کیلیفورنیا: (ویب ڈیسک) جس طرح ہم بدلتے موسم میں نزلہ زکام سے بچنے کے لیے ایسپرین لیتے ہیں اسی طرح ماہرین نے پودوں کو موسمیاتی شدت سے بچانے کے لیے قدرتی ایسپرین دریافت کی ہے جسے سیلی سائیکلِک ایسڈ کا نام دیا گیا ہے۔
سیلی سائیکلک ایسڈ پودوں میں قدرتی طور پر پایا جاتا ہے۔ یہ ایک نامیاتی مرکب ہے جو اس وقت پیدا ہوتا ہے جب پودے حرارت یا خشک سالی سے گزرتے ہیں۔ اب ماہرین کا اصرار ہے کہ عین اسی عمل سے بڑھتے ہوئے عالمی درجہ حرارت میں پودوں کو تندرست و توانا رکھا جاسکتا ہے۔
دلچسپ بات یہ ہے کہ سیلی سائیکلک ایسڈ سے ہی ایسپرین تشکیل پاتی ہے اور ایک عرصے سے اسے درد کش دوا کے طور پر استعمال کیا جاتا رہا ہے۔ یہاں تک کی قدیم مصری بھی اسے دیسی دوا کے طور پر استعمال کرتے آرہے ہیں اور وہ ایسےپودوں کے پتوں کو پیس کر جوشاندہ بناتے تھے۔
جامعہ کیلیفورنیا، ریورسائیڈ کے سائنسدانوں نے سیلی سائیکلک ایسڈ بننے کا عمل بغوردیکھا ہے ۔ پہلے ری ایکٹو آکسیجن اسپیشیز (آراوایس) کا مطالعہ کیا جو تمام پودوں میں موجود ہوتے ہیں اور ماحولیاتی دباؤ کے وقت خارج ہوتے ہیں اور یہ عمل انسانوں میں بھی ہوتا ہے۔
آراوایس پودے کی ہنگامی حالت کی پکار ہوتے ہیں اور اس کے بعد وہ سیلی سائیکلِک ایسڈ بنانے لگتے ہیں۔ پھر ماہرین نے دیکھا کہ کہ عربی ڈوپسِس نامی پودا جب جب حرارت، دھوپ اور خشک سالی سے گزرتا ہے وہ ایک سالمہ (مالیکیول) بناتا ہے جس سے سیلی سائیکلِک ایسڈ بننے لگتا ہے۔ سیلی سائیکلِک ایسڈ اپنی تشکیل کے بعد فوٹوسنتھے سز میں اہم کردار ادا کرنے والے کلوروپلاسٹ کی حفاظت بھی کرتا ہے۔
امید ہے کہ سیلی سائیکلِک ایسڈ بننے کے عمل کو سمجھ کر اسے موسمیاتی شدت اور گلوبل وارمنگ کے شکار پودوں ، فصلوں اور درختوں کو بچانا ممکن ہوگا۔ آب و ہوا کے تغیر سے پودوں اور درختوں پر بہت دباؤ ہے اور یہی وجہ ہے کہ اس ضمن میں سیلی سائیکلک ایسڈ کی اہمیت مزید واضح ہوجاتی ہے۔
اگر ہم کسی طرح پودوں کو حسبِ ضرورت یہ ایسڈ بنانے کے قابل بناتے ہیں تو اس سے عالمی زراعت کا بہت بڑا مسئلہ حل ہوسکتا ہے۔

لندن: (ویب ڈیسک) ہم جانتے ہیں کہ غذا اور صحت کا گہرا تعلق ہوتا ہے اور اب ایک مطالعے سے معلوم ہوا ہے کہ فاسٹ فوڈ، پروسیس شدہ غذا اور مرغن کھانوں کے مقابلے میں اگر پھلوں اور سبزیوں کا زیادہ استعال کیا جائے تو اس سے ڈپریشن کا خطرہ بھی ٹل جاتا ہے۔
برمنگھم میں واقع ایسٹن یونیورسٹی کے ماہرین نے اس ضمن میں 430 افراد پر تحقیق کی ہے جن میں 53 فیصد خواتین شامل تھیں۔ شرکا کی اوسط عمر 40 برس تھی۔ اس تحقیق سےمعلوم ہوا کہ فاسٹ فوڈ اور مرغن غذائیں کھانے سے ذہنی تناؤ اور اینزائٹی کا خطرہ بڑھ جاتا ہے۔
تحقیق کا خلاصہ یہ ہے کہ دن میں پانچ مرتبہ پھلوں کی کچھ نہ کچھ مقدار کھانے سے دماغی صحت بہتر ہوتی ہے اور بالخصوص ڈپریشن میں کمی واقع ہوتی ہے۔ اداسی، اینزائٹی اور ڈپریشن ہماری تیزرفتار زندگی کا خوفناک عارضہ بن چکی ہےجس میں کروڑوں افراد جکڑے نظرآتے ہیں۔
پھلوں اور سبزیوں میں اینٹی آکسیڈنٹس، فلیوینولز، فائبراور دیگر اہم خردغذائی اجزا موجود ہوتے ہیں جو دماغی افعال پر گہرا مثبت اثر ڈالتے ہیں۔
تحقیق میں شامل پی ایچ ڈی طالبہ نکولا جائن ٹک کہتی ہیں کہ مہنگی ادویہ کے مقابلے میں پھل اور سبزیاں ڈپریشن بھگانے کا ایک سادہ اور آسان حل پیش کررہی ہیں اور عوام کو اسے آزمانا ہوگا۔ اگرچہ اس تحقیق میں 16 سے 80 سال کے افراد شامل تھے لیکن اوسط عمر 40 برس تھی اور ان سے غذائی عادات پر بہت سے سوالات کئے گئے تھے۔
سوالنامے میں غذائی عادات اور ڈپریشن، گھبراہٹ وغیرہ کے متعلق پوچھا گیا تھا۔ جن افراد کے معمول میں پھل اور سبزیاں شامل تھیں ان میں واضح طور پر ڈپریشن کی علامات بہت کم تھیں۔ اگرچہ یہ ایک چھوٹا مطالعہ ہے لیکن ان کی شماریاتی اہمیت نظر انداز نہیں کی جاسکتی۔ تاہم اس پر مزید تحقیق کی ضرورت محسوس کی گئی ہے۔