیں، جب ہم قوم بن جائیں گے توقرض جیسے تمام مسائل حل ہونا شروع ہوجائیں گے۔
انہوں نے کہا کہ ملک کی بدقسمتی ہےاشرافیہ نے اپنا پیسہ بیرون ملک رکھا ہوا ہے، اشرافیہ نے لندن فلیٹس لیے ہوئے ہیں، سب کچھ بیرون ملک ہے، ایسے قوم نہیں بن سکتی، پاکستان بڑی قربانیوں کے بعد بنا تھا، قائداعظمؒ نے تواپنی بیماری کا بھی پتا نہیں چلنے دیا تھا، جس طرح لوگ ووٹ ڈالنے کے لیے باہرنکلے یہ ایک نیا پاکستان ہے۔ ہماری حکومت کے دوران ایک مصنوعی سیاسی بحران پیدا کیا گیا، حکومت کے اکنامک سروے کے مطابق17سال بعد ہماری گروتھ ریٹ بڑھ رہی تھی، ہماری حکومت نے کورونا کے باوجود تمام حکومتوں سے زیادہ روزگاردیا تھا۔
سابق وزیراعظم نے کہا کہ ہمارے دور میں پاکستان کی چارفصلوں کی ریکارڈ پیداوارہوئی، ہماری حکومت میں پہلی دفعہ کسانوں کو پورا معاوضہ ملا، ہمارے دورمیں ٹیکسٹائل انڈسٹری بڑھ رہی تھی، ہمارے دورمیں فیصل آباد میں مزدورنہیں مل رہے تھے، ہماری حکومت میں 75 فیصد آئی ٹی کی ایکسپورٹ بڑھی، ہماری حکومت بھی اڑھائی سال آئی ایم ایف پروگرام میں تھی، جب ہم کہتے تھے عالمی سطح پرمہنگائی ہورہی ہے توکہتے تھے مہنگائی مارچ کریں گے، ہم پاکستان کواسلامی فلاحی ریاست کی طرف لیکر جا رہے تھے، پہلی دفعہ ہماری حکومت نے ہر خاندان کو 10 لاکھ کی ہیلتھ انشورنس دی، احساس پروگرام کوعالمی سطح پرسراہا گیا،ہماری حکومت سود کے بغیرگھربنانے کے لیے قرض دے رہی تھی۔
عمران خان نے کہا کہ جب یہ سب کچھ ہورہا تھا تواس وقت سازش کے تحت ہماری حکومت گرائی گئی، جب سازش ہورہی تھی تو میں نے اور شوکت ترین نے آگاہ کر دیا تھا، ہم نے کہا تھا حالات خراب ہوئے تو سنبھالے نہیں جائیں گے، مسلم لیگ کی دونوں حکومتوں میں کبھی ایکسپورٹ نہیں بڑھی تھی، انہوں نے آتے ہی نیب ترامیم کر کے 1100 ارب کا معاف کرا لیا، کل اس حوالے سے سپریم کورٹ جا رہا ہوں، یہ اقتدارمیں اپنے کیسزمعاف کرانے آئے تھے۔ اب ہمیں سبق سیکھنا ہوگا، جب تک سیاسی بحران ختم نہیں ہوگا معیشت مزید نیچے کی طرف جائے گی، مجھے خطرہ ہے حالات مزید خراب نہ ہوجائیں، ایک ہی راستہ ملک میں شفاف الیکشن ہے۔
انہوں نے کہا کہ بلومبرگ کے مطابق آج پاکستان دنیا میں چوتھے نمبر پر ہے جس کا دیوالیہ ہونے جا رہا ہے، موڈیز نے پاکستان کی ریٹنگ منفی کر دی ہے، آج واپڈا کی بھی ریٹنگ نیچے گر گئی ہے، سارامعاشی بحران ان کی سازش کی وجہ سے آیا تھا، ملکی زرمبادلہ کے ذخائرآدھے ہو چکے ہیں، روپیہ تقریبا 28 روپے گرچکا ہے۔
سابق وزیراعظم نے کہا کہ اگرضمنی الیکشن کی طرح ہی الیکشن کرانا ہے تو بحران بڑھے گا، ضمنی الیکشن میں ہمیں ہرانے کے لیے ہرحربہ استعمال کیا گیا، سپریم کورٹ کا فیصلہ تھا ریاست کی کسی قسم کی مداخلت نہیں ہو گی، ہرجگہ سے ہمارے لوگوں کو پولیس سے ڈرایا، دھمکایا گیا، ضمنی الیکشن میں ریاستی مشینری کا بے دریغ استعمال کیا گیا، جن پولیس افسران نے ان کے جیالے بن کرمدد کی ایک ایک کا نام یاد ہے، مجھے سب سے زیادہ افسوس چیف الیکشن کمشنر پر ہے، سکندر سلطان راجہ میں اہلیت ہی نہیں ہے، 40 لاکھ مردہ افراد کوبھی ووٹرزلسٹ میں ڈالا گیا، اس چیف الیکشن کمشنر پر ہمیں کوئی اعتماد نہیں۔
