بینجمن سسٹرز جب نئی نئی گلوکاری کی دنیا میں آئیں تب عطاءاللہ عیسیٰ خیلوی کی کیسٹوں نے میانوالی کی بسوں میں خاصی دھوم مچا رکھی تھی مگر ٹی وی والے ان کی پذیرائی نہیں کررہے۔ پھر ایسا ہوا کہ 1985ءمیں الحمرا ہال میں بینجمن سسٹرز اور عطاءاللہ عیسیٰ خیلوی کا ایک گرینڈ موزیکل شو ہوا جس کا ٹکٹ اس زمانے میں ایک ہزار روپے کا تھا۔ دیکھنے والوں نے دیکھا کہ اس شو کو بینجمن سسٹرز کے پرستاروں سے زیادہ عطاءاللہ عیسیٰ خیلوی کے پرستار دیکھنے آئے اور شو کی مقبولیت دیکھ کر ٹی وی والوں کو بھی خیال آگیا اور انہوں نے عطاءاللہ عیسیٰ خیلوی کو کالی قمیض سمیت چھوٹی سکرین پر پہنچا دیا۔ میانوالی کی بسوں میں کیسٹوں سے لے کر ٹی وی سٹیشن تک پہنچنے کا یہ طویل سفر انہوں نے تیس برس میں طے کیا تھا۔ لالہ عطاءاللہ کو جب یہ واقعہ یاد دلا یا گیا تو وہ کہنے لگے جناب ثقافتی اداروں میں جو لوگ بیٹھے ہیں انہیں لال پیلی نیلی پریاں اچھی لگتی ہیں ان کے طفیل مجھ جیسے گائیکی کے مزدور کو بھی ٹی وی پر جگہ ملی گئی۔
