کراچی: (ویب ڈیسک) پی ایس ایل 7 کے کراچی میں میچز کے لیے 25 فیصد تماشائیوں کو داخلے کی اجازت ہوگی۔
نیشنل کمانڈ اینڈ کنٹرول سینٹر (این سی اوسی ) کے فیصلے کے مطابق 27 جنوری سے شروع ہونے والی لیگ میں کراچی میں شیڈول ہر میچ میں 8 ہزار کے لگ بھگ تماشائیوں کونیشنل اسٹیڈیم میں داخلے کی اجازت ہوگی۔
فیصلوں کے مطابق اسٹیڈیم میں داخلے کے لیے سخت کوویڈ 19 پروٹوکولز بنائےگئے ہیں، پی سی بی کے تحت ایونٹ کا دوسرا مرحلہ 10 فروری سے قذافی اسٹیڈیم لاہور میں کھیلا جائے گا۔
لاہور میں شیڈول ایونٹ میں تماشائیوں کی تعداد سے متعلق فیصلہ بعد میں ہوگا، طے پایا ہے کہ میچز دیکھنے کے خواہش مند 12 سال سے زائد عمر کے تمام افراد کا مکمل ویکسینیٹڈ ہونا لازمی ہوگا۔
مزید برآں اسٹیڈیم کے داخلی دروازوں پر اپنا درست ویکسی نیشن سرٹیفکیٹ دکھانا لازمی ہوگا، ہر تماشائی اوراسٹیڈیم میں موجود فرد کو اپنے چہرے کو ماسک سےمسلسل ڈھانپے رکھنا لازم ہوگا۔
پی سی بی کے مطابق این سی او سی کی جانب سے کوویڈ 19 ہدایات کی خلاف ورزی کرنے والے شخص کو اسٹیڈیم سے باہر نکال دیا جائے گا، این سی او سی نے 25 فیصد تماشائیوں کو شرکت کی منظوری دے دی، لیگ کا پہلا مرحلہ 27 جنوری سے 7 فروری تک نیشنل اسٹیڈیم کراچی میں کھیلا جائے گا۔

لاہور: (ویب ڈیسک) پاکستانیوں کی بھابھی اور قومی ٹیم کے آل راؤنڈر شعیب ملک کی اہلیہ بھارتی ٹینس سٹارثانیہ مرزا نے ریٹائرمنٹ کا اعلان کردیا ہے۔
غیر ملکی میڈیا رپورٹس کے مطابق ریٹائرمنٹ کا اعلان آسٹریلین اوپن کے خواتین کے ڈبل ایونٹس کے پہلے راؤنڈ میں شکست کے بعد کرتے ہوئے بھارت کی ٹینس سٹار ثانیہ کہا ہے کہ سال2022 ان کا آخری سیزن ہوگا، میری فٹنس بھی کم ہورہی ہے۔
میچ میں شکست کے بعد میڈیا سے گفتگو کرتے ہوئے ٹینس سٹار کا کہنا تھا کہ ریٹائرمنٹ کا فیصلہ آسان نہیں تھا لیکن اس کی کچھ وجوہات ہیں، میرا بہت زیادہ سفرکرنا 3 سال کے بیٹے کے لئے اچھا نہیں ہے اوریہ میرے لئے بہت اہم بات ہے۔
ان کا مزید کہنا تھا کہ میں مستقبل کی تیاری کر رہی ہوں، لیکن یہ طے نہیں ہے کہ آگے پورا سیزن کھیل پاؤں گی یا نہیں، میری فٹنس بھی کم ہورہی ہے اورمجھے لگتا ہے کہ میری ریکوری میں لمبا عرصہ لگے گا۔
خیال رہے کہ ثانیہ مرزا 6 گرینڈ سلام ٹائٹل جیت چکی ہیں جبکہ وہ ڈبلیو ٹی اے کی ڈبلز رینکنگ میں ٹاپ پربھی رہ چکی ہیں۔ ثانیہ مرزا ڈبلیوٹی اے کی سنگل رینکنگ میں ٹاپ 30 میں شامل ہونے والی پہلی بھارتی کھلاڑی ہیں۔
بھارتی ٹینس سٹار نے پاکستان کرکٹ ٹیم کے آل راؤنڈر شعیب ملک سے شادی کی اور ان کا 3 سال کا بیٹا بھی ہے جس کا نام اذہان مرزا ملک ہے۔

سڈنی: (ویب ڈیسک) آسٹریلین اوپن ویمن سنگلز میں ایک اور اپ سیٹ ہو گیا اور 19 سالہ برطانیہ کی ایما راڈوکانو نے امریکی حریف سلونی سٹیفنز کو شکست دے دی۔
آسٹریلین اوپن ویمنز ٹینس کے سنگلز مقابلوں میں ایما نے سلونی کو دو ایک کی شکست سے دوچار کیا۔
اس سے پہلے سابق عالمی نمبر ایک سیمونا ہالیپ نے برتری کی دھاک بٹھا دی اور پولش حریف میگدالینا کو سٹریٹ سیٹس میں ہرا کر آؤٹ کر دیا،میچ کا سکور چھ چار اور چھ تین رہا ۔