اپنی بات کو جاری رکھتے ہوئے عمران خان نے کہا کہ چیف الیکشن کمشنر نے ن لیگ کو جتوانے کی کوشش کی، سینیٹ الیکشن میں گیلانی کا بیٹا پیسے دیتا پکڑا گیا، الیکشن کمشنرنے گیلانی کے بیٹے کے خلاف کوئی ایکشن نہیں لیا، سینیٹ الیکشن میں کھلے عام لوگوں کوخریدا گیا، چیف الیکشن کمشنرکے سارے فیصلے تحریک انصاف کے خلاف ہوتے ہیں، کبھی الیکشن کمشنرنے سندھ بلدیاتی الیکشن میں دھاندلی کا پتا چلوایا، ڈسکہ ضمنی الیکشن چیف الیکشن کمشنرنے ہمیں ہروایا۔ سندھ بلدیاتی الیکشن میں پیپلزپارٹی نے پولیس کواستعمال کیا، سندھ الیکشن کمشنر صوبائی حکومت کا نوکر ہے، اس کیس سپریم کورٹ میں پڑا ہے اسے سنا ہی نہیں جارہا، اس الیکشن کمیشن نے ہمارے خلاف ہر حربہ استعمال کیا۔
ان کاکہنا تھا کہ جس طرح لوگ باہرنکلے اس طرح عام انتخابات میں بھی لوگ نہیں نکلے اس لیے جیتے۔ 26 سالوں میں قوم میں اتنی بیداری اورشعورنہیں دیکھا، سازش کے تحت جب مجھے باہرنکالا گیا تو لوگ سمجھ رہے تھے مٹھائیاں بانٹیں گے، میڈیا پر میرا بلیک آؤٹ کروایا گیا، شہباز شریف اور اس کے بیٹے کو سزا ہونے لگی تھی، کبھی کوئی تصورکرسکتا ہے کوئی الیکشن کمیشن باپ اور بیٹے کو اجازت دے، دنیا میں ایسا کوئی الیکشن کمیشن نہیں ہوسکتا جو ملزمان کوالیکشن کی اجازت دیتا۔
پی ٹی آئی چیئر مین کا کہنا تھا کہ 25 مئی کا دن کبھی نہیں بھولوں گا، 25 مئی کوجس طرح پولیس نے تشدد کیا ایک، ایک پولیس والے کا نام یاد ہے، رانا ثنا اللہ کے کہنے پر پولیس نے خوف پھیلایا، آپ تھوڑی دیرتک سب کو پاگل بنا سکتے ہیں سارا وقت نہیں، 25مئی کوعوام نے خوف کا بت توڑدیا تھا، 25مئی کے بعد ثابت ہوگیا تھا لوگ جاگ چکے ہیں، اب بوتل سے شعورکا جن نکل آیا ہے، اب کوئی بند کمرے میں ملک کے مستقبل کا فیصلہ نہیں کرسکتا، اب دوہی راستے رہ گئے ہیں، جو بھی مینڈیٹ چوری کرے گا اس کو (ن) لیگ کی طرح شکست ہو گی، جب مجھے ہٹایا گیا تو میں نے الیکشن کا اعلان کر دیا تھا، عوام کو فیصلہ کرنے دیں ایک ہی راستہ ہے وہ صاف اور شفاف الیکشن کا ہے، اس الیکشن کمیشن نے بار بار ہمیں ڈسا ہے، ملک کی سب سے بڑی جماعت کو اس الیکشن کمیشن پراعتماد نہیں، مہربانی کر کے چیف الیکشن کمشنرمستعفی ہو جائیں، آپ ایک پارٹی کے ساتھ جڑے ہوئے ہیں۔ کرکٹ میں جب امپائر پر اعتماد نہ ہو تو اسے ہٹادیا جاتا ہے۔ سیاسی استحکام آنے سے اوورسیز پاکستانی انویسٹ کریں گے، پاکستان کوسیاسی استحکام کے لیے شفاف اورالیکشن چاہئیں،
