اسلام آباد: (ویب ڈیسک) وزیراعلیٰ پنجاب سردار عثمان بزدار سے صوبائی وزیر رائے تیمور بھٹی، اراکین پنجاب اسمبلی تیمور لالی اور وارث عزیز نے ملاقات کی اور وزیراعلیٰ کی قیادت پر بھرپور اعتماد کا اظہار کیا۔
وزیراعلیٰ پنجاب سردار عثمان بزدار سے ملاقات میں سیاسی امور اور ترقیاتی منصوبوں کے بارے میں گفتگو ہوئی۔ وزیراعلی کا کہنا تھا کہ ترقی مخالف عناصر پراپیگنڈا کے ذریعے عوام کو گمراہ نہیں کرسکتے۔ ہم عوام کی خدمت کر رہے ہیں اور مخالفین بے بنیاد الزامات کی سیاست میں مصروف ہیں۔ ملک کو استحکام کی ضرورت ہے، انتشار کی نہیں۔ موجودہ حالات میں اپوزیشن جماعتیں ڈیڑھ انچ کی مسجد بنا کر منفی سیاست کر رہی ہیں۔
انہوں نے کہا کہ وزیراعظم عمران خان کی قیادت میں ہم سب متحد ہیں، عمران خان نے قوم کو عزت سے جینا سکھایا ہے۔ پوری قوم وزیراعظم عمران خان کے پیچھے کھڑی ہے۔ چیف وہپ پنجاب اسمبلی ایم پی اے سید عباس علی شاہ بھی اس موقع پر موجود تھے۔

اسلام آباد: (ویب ڈیسک) قومی اسمبلی اجلاس کا آج دن گیارہ بجے آغاز ہو رہا ہے، اجلاس میں وزیر اعظم عمران خان کے خلاف اپوزیشن کی تحریک عدم اعتماد زیر غور لائی جائے گی۔
قومی اسمبلی کے آج ہونے والے اجلاس کا 15 نکاتی ایجنڈا جاری کر دیا گیا ہے جس کے مطابق تحریک عدم اعتماد کی قرارداد 152 ارکان کی جانب سے پیش کی جائے گی۔
تحریک کے محرکین میں 147 ارکان شامل ہیں، وزیراعظم کے خلاف آرٹیکل 95 اے کے تحت تحریک عدم اعتماد پیش کی جائے گی، اپوزیشن کی قرارداد میں کہا گیا ہے کہ ایوان کی رائے ہے وزیر اعظم عمران خان ایوان کا اعتماد کھو چکے ہیں، لہٰذا انہیں عہدے سے ہٹا دیا جائے۔
دوسری جانب قومی اسمبلی سیکرٹریٹ نے ایم این ایز کے نام ہدایت نامہ جاری کیا ہے جس کے مطابق قومی اسمبلی اجلاس میں ارکان کی گاڑی میں آمد پر پابندی عائد کی گئی ہے، ایم این ایز کو شٹل سروس کے ذریعے پارلیمنٹ ہاؤس پہنچایا جائے گا۔
ہدایت نامہ میں کہا گیا کہ اراکین پارلیمنٹ مخصوص پارکنگ میں گاڑی کھڑی کرنے کے پابند ہونگے، قومی اسمبلی سیشن میں مہمانوں کے داخلے پابندی ہو گی، قومی اسمبلی سیکرٹریٹ نے اپنے ملازمین پر بھی پابندی عائدکردی ہے۔
سرکلر کے مطابق ملازمین اپنے دفاتر سے غیر ضروری باہر نہ نکلیں، بلاجواز پارلیمنٹ ہاؤس میں ادھر ادھر پھرتے پائے گئے ملازمین کے خلاف انضباطی کارروائی کی جائے گی۔

