کراچی : (ویب ڈیسک) پاکستان ریلوے کی ٹرینیں اپنے شیڈول سے ایک بار پھر آوٹ ہو گئیں اور کئی ٹرینیں گھنٹوں تاخیر کا شکار ہیں۔
کراچی سے لاہور آنے والی پاک بزنس ایکسپریس 9 گھنٹے اور کراچی سے لاہور آنے والی علامہ اقبال ایکسپریس 6 گھنٹے تاخیر جب کہ کراچی سے براستہ لاہور پشاور جانے والی خیبر میل 6 گھنٹے تاخیر کا شکار ہے۔ترجمان ریلوے نے مزید ٹرینوں کی آمد و رفت کے حوالےسے بتایا کہ کراچی سے فیصل آباد کے لیے چلنے والی ملت ایکسپریس ساڑھے 5 گھنٹے جبکہ کراچی سے لاہور آنے والی قراقرم ایکسپریس ساڑھے 5 گھنٹے لیٹ ہے، اسی طرح کراچی سے براستہ فیصل آباد راولپنڈی جانے والی رحمان بابا ایکسپریس بھی 5 گھنٹے تاخیر کا شکار ہے۔
پاکستان ریلوے کے ترجمان نے مزید بتایا کہ کراچی سے لاہور آنے والی گرین لائن ایکسپریس اور کوئٹہ سے لاہور آنے والی جعفر ایکسپریس 3 گھنٹے تاخیر کا شکار ہیں۔ اس کے علاوہ پاکستان ایکسپریس، تیزگام ایکسپریس،کراچی ایکسپریس اور شاہ حسین ایکسپریس بھی تاخیر کا شکار ہیں۔

لاہور: (ویب ڈیسک) پاکستان تحریک انصاف (پی ٹی آئی) کے رہنما شہباز گل نے پنجاب کے ضمنی الیکشن میں دھاندلی کے آغاز کا الزام عائد کیا ہے۔
ٹوئٹر پر بیان جاری کرتے ہوئے شہباز گل نے کہا کہ مظفر گڑھ میں ہمارے امیدوار معظم جتوئی کے پولنگ ایجنٹس کو پولنگ اسٹیشن 44 اور 46 سے باہر نکال دیا گیا، معظم جتوئی کے پولنگ ایجنٹس کو خالی ڈبے اور بیلٹ پیپر چیک کرنے نہیں دیے گئے۔
انھوں نے لکھا کہ فارم 46 کی شفافیت ختم کر دی گئی، اب ہمیں پتہ نہیں اس پولنگ اسٹیشن پر کتنے جعلی ووٹ ڈالے جائیں گے، دھاندلی کا آغاز کر دیا گیا ہے۔
شہباز گل کے الزام پر الیکشن کمشنر پنجاب سعید گل نے ردعمل دیتے ہوئے کہا کہ مظفرگڑھ میں پولنگ اسٹیشنز سے پولنگ ایجنٹس کو باہر نکالنےکا الزام غلط ہے اور رہنما پی ٹی آئی شہباز گل کے الزامات بے بنیاد ہیں۔
انھوں نے کہا کہ خواتین پولنگ اسٹیشنز پر خواتین اور مرد پولنگ اسٹیشنز پر مرد پولنگ ایجنٹس بیٹھتےہیں، سیاسی جماعت کے تصدیق شدہ پولنگ ایجنٹ کو بیٹھنے کی اجازت ہے، بغیر تصدیق کے الزامات لگا کر پولنگ کا عمل متنازع نہ بنایا جائے۔
دوسری جانب ترجمان الیکشن کمیشن ہارون شنواری نے بھی شہباز گل کے الزام پر کہا کہ پولنگ اسٹیشن 44 پر پی ٹی آئی کے امیر بخش ڈیوٹی سر انجام دے رہے ہیں، ‏پولنگ اسٹیشن 46 پر تا حال پی ٹی آئی کی خاتون پولنگ ایجنٹ نہیں پہنچیں،صرف مجاز پولنگ ایجنٹ کو پولنگ اسٹیشن کے اندر آنے کی اجازت ہے، ‏آپ کی خبر غلط ہے۔

