اسلام آباد، ملتان(نیوز ایجنسیاں ، خبر نگار ) پاکستان کی قائدانہ صلاحیتوں کا عالمی سطح پر اعتراف ، وزیر اعظم شہباز شریف اور فیلڈ مارشل عاصم منیر مسلم دنیا کی 500 بااثر شخصیات کی فہرست میں پہلے نمبر آگئے ۔ اردن کے رائل اسلامک اسٹریٹجک اسٹڈیز سینٹر نے مسلم دنیا کی 500 بااثر شخصیات کی فہرست جاری کر دی ، جس میں وزیراعظم پاکستان شہباز شریف اور فیلڈ مارشل عاصم منیر کو مشترکہ طور پر پہلی پوزیشن دی گئی ہے۔جاری فہرست کے مطابق سعودی فرمانروا شاہ سلمان بن عبدالعزیز اور ولی عہد محمد بن سلمان بھی مشترکہ طور پر پہلے نمبر پر ہیں، فہرست میں پہلی مرتبہ پانچ شخصیات کو مشترکہ طور پر پہلی پوزیشن کیلئے منتخب کیا گیا ہے۔ترک صدر رجب طیب اردوان بھی مسلم دنیا کی پانچ بااثر ترین شخصیات میں شامل ہیں، جبکہ ایران کے سپریم لیڈر آیت اللہ مجتبیٰ خامنہ ای فہرست میں چوتھے نمبر پر ہیں، اردن کے شاہ عبداللہ دوم نے پانچویں اور قطر کے امیر شیخ تمیم بن حمد آل ثانی نے چھٹی پوزیشن حاصل کی ہے۔متحدہ عرب امارات کے صدر شیخ محمد بن زاید، ملائیشیا کے وزیراعظم انور ابراہیم اور مراکش کے شاہ محمد ششم بھی بااثر مسلم شخصیات کی فہرست میں شامل ہیں، انڈونیشیا کے صدر پرابووو سوبیانتو، مصر کے صدر عبدالفتاح السیسی، فلسطینی صدر محمود عباس اور شام کے صدر احمد الشرع کو بھی فہرست میں جگہ دی گئی ہے۔پاکستان سے معروف عالم دین مفتی محمد تقی عثمانی اور مولانا طارق جمیل بھی 500 بااثر شخصیات میں شامل ہیں، فہرست میں غزہ کے کمال عدوان ہسپتال کے سابق سربراہ ڈاکٹر حسام ابو صفیہ کو سال کی نمایاں مرد شخصیت قرار دیا گیا ہے، جبکہ ایران کے شہر میناب میں سکول پر حملے میں بچ جانے والی طالبہ فاطمہ زہرا شیخ آبادی سال کی نمایاں خاتون شخصیت قرار پائی ہیں۔صدر مملکت آصف علی زرداری نے وزیراعظم شہباز شریف اور فیلڈ مارشل عاصم منیر کو دنیا کے 500 بااثر ترین مسلمانوں کی فہرست میں شامل ہونے پر مبارک دے دی ہے۔سماجی رابطے کی ویب سائٹ ایکس پر جاری پیغام میں صدر مملکت آصف علی زرداری نے بتایا کہ وزیراعظم شہباز شریف اور فیلڈ مارشل عاصم منیر کو اردن کے رائل اسلامک اسٹریٹجک اسٹڈیز سینٹر کی جانب سے جاری دنیا کے 500 بااثر مسلمانوں کی فہرست میں شامل کرنے پر دل کی گہرائیوں سے مبارک باد دیتا ہوں۔انہوں نے کہا کہ یہ ہر پاکستانی کے لیے فخر اور انتہائی مسرت کا موقع ہے اور یہ اعزاز دونوں رہنماؤں کی قیادت اور قومی خدمات کا اعتراف ہے۔صدر مملکت نے کہا کہ پاکستان استحکام، مضبوطی اور عالمی سطح پر بلند تر مقام کی جانب گامزن ہے اور عالم اسلام میں پاکستان کی آواز پہلے سے زیادہ مضبوطی سے گونج رہی ہے۔قبل ازیں چیئرمین سینیٹ سید یوسف رضا گیلانی نے وزیراعظم محمد شہباز شریف اور چیف آف ڈیفنس فورسز فیلڈ مارشل سید عاصم منیر کو مبارکباد دی ہے اور انہیں خراجِ تحسین پیش کیا ہے۔ دونوں رہنما دنیا کی 500 بااثر ترین مسلم شخصیات میں مشترکہ طور پر سرفہرست قرار پائے ہیں۔ یہ فہرست "دی مسلم 500” کے نام سے ہر سال اردن کا رائل اسلامک سٹریٹجک سٹڈیز سینٹر جاری کرتا ہے، جسے عالمِ اسلام کے مستند اور معتبر تحقیقی اداروں میں شمار کیا جاتا ہے ۔اپنے پیغام میں چیئرمین سینیٹ نے کہا کہ یہ لمحہ پوری قوم کے لیے باعثِ مسرت ہے۔ انہوں نے کہا کہ ایک ایسے ادارے کی جانب سے یہ پذیرائی، جس کی رائے کو دنیا بھر میں معتبر تسلیم کیا جاتا ہے، اس بات کا ثبوت ہے کہ پاکستان کی آواز آج عالمی سطح پر توجہ سے سنی جاتی ہے۔ سید یوسف رضا گیلانی نے کہا کہ یہ اعزاز سیاسی اور عسکری قیادت کی مشترکہ جدوجہد کا اعتراف ہے۔ وزیراعظم شہباز شریف اور فیلڈ مارشل سید عاصم منیر نے ایک سوچ اور ایک مقصد کے ساتھ ملک کی رہنمائی کی۔ اسی اتحاد کی بدولت پاکستان نے جنگ میں فتح حاصل کی اور سفارت کاری کے میدان میں بھی ایک ذمہ دار ملک کے طور پر اپنا لوہا منوایا۔ چیئرمین سینیٹ نے کہا کہ آج پاکستان کو دنیا بھر میں عزت اور وقار کی نگاہ سے دیکھا جاتا ہے۔ یہ مقام آسانی سے حاصل نہیں ہوا۔ اس کے پیچھے ہمارے شہداء کی قربانیاں، افواجِ پاکستان کی بہادری اور عوام کا غیر متزلزل عزم شامل ہے۔ آخر میں سید یوسف رضا گیلانی نے کہا کہ پارلیمان ملک کی ترقی اور استحکام کے لیے قیادت کے شانہ بشانہ کھڑی ہے، اور دعا کی کہ اللہ تعالیٰ پاکستان کو ہمیشہ سربلند رکھے، آمین
بااثر شخصیات
پاکستان کا قائدانہ کردار دنیا معترف وزیر اعظم شہباز شریف اور فیلڈ مارشل عاصم منیر مسلم دنیا کی سب سے با اثر شخصیات قرار

