لاہور: (ویب ڈیسک) جہانگیر ترین نے وزیر اعلیٰ پنجاب کے لیے حمزہ شہباز کی حمایت کرنے کا فیصلہ کر لیا۔
مسلم لیگ ن کے رہنما اسحاق ڈار نے دعویٰ کیا ہے کہ ترین گروپ اور مسلم لیگ ن کے معاملات طے پا گئے ہیں اور ترین گروپ وزیر اعلیٰ پنجاب کے لیے متحدہ اپوزیشن کے امیدوار حمزہ شہباز کی حمایت کریں گے۔
سوشل میڈیا پر جاری پیغام میں ن لیگ کے سینئر رہنما اسحاق ڈار نے کہا ہے کہ جہانگیز ترین سے بات چیت کا آخری راؤنڈ نتیجہ خیز رہا۔ انہوں نے متحدہ اپوزیشن کے امیدوار کی حمایت کرنے پر جہانگیر ترین اور ان کے گروپ کا شکریہ بھی ادا کیا ہے۔
یاد رہے کہ جہانگیر ترین کی مسلم لیگ ن کے رہنما اسحاق ڈار سے لندن میں طویل ملاقات ہوئی ہے جس میں ملکی سیاست کے حوالے سے بات چیت ہوئی اور مستقبل کے حوالے سے مختلف آپشنز پر غور کیا گیا۔
واضح رہے کہ وزیر اعلیٰ پنجاب کے لیے متحدہ اپوزیشن نے حمزہ شہباز جبکہ پی ٹی آئی نے اتحادی جماعت ق لیگ کے رہنما پرویز الہیٰ کو نامزد کیا ہے۔

لاہور: (ویب ڈیسک) رمضان المبارک کا چاند دیکھنے کے لیے رویت ہلال کمیٹی کا اجلاس آج پشاور میں ہوگا۔
چاند کی رویت کے لیے زونل کمیٹیوں کے اجلاس لاہور، کراچی، کوئٹہ، اسلام آباد میں ہوں گے۔
مرکزی رویت ہلال کمیٹی چاند دیکھنے اور شہادتوں کی بنیاد پر پہلے روزہ کا اعلان کرے گی۔
اجلاس میں وزارت مذہبی امور، محکمہ سپارکو کے نمائندے شریک ہوں گے۔
واضح رہے کہ سعودی عرب سمیت بیشتر خلیجی و مغربی ممالک میں آج پہلا روزہ ہے۔
عمان، ملیشیا، انڈونیشیا، پاکستان، بھارت، بنگلہ دیش و دیگر کچھ ممالک میں کل پہلا روزہ ہونے کا قومی امکان ہے۔

اسلام آباد: (ویب ڈیسک) آرمی چیف جنرل قمر جاوید باجوہ نے کہا کہ مقاصد کے حصول کیلئے امن ضروری ہے، شہریوں کی سلامتی اور معیشت اہم، عالمی برادری سے ملکر افغان عوام کی مدد کی، اس پر مزید کام کی ضرور ت ہے، آخری دہشتگرد کے خاتمے تک جدوجہد جاری رہے گی، بھارت کی جانب سے میزائل کا پاکستان میں گرنا باعث تشویش ہے۔
جامع سلامتی کے موضوع پر 2 روزہ اسلام آباد سکیورٹی ڈائیلاگ سے آرمی چیف جنرل قمر جاوید باجوہ نے خطاب کرتے ہوئے کہا کہ ڈائیلاگ کے انعقاد پر معید یوسف کو خراج تحسین پیش کرتا ہوں، پاکستان اہم اقتصادی خطے میں واقع ہے، خطے کو دہشتگردی، غربت، موسمیاتی تبدیلی جیسے چیلنجز کا سامنا ہے، خطے کی سکیورٹی اور استحکام ہماری پالیسی کا حصہ ہے، دہشتگردی کیخلاف مثالی کامیابیاں حاصل کیں، شہریوں کی خوشحالی اور سلامتی ہماری ترجیح ہے، ہمسایہ ممالک کیساتھ مل کر امن کیلئے کام کر رہے ہیں، امن و استحکام ترقی اور خوشحالی کیلئے بنیادی اہمیت رکھتے ہیں۔
آرمی چیف کا کہنا تھا کہ پاکستان خطے کے مسائل کو شراکت داری سے حل کرنے پر گامزن ہے، دہشتگردی کیخلاف مثالی کامیابیاں حاصل کیں، دہشتگردی کیخلاف 90 ہزار سے زائد جانوں کی قربانی دی، ہم نے بے شمار قربانیاں دے کر دہشتگردی پر قابو پایا، آخری دہشتگرد کے خاتمے تک کوشش جاری رکھیں گے، شہریوں کی خوشحالی اور سلامتی ہماری ترجیح ہے، ہمسایہ ممالک کیساتھ مل کر امن کیلئے کام کر رہے ہیں، امن و استحکام ترقی اور خوشحالی کیلئے بنیادی اہمیت رکھتے ہیں۔