لاہور: (ویب ڈیسک) مسلم لیگ ق کے رہنما چودھری پرویز الہیٰ نے کہا ہے کہ عوام کا فیصلہ آنے کے بعد ن لیگ پنجاب میں قصہ پارینہ بن جائے گی۔
مسلم لیگ ق کے رہنما چودھری پرویز الہیٰ نے میڈیا سے گفتگو میں کہا کہ عمران خان کا ویژن اور انتھک محنت رنگ لائے گی جبکہ عمران خان کی قیادت میں ملک موجودہ چیلنجوں کا مقابلہ کر سکتا ہے۔
انہوں نے کہا کہ عمران خان نے جرات سے نااہل حکمرانوں کو للکار کر غریب عوام کی آواز بلند کی ہے۔ آج ظالموں اور متکبروں کا تختہ الٹ جائے گا اور پنجاب کے عوام لوٹوں اور ان کے خریداروں کو نشان عبرت بنا دیں گے۔
پرویز الہیٰ نے کہا کہ عوام پر پیٹرول اور گیس کے بم گرانے والی حکومت سے عوام حساب لیں گے اور ووٹ کی طاقت سے پنجاب کی غیر قانونی حکومت کا خاتمہ کر دیں گے۔ عوام کا فیصلہ آنے کی دیر ہے اور ن لیگ پنجاب میں قصہ پارینہ بن جائے گی۔
انہوں نے کہا کہ الیکشن کمیشن نے پارسائی کے دعوے تو بہت کیے ہیں لیکن آج اس کاامتحان ہے۔ تمام ملکی اور غیر ملکی سروے پی ٹی آئی کی کامیابی کی پیشگوئی کر چکے ہیں اور ہمارے کارکن نتائج ملنے تک پولنگ اسٹیشنوں کے باہر پہرہ دیں گے۔
رہنما مسلم لیگ ق نے کہا کہ حمزہ شہباز نے سپریم کورٹ میں جو کہا اس پر عمل نہیں کیا جبکہ شہبازشریف اور حمزہ شہباز نے نتائج چوری کرنے کی کوشش کی تو ردعمل کے خود ذمہ دار ہوں گے۔ ہوا کا رخ بدل چکا ہے اور ن لیگ کی کشتی ڈوب رہی ہے۔

اسلام آباد: (ویب ڈیسک) پاکستان تحریک انصاف (پی ٹی آئی) کے چیئرمین عمران خان نے کہا ہے کہ ہمارے کارکنان ہر طرح کے دباؤ اور ہراسانی کا مظاہرہ کر رہے ہیں۔
پی ٹی آئی چیئرمین عمران خان نے ضمنی انتخابات کے موقع پر سماجی رابطے کی ویب سائٹ ٹوئٹر پر لکھا کہ ہمارے ووٹرز بڑی تعداد میں باہر نکلے ہیں جبکہ پی ٹی آئی کارکن ہر طرح کے دباؤ اور ہرسانی کا مقابلہ کر رہے ہیں۔
انہوں نے کہا کہ میں چاہتا ہوں تمام ووٹرز خصوصاً خواتین باہر نکلیں اور اپنے حق کا استعمال کریں۔ یہ پاکستان کی خود مختاری اور حقیقی آزادی کا الیکشن ہے۔

ملتان: (ویب ڈیسک) پی ٹی آئی رہنما شاہ محمود قریشی کے پولنگ سٹیشن داخلے کے معاملے پر ریٹرننگ افسر نے نوٹس جاری کرنے کا عندیہ دے دیا۔
حلقہ پی پی 217 میں ضمنی الیکشن کے دوران سابق وزیرخارجہ شاہ محمود قریشی نے ٹھپے لگانے کا الزام عائد کیا تھا۔ معاملے کا نوٹس لیتے ہوئے ریٹرننگ آٖفیسر نے پریذائیڈنگ آفیسر سے پوچھ گچھ کی۔ انہوں نے پولنگ اسٹیشن پر موجود ووٹرز سے بھی استفسار کیا۔ ریٹرننگ آفیسر نے شاہ محمود قریشی سے بھی بات چیت کی تھی۔
بعد ازاں ریٹرننگ افسر نے موقف اختیار کیا کہ شاہ محمودقریشی بغیراتھارٹی کیسے نجی مقامات پر داخل ہو سکتے ہیں، وہ فیکٹری میں داخل ہوئے اور ٹھپے لگانے کا الزام عائد کیا۔ فیکٹری سے کوئی چیز نہیں ملی، شاہ محمود کو نوٹس جاری کر رہے ہیں۔

لاہور: (ویب ڈیسک) مظفرآباد کے نواحی علاقے نوسیری میں باراتیوں کی گاڑی بے قابو ہو کر نوسیری ڈیم میں جا گری۔ افسوسناک حادثے کے نتیجے میں 4 افراد جاں بحق اور 5 زخمی ہوگئے۔
مظفرآباد سے وادی نیلم جانے والی بارات میں شامل کار جس میں دلہا، دلہن اور 4 کم سن بچیوں سمیت کل 9 افراد سوار تھے، نوسیری میں چھکڑنکہ کے مقام پر حادثے کا شکار ہوئی۔ واقعہ کی اطلاع ملتے ہی ریسکیو ٹیمیں جائے حادثہ پر پہنچیں اور امدادی کاروائیوں کے نتیجے میں 4 بچیوں اور دلہے کو زخمی حالت میں قریبی ہسپتال منتقل کردیا ۔
افسوسناک حادثے میں دیگر 4 افراد جن میں تین خواتین سفینہ، آمنہ، شگفتہ اور ایک مرد ندیم زندگی کی بازی ہار بیٹھے۔ پولیس افسران کا کہنا ہے کہ تاحال حادثے کی وجہ معلوم نہیں ہوسکی تاہم ریسکیو آپریشن مکمل ہونے کے بعد حادثے کے اسباب اور وجوہات کے بارے تحقیقات کی جائیں گی۔