لاہور: (ویب ڈیسک) وزیراعلیٰ پنجاب حمزہ شہباز نے کہا ہے کہ ورثے میں ملنے والی تباہ حال معیشت کی تیز رفتار بحالی کا مشکل بیڑہ اٹھایا تھا، معیشت کی سمت درست کرنے میں کامیاب ہو گئے ہیں۔
حمزہ شہباز نے کہا ہے کہ پٹرولیم مصنوعات کے نرخوں میں کمی عوام کے لیے آسانیوں کے مشن کا پہلا قدم ہے، پٹرولیم مصنوعات کے نرخوں میں کمی درست معاشی سمت کا نتیجہ ہے، ٹیم ورک کے نتیجے میں آئی ایم ایف پروگرام بحال ہوا۔
وزیراعلیٰ پنجاب کا کہنا تھا کہ اچھے دن آنے کو ہیں، پٹرولیم مصنوعات کی قیمتوں میں کمی پہلی اچھی خبر ہے، خدمت کا عہد نبھانے کے لئے ہر حد تک جائیں گے، عوام کے مصائب اور مشکلات دور کرنے کے لئے دن رات محنت کررہے ہیں۔
حمزہ شہباز نے کہا کہ عوام کو سستا آٹا فراہم کرنے کے لیے 200 ارب روپے کی تاریخی سبسڈی دی، مسلم لیگ ن نے جب بھی حکومت سنبھالی مسائل حل کر کے دکھائے۔

اسلام آباد: (ویب ڈیسک) قومی ایئر لائن نے اندرون ملک پروازوں کے لیے کرایوں میں کمی کا اعلان کر دیا۔
ترجمان قومی ایئر لائن کے مطابق پی آئی اے کی اندرون ملک کرایوں میں 10 فیصد رعایت دی جا رہی ہے جس پر 17 جولائی سے اطلاق ہو گا اور فی الحال یہ رعایت اگلے 30 روز کے لیے ہے۔
وفاقی وزیر ہوا بازی خواجہ سعد رفیق نے کہا کہ پی آئی اے میں 90 فیصد سے زائد مسافر اکانومی کلاس میں سفر کرتے ہیں اور اکانومی کلاس کے کرایوں میں 10 فیصد کمی کی جا رہی ہے۔
انہوں نے کہا کہ قیمتوں میں کمی کا فائدہ اپنے مسافروں تک منتقل کرنے کے لیے کرایوں میں رعایت کا فیصلہ کیا گیا۔

لاہور: (ویب ڈیسک) پی ٹی آئی رہنما اسد عمرکا کہنا ہے کہ انتظامیہ ضمنی الیکشن پر اثر انداز ہونے کی کوشش کررہی ہے۔ایک طرف تمام جماعتیں اور حکومتی مشینری ہے دوسری طرف عمران خان اور پی ٹی آئی ہے۔
پی ٹی آئی رہنما اسد عمر نے پنجاب کے ضمنی الیکشن میں دھاندلی کی کوشش کا الزام دہرادیا۔ ان کا کہنا ہے کہ انتظامیہ ضمنی الیکشن پر اثر انداز ہونے کی کوشش کررہی ہے۔ایک طرف تمام جماعتیں اور حکومتی مشینری ہے دوسری طرف عمران خان اور پی ٹی آئی ہے۔
اسدعمر کا کہنا ہے کہ پی ٹی آئی ضمنی الیکشن میں بھاری اکثریت سے کامیاب ہوگی۔یہ الیکشن عمران خان اور پرویز الہٰی کا نہیں ہم سب کا ہے۔علی امین گنڈاپور کو پنجاب آنے سے روکنا قوم کو تقسیم کرنے کی کوشش ہے۔علی امین گنڈاپور کا اتنا خوف ہے پتہ نہیں وہ کیا کرے گا۔
ان کا کہنا ہے کہ اس وقت سپریم کورٹ کے احکامات کی خلاف ورزی ہو رہی ہے۔ان حالات میں بھی الیکشن کمیشن کوئی کارروائی نہیں کررہا۔الیکشن کمیشن کی جانب سے ایک آرڈر بھی نظر نہیں آیا۔
انہوں نے کہا ہے کہ سندھ کی حالت انتہائی خطرناک ہو گئی ہے۔سندھ حکومت،آصف زرداری اور بلاول بھٹو کہاں ہے؟ملک کو اکٹھا کرنے کیلئے ضروری ہے کہ متفقہ لیڈر ہو۔سندھ میں جان بوجھ کر کشیدگی پھیلانے کی سازش کی جارہی ہے۔کسی بھی خدشے کو بے نقاب کرنے کیلئے تیار ہیں۔
ان کا کہنا ہے کہ اگر نوازشریف کے ساتھ زیادتی ہوئی ہے تورانا ثنااللہ کارروائی کریں۔تفتیش کروائی جائے کہ نواز شریف کو کس نے فارغ کیا تھا۔اسٹیبلشمنٹ پاکستان کی سیاست میں شامل نہیں ہے ۔مسٹر ایکس کے بارے میں جب عمران خان بتانا چاہیں بتا دیں گے۔