ان کا کہنا تھا کہ اللہ اور پیارے نبیؐ کا شکر ادا کرتا ہوں، نوجوان، خواتین جس تعداد میں باہرنکلے شکریہ ادا کرتا ہوں، عوام مہنگائی میں پس گئے ہیں، پہلے ڈیزل، پٹرول کی قیمتیں بڑھادی پھر 18 روپے کم کر دیا گیا، آج عالمی سطح پر پٹرول کی قیمتیں کم ہورہی ہے، پٹرولیم مصنوعات کی قیمتوں کو کم کرنا چاہیے، ملک میں ایک دفعہ سیاسی استحکام آجائے تو پھر ملک آگے بڑھے گا۔

اسلام آباد: (ویب ڈیسک) تحریک انصاف کے رہنما اور سابق وزیر خزانہ شوکت ترین کا کہنا ہے کہ سیاسی غیر یقینی اور معاشی استحکام کیلئے عام انتخابات کا اعلان کرنے کی ضرورت ہے۔
شوکت ترین نے اپنے بیان میں کہا کہ پنجاب ضمنی انتخابات نے سیاسی غیریقینی میں اضافہ کیا ہے، سیاسی غیر یقینی معاشی عدم استحکام پیدا کرتی ہے۔
شوکت ترین نے کہا کہ مفتاح کے بیرونی دوستوں کی مدد کی یقین دہانی کے باوجود روپیہ گر رہا ہے، غیر یقینی ختم کرنے کیلئے عام انتخابات کا اعلان کرنے کی ضرورت ہے۔
خیال رہے کہ آج روپے کے مقابلے میں انٹر بینک مارکیٹ میں ڈالر 4 روپے 25 پیسے مہنگا ہو کر 215 روپے 20 پیسے کی بلند ترین سطح پر پہنچ گیا جبکہ اوپن مارکیٹ میں ڈالر 5 روپے اضافے کے بعد 216 روپے پر فروخت ہو رہا ہے۔
اس کے علاوہ کاروباری ہفتے کے پہلے روز ہی 100 انڈیکس 707 پوائنٹس گرگیا۔

ملتان: (ویب ڈیسک) پاکستان پیپلزپارٹی کے مرکزی رہنما اور سابق وزیراعظم سینیٹر سید یوسف رضا گیلانی نے کہا ہے کہ ہم اس مشکل وقت میں مسلم لیگ (ن) کا ساتھ دیں گے۔
پریس کانفرنس سے خطاب کرتے ہوئے کہی۔ اجلاس میں ملک کی سیاسی صورتحال کا جائزہ لے کر مشاورت کی گئی۔
سینیٹر سید یوسف رضا گیلانی نے پریس کانفرنس سے خطاب کرتے ہوئے کہا کہ بلاول بھٹو کی زیر صدارت منعقدہ اجلاس میں ملک کی موجودہ صورتحال پر گفتگو ہوئی اور حالات کا جائزہ لیا گیا۔
سابق وزیراعظم سینیٹر یوسف رضا گیلانی نے کہا کہ اتحادی جماعتیں مل کر آئندہ کا لائحہ عمل طے کریں گی، پنجاب میں 20 سیٹوں پر ضمنی الیکشن ہوئے جو پی ٹی آئی کی تھیں، اس نے 15 سیٹیں جیت لیں اور اپنی ہی پانچ سیٹیں ہار گئی۔
سینیٹر سید یوسف رضا گیلانی نے کہا کہ ضمنی انتخاب میں مسلم لیگ (ن) نے بہت اچھی مہم چلائی، ہم 20 سیٹوں پر مسلم لیگ (ن) کو مکمل سپورٹ کر رہے تھے، پنجاب کے 20 حلقوں میں صاف و شفاف الیکشن ہوئے۔
سینیٹر سید یوسف رضا گیلانی نے کہا کہ الیکشن کمیشن نے صاف و شفاف الیکشن کا انعقاد کرایا، الیکشن کے انعقاد اور نتائج کے بعد پی ٹی آئی کو اپنی غلطی کا احساس ہونا چاہئے۔

راولپنڈی: (ویب ڈیسک) راولپنڈی میں پنجاب اسمبلی کے حلقے پی پی 7 ریٹرننگ افسر نے دوبارہ گنتی کی درخواست پر 19 جولائی کو تمام امیدواروں کو طلب کرلیا۔
پی پی 7 راولپنڈی کے تمام 260 پولنگ اسٹیشنز کے غیر سرکاری غیر حتمی نتیجے کے مطابق (ن) لیگ کے راجہ صغیر احمد 68906 ووٹ لے کر کامیاب ہوئے جبکہ تحریک انصاف کے محمد شبیر اعوان نے 68857 ووٹ حاصل کیے، اس طرح انہیں 49 ووٹوں سے شکست ہوئی۔
