لاہور (نیوزایجنسیاں) بھارت کے پاکستان کے ساتھ سیریز نہ کھیلنے کے معاملے پر پاکستان کرکٹ بورڈ نے آئی سی سی ڈسپیوٹ کمیٹی میں جانے کا فیصلہ کر لیا ۔ ذرائع کے مطابق دونوں بورڈز کے درمیان دبئی اور انگلینڈ میں ہونے والے مذاکرات میں پیشرفت نہیں ہو سکی۔ چنانچہ پی سی بی کی قانونی ٹیم نے آئی سی سی ڈسپیوٹ کمیٹی میں معاملہ اٹھانے کی تیاری شروع کر دی ہے۔ ذرائع کے مطابق، پاکستان کرکٹ بورڈ اس معاملے میں غیرملکی لا فرم سے بھی خدمات حاصل کریگا۔ پاکستان کیساتھ سیریز نہ کھیلنے پر پی سی بی نے بھارت کو ہرجانے کا نوٹس بھی بھجوایا تھا۔دوسری جانب اس سے قبل چیئرمین پی سی بی شہریار خان اگلے ماہ اپنے عہدے کی مدت پوری کر رہے ہیں اس لئے انہوں نے اپنی رخصتی سے قبل ششانک منوہر کو پاکستان کے دورے کی دعوت دی تھی جو انہوں نے قبول کرلی۔چیئرمین آئی سی سی کے دورہ سے ورلڈ الیون کی پاکستان آمد کے حوالے سے مثبت پیش رفت ہوگی۔ ادھرآئی سی سی پاکستان میں انٹرنیشنل کرکٹ کی بحالی کیلئے کوشاں ہے۔واضح رہے کہ رواں سال ستمبر میں پاکستان آنے والی ورلڈ الیون لاہور کے قذافی سٹیڈیم میں تین ٹی ٹونٹی میچز کھیلے گی جو انٹرنیشنل سٹیٹس کے حامل ہوں گے۔ آئی سی سی نے ان میچوں کے پاکستان میں کامیابی سے انعقاد کیلئے اپنے بھرپور تعاون کا یقین دلاتے ہوئے کہا ہے کہ دورے کیلئے تمام تر تیاریوں کا سلسلہ جاری ہے اور جلد ہی تفصیلات سامنے آجائیں گی۔
