اسلام آباد(ویب ڈیسک)وزیراعظم کے مشیر برائے قومی سلامتی ناصر جنجوعہ نے کہا ہے کہ بھارت چین کو روکنے کی تیاروں میں مصروف ہے، امریکہ کا بھارت سے لاجسٹک اور میری ٹائم معاہدہ خطرے کی گھنٹی ہے ، مغربی محاذ ہرصورت بند کرنا ہوگا ،قومی سلامتی کے تناظر میں میری ٹائم سکیورٹی اہمیت کی حامل ہے ۔ میڈیا رپورٹس کے مطابق بحر ہند میں سکیورٹی چیلنجز سے متعلق ایک روزہ قومی کانفرنس سے خطاب کرتے ہوئے ناصر خان جنجوعہ نے کہا کہ کہ میری ٹائم سکیورٹی کا تصور اہمیت کا حامل ہے اور یہ مزید بہتر ہو رہا ہے۔ انہوں نے کہاکہ میری ٹائم سکیورٹی دنیا بھر کے دریاں اور سمندروں سے منسلک ہے اور اس کے اہم جز سمندر، گورننس اور سلامتی ہیں جبکہ یہ سکیورٹی مستقبل کے سنہرے مواقع بھی فراہم کرتی ہے۔انہوں نے کہا کہ بھارت چین کو روکنے کی تیاریوں میں مصروف ہے ۔ بھارت اور امریکہ بڑے دفاعی شراکت دار کے طور پر ابھرے ہیں جبکہ امریکہ کا بھارت سے لاجسٹک اور میری ٹائم معاہدہ خطرے کی گھنٹی ہے کیونکہ امریکہ کے خطے میں 3 لاکھ 60 ہزار فوجی ہیں۔ انہوں نے کہاکہ پاکستان خطے کے دیگر ممالک کیلئے بیرونی دنیا سے رابطے کا گیٹ وے ہے ۔دریں اثناءنجی ٹی وی سے مختصر گفتگو کرتے ہوئے انہوں نے کہا کہ جنرل راحیل شریف سعودی فوجی اتحاد کے سربراہ بنے تو فائدہ پوری امت مسلمہ کوہو گا ، تجربات اور سوچ سے باہمی غلط فہمیاں دور ہوں گی ، توقع ہے کہ ان کی قیادت میں ایران سمیت تمام اتحاد مخالف ممالک کو بھی فائدہ ہوگا۔مشیر قومی سلامتی کا کہنا تھا کہ پاکستان کو ہر صورت افغانستان سے تعلقات بہتر بناکر مغربی محاذ کو بند کرنا ہوگا۔