پی ٹی آئی امیدوار نے نتائج تسلیم کرنے سے انکار کیا اور دوبارہ گنتی کی درخواست دائر کردی ہے۔
اس حوالے سے پی پی 7 کے ریٹرننگ افسر رائے سلطان بھٹی کا کہنا تھاکہ پی ٹی آئی امیدوار کرنل (ر) شبیر اعوان نے دوبارہ گنتی کی درخواست دی ہے۔
آر او کا کہنا تھاکہ دوبارہ گنتی کی درخواست پر تمام امیدواروں سے مشاورت کے بعد فیصلہ کیا جائے گا اور تمام امیدواروں کا دوبارہ گنتی کے فیصلے میں شامل ہونا ضروری ہے۔
ترجمان الیکشن کمیشن کا کہنا ہے کہ ریٹرننگ آفیسر پی پی 7 راولپنڈی نے پی ٹی آئی امیدوارکی دوبارہ گنتی کی درخواست وصول کی ہے، ریٹرننگ آفیسر نے حلقے کے تمام امیدواروں کو کل ساڑھے 11 بجےکیمپ آفس کہوٹہ بلایا ہے۔

اسلام آباد: (ویب ڈیسک) پارلیمنٹ کا مشترکہ اجلاس بھی 22 اگست کو طلب کر لیا گیا۔
پارلیمنٹ کا مشترکہ اجلاس کا شیڈول تبدیل کر دیا گیا ہے، اجلاس پہلے 20 جولائی کو شام چار بجے ہونا تھا تاہم اب مشترکہ اجلاس 22 اگست کو شام چار بجے پارلیمنٹ ہاؤس میں ہو گا۔
سپیکر راجہ پرویز اشرف نے شیڈول میں تبدیلی کا نوٹیفیکشن جاری کردیا۔

کراچی: (ویب ڈیسک) متحدہ قومی موومنٹ (ایم کیو ایم) کے سابق کنونیئر فاروق ستار نے کراچی میں این اے 245 کا ضمنی الیکشن آزاد حیثیت میں تالے کے انتخابی نشان پر لڑنے کا اعلان کر دیا۔
کراچی میں فاروق ستار نے میڈیا سے گفتگو کرتے ہوئے کہا کہ 2018 کے الیکشن میں مجھے ہرایا گیا۔ ایم کیو ایم کے بھائیوں کو 4 سال تک میری یاد نہیں آئی۔ انکا کہنا تھا کہ جس کی ڈوریں کسی اور کے ہاتھ میں ہوں وہ سیاست نہیں کرسکتے۔
پی ٹی آئی چیئر مین عمران خان کے بیانیے کے حوالے سے بات کرتے ہوئے انہوں نے کہا کہ آج جو بیانیہ ان کا ہے،وہ میرا بہت پہلے سے ہے۔
فاروق ستار نے گلہ کرتے ہوئے کہا کہ مجھے ایم کیو ایم سے الگ کیا گیا میں نہیں ہو اتھا۔ خالد مقبول صدیقی سے میری تین ملاقاتیں ہوئیں۔ نیک نیتی سے کوشش کی کسی طرح خالد مقبول اور میں کھڑے ہوں۔ ہمارا ووٹ بینک چاہتا ہے سب ایک طرف کھڑے ہو جائیں۔
فاروق ستار نے کہا کہ کوشش کی ایم کیو ایم میں جاکر دوبارہ اسے پاوں پر کھڑا کروں۔ میں نے 75 کراچی میں 30 پینل حیدر آباد میں ر کھے ۔ زیادہ تر نئے چہرے اور قیادت نوجوانوں کے ہاتھ میں ہے۔

لاہور: (ویب ڈیسک) پاکستان تحریک انصاف اور مسلم لیگ ق نے اپنے ارکان پنجاب اسمبلی کو بیرون ملک جانے سے روک دیا۔
دونوں پارٹیوں کی طرف سے اراکین کو کہا گیا ہے کہ پہلے سے بیرون ملک جانیوالے ارکان کی واپسی کے لیے رابطے کیے جا رہے ہیں اور 2 ارکان کل بیرون ملک سے پاکستان پہنچ جائیں گے، تمام ارکان 22 جولائی تک حلقوں میں واپس نہیں جائیں گے کیوں کہ دونوں جماعتوں کی جانب سے اپنے ایم پی ایز کو ہدایات جاری کی گئی ہے کہ تمام ارکان 22 جولائی تک لاہور میں موجود رہیں گے۔ پی ٹی آئی اور (ق) لیگ کے تمام ارکان اسمبلی اجلاس میں شرکت کریں گے۔