اسلام آباد: (ویب ڈیسک) اپوزیشن قیادت نے بڑا فیصلہ کر لیا، قومی اسمبلی اجلاس میں پاکستان تحریک انصاف (پی ٹی آئی) کے رکن خیال زمان کی وفات پر فاتحہ خوانی کی روایت برقرار رکھی جائے گی، شہباز شریف اور مولانا فضل الرحمان سے آصف زرداری اور بلاول بھٹو کی ملاقات میں تحریک عدم اعتماد پر مشاورت کی گئی۔
ذرائع کے مطابق پاکستان مسلم لیگ (ن) کے صدر اور قومی اسمبلی میں قائد حزب اختلاف شہباز شریف، پی ڈی ایم کے سربراہ مولانا فضل الرحمان سے آصف زرداری اور بلاول بھٹو کی ملاقات ہوئی ہے جس میں فیصلہ کیا گیا کہ پی ٹی آئی رکن خیال زمان کی وفات پر فاتحہ خوانی کی روایت برقرار رکھی جائے گی، فاتحہ خوانی کے بعد اپوزیشن کی تحریک عدم اعتماد کی قرارداد پیش ہوگی۔
اس حوالے سے ذرائع کا مزید بتانا تھا کہ اپوزیشن کی جانب سے قائد حزب اختلاف شہباز شریف عدم اعتماد کی قرارداد پیش کریں گے، اپوزیشن کے 162 میں سے 161 ارکان پورے کرنے کی ذمہ داری تمام جماعتوں کے سربراہوں پر ہوگی، اپوزیشن کا ایک رکن علی وزیر جیل میں ہے۔
ذرائع کا کہنا ہے کہ علی وزیر کی اجلاس میں شرکت کیلئے پروڈکشن آرڈر جاری نہیں کئے گئے، اپوزیشن کی جانب سے علی وزیر کے پروڈکشن آرڈر کیلئے سپیکر کو درخواست دی جائے گی۔
ذرائع کے مطابق قومی اسمبلی میں قائد حزب اختلاف شہباز شریف کی صدارت میں اپوزیشن رہنماؤں کا اہم اجلاس ہوا، اجلاس میں بلاول بھٹو ، آصف علی زرداری، مولانا فضل الرحمان، شاہد خاقان عباسی، احسن اقبال، سعد رفیق، خواجہ آصف ودیگر شریک ہوئے۔
آصف علی زرداری اور بلاول بھٹو زرداری کے ہمراہ شیری رحمان اور رخسانہ بنگش بھی موجود تھیں، آصف علی زرداری، بلاول بھٹو زرداری، شہباز شریف اور مولانا فضل الرحمان کے درمیان تحریک عدم اعتماد اور اسمبلی اجلاس سے متعلق حکمت عملی پر غور کیا گیا۔
ادھر متحدہ اپوزیشن نے پارلیمانی اجلاس کل صبح طلب کرلیا ہے، اپوزیشن ارکان اسمبلی کا اجلاس صبح 10 بجے پارلیمنٹ میں ہو گا، میٹنگ میں قومی اسمبلی اجلاس بارے حکمت عملی مرتب دی جائے گی، حکومت اور سپیکر کیخلاف ممکنہ احتجاج بارے مشاورت بھی ہو گی۔

اسلام آباد: (ویب ڈیسک) قومی اسمبلی کےکل ہونے والے اجلاس کا ایجنڈا جاری کردیا گیا ہے جس میں وزیراعظم عمران خان کے خلاف تحریک عدم اعتماد بھی شامل ہے۔
قومی اسمبلی کےکل کے اجلاس کا 15 نکاتی ایجنڈا جاری کیا گیا ہے جس میں وزیراعظم کے خلاف تحریک عدم اعتماد بھی شامل کی گئی ہے۔
ایجنڈے میں کہا گیا ہے کہ ایوان کی رائے ہےکہ وزیر اعظم عمران خان ایوان کا اعتماد کھو چکے ہیں، اپوزیشن کی قرارداد ہےکہ وزیر اعظم ایوان کا اعتماد کھوچکےلہٰذا انہیں عہدے سے ہٹا دیاجائے۔
خیال رہے کہ اس سے قبل اسپیکر قومی اسمبلی نے اسمبلی کا اجلاس 25 مارچ کو طلب کیا تھا تاہم اسمبلی سیکرٹریٹ کی جانب سے اجلاس کا ایجنڈا جاری نہیں کیا گیا تھا جس پر اپوزیشن کی جانب سے تنقید کی جارہی تھی۔
قومی اسمبلی کا اجلاس 25 مارچ بروز جمعہ صبح 11 بجے پارلیمنٹ ہاؤس میں ہوگا، اجلاس اپوزیشن کی جانب سے جمع کرائی گئی ریکوزیشن پر طلب کیا گیا ہے۔

راولپنڈی: (ویب ڈیسک) سیکیورٹی فورسز نے دہشت گردوں کی افغانستان سے پاکستان داخل ہونے کی کوشش ناکام بنا دی۔
پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے 23 اور 24 مارچ کی درمیانی شب شمالی وزیرستان حسن خیل سے پاکستان میں داخلے کی کوشش کی جسے سیکیورٹی فورسز نے فوری کارروائی کر کے ناکام بنا دیا۔
آئی ایس پی آر کے مطابق دہشتگردوں سے فائرنگ کے تبادلے میں 4 جوان مادر وطن پر قربان ہو گئے۔ سیکیورٹی فورسز نے دہشتگردوں کی جوابی فائرنگ کا بھرپور جواب دیا ، ناکامی پر دہشت گردوں نے راہ فرار اختیار کر لی۔
انٹیلی جنس اطلاعات کے مطابق دہشت گردوں کو بھاری جانی نقصان اٹھانا پڑا ہے۔
آئی ایس پی آر کے مطابق شہدا میں لانس حوالدار وجاہت عالم، شیخوپورہ کے رہائشی 25 سالہ سپاہی سجاد عنایت، سپاہی مقبول اورا سکردو کے رہائشی 22سالہ سپاہی سجاد علی بھی شامل ہیں۔
آئی ایس پی آر کے مطابق پاک فوج دہشتگردی کے جڑ سے خاتمے کے لیے پرعزم ہے، بہادر جوانوں کی مادر وطن کیلئے قربانیاں ہمارے عزم کو مزید مضبوط کرتی ہیں۔