کراچی: (ویب ڈیسک) وزیر اطلاعات سندھ سعید غنی نے کہا ہے کہ حکومتی نالائقی اور نااہلی کی سزا عوام کو دی جا رہی ہے۔
سندھ کے وزیر اطلاعات سعید غنی نے پریس کانفرنس کرتے ہوئے کہا کہ کراچی کے لوگ بے روزگار ہو رہے ہیں گزشتہ 3 ماہ سے حکومت پیٹرولیم مصنوعات کی قیمتیں بڑھا رہی ہے۔
انہوں نے کہا کہ ایم کیو ایم والوں سے زیادہ غیرت مند تو پرویز خٹک نکلے جو اپنے صوبے میں گیس نہ ہونے پر بول پڑے۔ ان کراچی کے نام نہاد ٹھیکیداروں ایم کیوایم کو شرم نہ آئی کے کراچی میں گیس نہ ہونے پر بولتے۔
سعید غنی نے کہا کہ چینی اور پیٹرول بحران اس حکومت نے پیدا کیا، نیپرا نے جنوری کی بجلی بلوں میں اضافہ کیا کہ تیل سے بجلی بنائی جا رہی ہے جو مہنگی پڑتی ہے۔آپ کی فصلیں تباہ ہورہی ہیں اور گندم کی فصل متاثر ہونے کا مطلب یہ ہے کہ آٹے کا بحران ایک مرتبہ پھر پیدا ہو گا۔
انہوں نے کہا کہ ایل این جی میں کرپشن ہوئی اور گیس بحران سب کے سامنے ہے۔ ایل این جی بروقت نہ منگوانے کی سزاعوام کو کیوں دی جارہی ہے؟ یہاں حکومتی نالائقی اور نااہلی کی سزاعوام کو دی جا رہی ہے، ادویات کی قیمتوں میں بھی بدستور اضافہ ہو رہا ہے اور ملک میں گیس کا بحران ہے صنعتوں کو گیس نہیں مل رہی۔
صوبائی وزیر اطلاعات نے کہا کہ جب نیپرا نے بجلی کی قیمتوں میں اضافے کی منظوری دی تو دو اراکین نے اختلاف کیا۔ پورے ملک میں کسانوں کو کھاد نہیں مل رہی۔ عوام کے حقوق کی بات کرنے والی جماعتیں خاموش ہیں، بجلی، گیس، یوریا، چینی، گندم بحران پر ایک لفظ بھی ان کے منہ سے نہیں نکلا۔

اسلام آباد: (ویب ڈیسک) وزیراعظم سٹیزن پورٹل عوام کی آواز بن گیا۔ سائل ظہور احمد کے 6 ماہ سے پھنسے کیس کو ایک ماہ میں حل کرا دیا۔
وزیراعظم سٹیزن پورٹل پر عوام کے مسائل کا تیزی سے حل، تحریک انصاف کی حکومت کی ترجیح سٹیزن پورٹل نے واہ کینٹ کے رہائشی ظہور احمد کی دادرسی کر دی۔ سائل نے اپنے مرحوم باب کے واجبات کی ادائیگی نہ ہونے پر شکایت کی تھی۔ مرحوم منظور احمد نے اپنی زندگی میں واجبات کی وصولی کیلئے متعلقہ محکمے کو شکایت کی تھی۔
منظور احمد مرحوم کا بیٹا بھی والد کے واجبات کیلئے دفتروں کے چکر لگاتا رہا لیکن شنوائی نہ ہو سکی۔ سٹیزن پورٹل نے سائل کے 16 ماہ سے پھنسے کیس کو ایک ماہ میں حل کرا دیا۔ سٹیزن پورٹل کے ایکشن کے بعد سائل کے مرحوم باب کے تمام واجبات کی ادائیگی کرا دی۔ فوری مسئلہ حل ہونے پر سائل نے وزیراعظم عمران خان اور پی ایم ڈی یو کی ٹیم کا شکریہ ادا کیا۔

اسلام آباد: (ویب ڈیسک) ای وی ایم اور آئی ووٹنگ کے معاملے پر چیف الیکشن کمشنر نے وزیر اعظم عمران خان کو خط لکھ دیا۔ چیف الیکشن کمشنر نے پراجیکٹ مینجمنٹ یونٹ کیلئے جگہ اور عمارت مانگ لی۔
چیف الیکش کمشنر کی جانب سے وزیراعظم عمران خان کو لکھے گئے خط میں کہا گیا کہ انتخابی عمل میں ٹیکنالوجی کے استعمال کے لئے الیکشن کمیشن اقدامات اٹھا رہا ہے۔ چیف الیکشن کمشنر نے 4 مختلف عمارتوں کی تجاویز بھی خط میں بھجوائیں۔ جس میں کہا گیا کہ پاکستان اکیڈمی آف سائنسز کا گیسٹ روم بھی یونٹ بنانے کیلئے استعمال ہوسکتا ہے،ی سی ایس آئی کا گیسٹ ہاوس بھی الیکشن کمیشن کو دینے کی تجویز ہے، وزارت سائنس ٹیکنالوجی کا خالی فلور بھی الیکشن کمیشن کو فراہم کیا جاسکتا، سرسید میموریل سوسائٹی عمارت میں سے کوئی ایک فراہم کی جائے۔
خط میں مزید کہا گیا کہ یونٹ کے قیام کے لئے آئی ٹی پروفیشنلز کی بھرتیوں کا کام آخری مراحل میں ہے، آئی ٹی ٹیمز ای وی ایمز، آئی ووٹنگ اور انتخابی عمل میں ٹیکنالوجیز کے استعمال کے لئے کام کریں گے۔

اسلام آباد: (ویب ڈیسک) جعلی اکاونٹس کیسز میں آصف زرداری کےخلاف نیو یارک اپارٹمنٹس پر نیب انکوائری میں اسلام آباد کی احتساب عدالت نے آصف زرداری کی ضمانت منظوری کا تفصیلی فیصلہ جاری کر دیا۔
احتساب عدالت کے جج محمد بشیر نے آصف زرداری کو طبی بنیادوں پر ضمانت دی۔ عدالت نے قرار دیا کہ آصف زرداری کو صحت کے مسائل کی وجہ سے کیس میں مستقل ضمانت دی جاتی، آصف زرداری کے خلاف نیویارک پراپرٹی کیس انکوائری کے مرحلے میں ہے، نیب کا کیس میں آصف زرداری کے خلاف شواہد اکٹھے کرنا ابھی باقی ہے، نیب ٹھوس شواہد کی بنیاد پر آصف زرداری کی ضمانت منسوخی کی درخواست دے سکتا ہے۔
خیال رہے نیب کو آصف زرداری کے خلاف اثاثہ جات کی شکایات 2018 اور 2019 میں موصول ہوئیں۔ نیب کو جے آئی ٹی رپورٹ اپریل 2019 میں موصول ہوئی، آصف زرداری دوسرے مقدمے میں گرفتار ہونے کے بعد دسمبر 2019 میں رہا ہوئے۔