لاہور(ویب ڈیسک)تحریک انصاف کے سربراہ عمران خان نے صوبائی دارالحکومت میں پریس کانفرنس کرتے ہوئے کہا کہ این اے 120 میں آخری گیند تک مقابلہ کریں گے، اپنی عدالتوں کے ساتھ کھڑے ہیں، پاکستان کے اربوں روپے چوری کر کے بیرون ملک بھجوائے گئے، ہم نے این اے 120 کے لوگوں کو جگانا ہے، نواز شریف کو اربوں روپے چوری کرنے پر نکالا گیا۔
عمران خان نے مزید کہا کہ نواز شریف نے عدالت کے سامنے جھوٹ بولا، اتنے بڑے جرم کے بعد انہیں جیل میں ڈالا جانا چاہئے تھا، یہ الیکشن فیصلہ کن ہو گا، این اے 120 کے عوام کے لئے بڑا امتحان ہے کہ وہ کونسا پاکستان چاہتے ہیں؟ سایئکل چور اور اربوں چوری کرنے والوں کیخلاف قانون برابر ہونا چاہئے۔
چیئرمین پی ٹی آئی نے کہا کہ نواز شریف نے وکلاءکنونشن میں سپریم کورٹ کیخلاف زبان استعمال کی، اگر نواز شریف نہیں مانے گا تو باقی لوگ بھی عدالتوں کے فیصلے نہیں مانیں گے، پیسہ چوری کرنیوالوں کے پاس بےگناہی کا کوئی ثبوت نہیں، نواز شریف نے وزیر اعظم ہوتے ہوئے لندن کے اپارٹمنٹس لئے، سوا سال ہو گیا مگر یہ واضح طور پر کچھ نہ بتا سکے۔
عمران خان نے کہا کہ نواز شریف نے لندن میں اربوں روپے کے محلات کھڑے کر لئے، نواز شریف نے جھوٹ بولا اور غلط ڈاکیومنٹس دیئے، واضح ثبوتوں پر ان کو مستعفی ہو جانا چاہئے تھا، این اے 120 کے ووٹرز کا امتحان ہے، پتہ چلے گا کون عدالت اور کون مجرم کیساتھ کھڑا ہے، این اے 120 کا الیکشن فیصلہ کن ہے، این اے 120 کے لوگوں نے فیصلہ کرنا ہے کہ وہ کیسا پاکستان چاہتے ہیں
