وزیر اطلاعات فواد چوہدری نے کہا ہے کہ مسلم لیگ (ق) اور ایم کیو ایم سمیت تمام اتحادی جماعتیں پی ٹی آئی کا نہیں حکومت کا حصہ ہیں، ووٹنگ سے ایک گھنٹے پہلے تک آنے اور جانے کا سلسلہ جاری رہے گا۔
سپریم کورٹ کے باہر میڈیا سے گفتگو کرتے ہوئے انہوں نے کہا کہ کل کے جلسے میں شریک ہونے والے عوام کا شکریہ ادا کرتے ہوئے کہا کہ پاکستان کی تاریخ کا سب سے بڑا اجتماع کل اسلام آباد میں ہوا اور آپ نے دیکھا کہ کل اسلام آباد کے در و دیوار لرز گئے۔
ان کا کہنا تھا کہ پہلے میں نے کہا تھا کہ جو لوگ تحریک عدم اعتماد کی حمایت کر رہے ہیں ان کو 10 لاکھ عوام میں سے گزر کر جانا ہوگا، لیکن کل کے جلسے کے بعد میں کہتا ہوں انہیں 20 کروڑ عوام میں سے گزر کر جانا ہوگا۔
فواد چوہدری نے عمران خان کے خلاف تحریک عدم اعتماد کی سازش کا حصہ بنتے ہوئے ہمارے مقامی سیاسی رہنماؤں نے بساط بچھائی جن کا سرغنہ مے فیئر اپارٹمنٹ میں بیٹھا ہوا ہے یہ عمران خان کے خلاف نہیں پاکستان کے لوگوں کے خلاف ایک سازش ہے۔
ان کا کہنا تھا کہ یہ پاکستان کو مستقل غلامی میں دینا کا ایک منصوبہ ہے جس کی رہنمائی مولانا فضل الرحمٰن، آصف علی زرداری اور شہباز شریف کر رہے ہیں، ان کے تانے بانے لندن میں بیٹھے ایک شخص کے ہاتھ میں ہیں اور وہ شخص ایک عالمی اسٹیبلشمنٹ کے ساتھ مل کر یہ سازش کر رہا ہے۔
ان کا کہنا تھا کہ جس طرح قائد اعظم نے برصغیر کے لیے دو رخی لڑائی لڑی، ایک ہندوستان میں بیٹھے پروردہ لوگوں کی دوسری برطانوی اسٹیبلمشنٹ کے خلاف لڑائی لڑی اس ہی طرح عمران خان بھی غیر ملکی اسٹیبلشمنٹ اور کے پروردہ کے خلاف جنگ لڑ رہے ہیں۔
فواد چوہدری نے کہا کہ سپریم کورٹ میں زیر بحث معاملات میں اٹارنی جنرل صاحب نے نقطہ رکھا ہے کہ پاکستان ایک پارلیمانی نظام حکومت کا حامل ملک ہے۔
انہوں نے کہا کہ یہاں کی سیاسی جماعتیں اس نظام کا لازمی حصہ ہے اور اس میں آرٹیکل 63 بہت اہمیت رکھتا ہے، اگر ہر شخص پارٹی کے فیصلوں سے منحرف ہوکر پارٹی کے لیڈر کے پیٹھ میں چھوری گھونپ دے گا تو ہر وقت ہی منڈی لگی رہے گی۔