لاہور: (ویب ڈیسک) سیکریٹری پنجاب اسمبلی محمد خان بھٹی نے کہا ہے کہ نئے وزیراعلی پنجاب کے انتخاب کیلئے ووٹنگ آج نہیں ہوگی، آج انتخاب کا شیڈول جاری ہوگا۔
دوسری جانب پنجاب اسمبلی کا نئے وزیر اعلی کے انتخاب کیلئے اجلاس کا آغاز آج ہوگا، وزیراعلی پنجاب کے کاغذات نامزدگی کیلئے امیدوار اپنے کاغذات آج جمع کرائیں گے۔ قائد ایوان کے انتخاب کیلئے اجلاس کا ایجنڈا اسمبلی سیکرٹریٹ نے جاری کر دیا۔
اسمبلی سیکرٹریٹ نے ایس او پیز برائے اسمبلی بزنس جاری کر دئیے۔ ایجنڈے کے تحت ارکان اسمبلی کے ساتھ مہمانوں کا داخلہ بند ہے، کوئی ممبر اپنا سیل فون ہاوس میں لے کر نہیں جائے گا، باہر سیکیورٹی کو جمع کرائے گا۔ خواتین ممبرز اپنا ہینڈنگ بیگ سیکیورٹی کو جمع کرائے ہاوس میں لے جانا منع ہے۔ قائد ایوان کے انتخاب کے دن ممبرز اپنا شناختی کارڈ اور اسمبلی کارڈ ہمراہ لائیں۔

اسلام آباد: (ویب ڈیسک) کورونا کی پانچویں لہر کے وار کم ہونے لگے۔ ملک میں چوبیس گھنٹے کے دوران کورونا وائرس سے ایک شخص جاں بحق ہوگیا، جس کے بعد اموات کی تعداد 30 ہزار 360 ہوگئی۔ پاکستان میں کورونا کے تصدیق شدہ کیسز کی تعداد 15 لاکھ 25 ہزار 181 ہوگئی۔
نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 280 نئے کیسز رپورٹ ہوئے، پنجاب میں 5 لاکھ 5 ہزار 87، سندھ میں 5 لاکھ 75 ہزار 473، خیبرپختونخوا میں 2 لاکھ 19 ہزار 81، بلوچستان میں 35 ہزار 475، گلگت بلتستان میں 11 ہزار 708، اسلام آباد میں ایک لاکھ 35 ہزار 83 جبکہ آزاد کشمیر میں 43 ہزار 274 کیسز رپورٹ ہوئے۔
ملک بھر میں اب تک 2 کروڑ 75 لاکھ 31 ہزار 61 افراد کے ٹیسٹ کئے گئے، گذشتہ 24 گھنٹوں کے دوران 29 ہزار 176 نئے ٹیسٹ کئے گئے، اب تک 14 لاکھ 85 ہزار 996 مریض صحتیاب ہوچکے ہیں جبکہ 374 مریضوں کی حالت تشویشناک ہے۔
پاکستان میں کورونا سے ایک دن میں ایک شخص جاں بحق ہوا، جس کے بعد وائرس سے مرنے والوں کی تعداد 30 ہزار 360 ہوگئی۔ پنجاب میں 13 ہزار 557، سندھ میں 8 ہزار 97، خیبرپختونخوا میں 6 ہزار 322، اسلام آباد میں ایک ہزار 23، بلوچستان میں 378، گلگت بلتستان میں 191 اور آزاد کشمیر میں 792 مریض جان سے ہاتھ دھو بیٹھے۔