لاہور: (ویب ڈیسک) پی ٹی آئی رہنما ڈاکٹر یاسمین راشد نے ضمنی انتخابات میں پولنگ ایجنٹس کی تعیناتی سے متعلق الیکشن کمیشن کا فیصلہ چیلنج کر دیا، ڈاکٹر یاسمین راشد نے آج ہی درخواست پر سماعت کرنے کی استدعا بھی کردی۔
رہنما پاکستان تحریک انصاف ڈاکٹر یاسمین راشد نے ایڈووکیٹ عامر سعید راں کی وساطت سے لاہور ہائیکورٹ میں درخواست دائر کی ہے۔
درخواست میں موقف اپنایا گیا ہے کہ الیکشن کمیشن نے ضمنی الیکشن میں پولنگ ایجنٹس متعلقہ حلقے کے ہی تعینات کرنے کی ہدایت کی ہے جبکہ الیکشن کمیشن کا موقف غیر قانونی ہے، الیکشن کمیشن کے رولز کے تحت پولنگ ایجنٹس کا یونین کونسل سے ہونا ضروری نہیں، الیکشن کمیشن نے پولنگ ایجنٹس سے متعلق درخواست خارج کر دی۔
درخواست میں استدعا کی گئی ہے کہ الیکشن کمیشن کا فیصلہ کالعدم قرار دیا جائے، عدالت الیکشن کمیشن کے احکامات کو کالعدم قرار دے۔

لاہور: (ویب ڈیسک) صوبائی الیکشن کمشنر سعید گل نے کہا ہے کہ الیکشن کمیشن مکمل غیر جانبدار ہے اور الزامات میں کوئی حقیقت نہیں، آئین اور قانون کے تحت کام کر رہے ہیں، تمام آراوز کے پاس پریذائیڈنگ افسران واٹس ایپ پر فارم 45 بھیجیں گے۔
لاہورمیں صوبائی الیکشن کمشنر سعید گل نے میڈیا سے گفتگو کرتے ہوئے کہا ہے ہم پہلے بھی الزامات کی تردید کرچکے ہیں ہم نے اپنا کام کرنا ہے وہ قانون کے مطابق کرتے رہیں گے، سیاسی جماعت اپنا کام کرے، تمام آراوز کے کیمپ آفس سے پریزائیڈنگ آفیسر سامان لے کر جائیں گے۔
سعید گل نے کہا کہ تمام پولنگ اسٹیشنز پر سامان لے جانے کے لیے سیکورٹی کی الگ الگ گاڑیاں ہیں، پولیس تعینات ہے اور رینجرز کیو آر ایف کی صورت میں موجود ہوگی۔
صوبائی الیکشن کمشنر نے مزید کہا کہ تمام نتائج کے لیے لاہورکے کیمپ آفس میں بڑی سکرین لگائی گئی ہے، ہم مکمل طور پر غیر جانبداری سے کام کر رہے ہیں، ہمارے اوپر جو الزامات لگائے جا رہے ہیں اس میں کوئی حقیقت نہیں ہے۔

اسلام آباد: (ویب ڈیسک) ‎وزیر داخلہ رانا ثناء اللہ نے عمران خان اور پی ٹی آئی کو کل ضمنی الیکشن میں دنگا فساد سے باز رہنے کی وارننگ دے دی۔
رانا ثناء اللہ نے کہا ہے کہ ‎عمران خان الیکشن ہار چکے، اب عوام سے لڑنے کی تیاری کر رہےہیں، ڈسکہ الیکشن والی کوئی حرکت ہوئی تو قانون حرکت میں آئے گا، صاف شفاف اور پر امن انتخابات کو یقینی بنائیں گے۔
وزیر داخلہ نے کہا کہ ‎اطلاع ملی ہے پی ٹی آئی کے 500 سے زائد فسادی ضمنی الیکشن میں فسادی ارادے سے پنجاب پہنچائے گئے ہیں، ‎حلقے سے باہر کے پولنگ ایجنٹ لگانے کی درخواست اسی سازش کا حصہ تھی، ‎خیبر پختونخواہ کے بھائیوں کو پنجاب کے بھائیوں سے لڑانے کا پلان ہے۔
انہوں نے کہا کہ ‎پرویز خٹک، اسد قیصر علی محمد خان اور مراد سعید ان فسادیوں کو شیلٹر دے رہے ہیں، الیکشن کمیشن کے احکامات اور قانون کو توڑنے والوں کو قانون کی گرفت کا سامنا کرنا پڑے گا، ‎پی ٹی آئی ٹائیگرز سے غنڈہ گردی کرائی گئی تو نتائج کا ذمہ دار عمران نیازی ہوگا۔
‎رانا ثناء اللہ کا مزید کہنا تھا کہ چار سال اقتدار میں عوام کو لوٹنے والوں کو 20 حلقوں کے عوام کا مینڈیٹ لوٹنے نہیں دیں گے، عمران کی سیاست کا جنازہ نکل چکا ہے، 17 جولائی کو 20 حلقوں میں ووٹ کے ذریعے عوام تدفین کی رسم ادا کریں گے۔

