اسلام آباد (مانیٹرنگ ڈیسک) وزیر خزانہ اسحاق ڈار کا کہنا ہے کہ چیئرمین سینٹ رضا ربانی راضی ہوگئے، ان کی ناراضگی ختم ہوگئی ہے۔ پیر کو اجلاس کی صدارت کریں گے۔ انہوں نے جو فیصلہ کیا تھا وہ اب واپس لے لیا ہے۔ تفصیلات کے مطابق وزیر خزانہ اسحاق ڈار کا کہنا تھا کہ ہمارے لیے رضا ربانی کل بھی چیئرمین سینٹ تھے، آج بھی ہیں اور آگے بھی رہیں گے، وہ اپنا کام اسی طرح سے جاری رکھیں گے۔ رضاربانی کو وزیر اعظم نواز شریف کا پیغام پہنچایا ہے جس پر انہوں نے اپنا فیصلہ واپس لینے کی یقین دہائی کرا دی ہے جبکہ سینٹ کا اجلاس دوبارہ طلب کیا جائے گا۔ چیئرمین سینٹ نے تمام پارلیمانی لیڈرز سے بھی رابطے کیے ہیں۔ قومی اسمبلی اور سینٹ میں وزراءاپنی حاضری بہتر بنائیں گے۔ ان کا کہنا تھا کہ کورم کی کمی کے معاملے پر بھی بہتری لائی جائے گی، دوسرے ممالک میں تو کورم کامسئلہ ہی نہیں اٹھایاجاتا۔ واضح رہے کہ وزیر خزانہ اسحاق ڈار نے چیئرمین سینٹ رضا ربانی سے ملاقات کی جس میں ان کے درمیان مذاکرات کامیاب ہوگئے۔ ملاقات میں سنیٹر تاج حیدر، شیری رحمان، عثمان کاکڑ، اعظم موسٰی خیل اور راجہ ظفرالحق بھی موجود تھے۔
