لاہور( آن لائن ) قومی کرکٹ ٹیم کے سابق لیگ اسپنر عبدالقادر نے شاہد آفریدی اور جاوید میانداد کے درمیان تلخ کلامی کو قومی کرکٹ کیلئے نقصان دہ اور افسوسناک قرار دیا ہے ۔ اپنے ایک بیان میں عبدالقادر نے کہا کہ جاوید میانداد شاہد آفریدی کے سینئر ہیں آفریدی کو اس طرح جواب نہیں دینا چاہیے تھا میاں داد کو بھی ایسا بیان نہیں دینا چاہیے تھا انہوں نے پاکستان کرکٹ بورڈ سے مطالبہ کیا کہ شاہد آفریدی پر لگائے جانے والے الزامات کی تحقیقات کرکے حقائق سامنے لائے کیونکہ ان کے پورے کیریئر میں ان پر ایسے کوئی الزامات نہیں لگے جاوید میانداد کو دیکھنا چاہیے تھا کہ آفریدی ان کے بہت جونیئر ہیں آفریدی کو بھی سوچنا چاہیے کہ میاں داد ان سے بہت سینئر ہیں اور سینئر کی عزت اور احترام جونیئرز پر لازم ہوتا ہے ۔
