لاہور (سپورٹس رپورٹر ) چئیرمین ایگزیکٹو کمیٹی نجم سیٹھی نے کہا ہے کہ پی ایس ایل سیزن ٹو کے لاہور میں فائنل کے لئے پاک فوج نے بھرپور سکیورٹی دینے کی یقین دہانی کرادی ہے اور انشااللہ پی ایس ایل کے لاہور میں فائنل سے پاکستان میں انٹرنشنل کرکٹ کی بحالی کا دروازہ کھلے گا ۔ قذافی سٹیڈیم میں میڈیا سے بات کرتے ہوئے نجم سیٹھی کا کہنا تھا کہ کراچی کے کورکمانڈر نے بھی مجھے یقین دلایا تھا کہ آپ پی ایس ایل کراچی میں رکھیں ہم بھرپورسکیورٹی دینگے۔ ہم کرکٹ کھیلنا چاہتے ہیں ۔ کرکٹ سے بڑا امن کا سفیر کوئی نہیں ہوسکتا ۔ میں یو اے ای میں رہنے والے پاکستانیوں سے بھی اپیل کرتا ہوں کہ وہ پی ایس ایل میں سٹیڈیمز کو بھریں تاکہ پاکستان کرکٹ کامیاب ہو۔ پاکستان کرکٹ بورڈ اسوقت چند کرکٹ بورڈز سے رابطے میں ہے اور اگر پاکستان سپر لیگ کا فائنل لاہور میں ہوجاتا ہے تو پھر ان غیرملکی ٹیموں کے ساتھ ایک ٹورنامنٹ لاہور یا کراچی میں کرائیں گے جہاں سکیورٹی بہتر ہے ۔