لاہور: (ویب ڈیسک) احتساب عدالت نے آشیانہ ریفرنس میں وزیر اعظم شہباز شریف اور رمضان شوگر مل ریفرنس میں وزیر اعلی حمزہ شہباز کی ایک روز کی حاضری معافی کی درخواست منظور کر لی، عدالت نے آئندہ سماعت 13 اگست کو گواہوں کو طلب کر لیا ہے۔
وزیر اعظم شہباز شریف اور حمزہ شہباز دو مختلف ریفرنسز میں احتساب عدالت پیش نہیں ہوئے، آشیانہ ریفرنس میں وزیر اعظم شہباز کی حاضری معافی کی درخواست جمع کرائی گئی جسے عدالت نے منظور کر لیا۔
دوسری طرف رمضان شوگر ملز ریفرنس میں حمزہ شہباز کی جانب سے حاضری معافی کی درخواست دائر کی گئی جس میں موقف اختیار کیا گیا حمزہ شہباز نے مون سون کے پیش نظر میٹنگ کی سربراہی کرنی ہے اس لیے عدالت پیش نہیں ہو سکتے۔
احتساب عدالت نے رمضان شوگر مل ریفرنس میں حمزہ شہباز کی ایک روز کی حاضری معافی کی درخواست منظور کر لی۔
واضح رہے کہ رمضان شوگر مل ریفرنس میں عدالت شہباز شریف کو پہلے ہی مستقل حاضری معافی دے چکی ہے، عدالت نے آشیانہ ریفرنس اور رمضان شوگر ریفرنس پر سماعت 13 اگست تک ملتوی کردی۔

راولپنڈی: (ویب ڈیسک) سابق وزیر داخلہ و سربراہ عوامی مسلم لیگ شیخ رشید نے کہا ہے کہ کل کا دن بہت اہم ہے، ملکی تاریخ میں ایسا الیکشن کبھی نہیں دیکھا،اسٹیبلشمنٹ سے گزارش ہے وہ ضمنی انتخابات سے د ور رہے۔
تفصیلات کے مطابق سابق وزیر داخلہ نے ویڈیو بیان جاری کرتے ہوئے کہا ہے کہ اٹک کی عدالت نے 8 تاریخ دی ہے، اتنے جھوٹے کیس بنائے ہیں کہ ہر روز ایک عدالت میں پیش ہونا پڑتا ہے۔
انہوں نے کہا کہ اسٹیبلشمنٹ سے آج ایک اہم بات کرنا چاہتا ہوں، کل کا دن بہت اہم ہے، پاکستانی تاریخ میں ایسا الیکشن کبھی نہیں دیکھا، اسٹیبلشمنٹ سے گزارش ہے وہ الیکشن سےدور رہیں، کسی قسم کی دھاندلی، غنڈہ گردی، دھونس قوم برداشت نہیں کرےگی۔
شیخ رشید نے ویڈیو بیان میں مزید کہا کہ کل کے الیکشن میں اسٹیبلشمنٹ نے ثابت کرنا ہے کہ وہ غیر جانبدار ہیں، عمران خان پر آرٹیکل 6 لگانے والےعقل کے اندھے ہیں، یہ سپریم کورٹ کا اضافی فیصلہ ہے، ان کے پاس عقل کی کمی ہے جودو، دو یا ایک ایک ووٹ سے قوم پرمسلط کیےگئے۔
سابق وزیر داخلہ کا مزید کہنا تھا کہ اگر کل قوم عمران خان کوووٹ دیتی ہے تو اسکا راستہ نہ روکا جائے، اگرعوام کا راستہ روکا گیا تو ملک میں ایسی چنگاری نکلے گی ایسی آگ پھیلےگی جو سب کولپیٹ میں لے گی، کل کا دن پاکستان کے سیاسی استحکام کے امتحان کا دن ہے، پاکستان کےسیاسی استحکام کے دن عوام کو فیصلہ کرنا چاہیے، کسی کومداخلت نہیں کرنی چاہیے۔