پاکستان کیخلاف سازشوں کو بے نقاب کر کے ضیاشاہد نے قومی فریضہ ادا کیا

ملتان (وقائع نگار خصوصی، تجزیہ نگار) پاکستان کےخلاف بیرون ملک ہونے والی سازشوں کو معروف صحافی اور تجزیہ کار ضیا شاہد نے بے نقاب کر کے عظیم قومی فریضہ ادا کیا ہے۔ آزاد بلوچستان کی حکومت قائم کرنے کا فیصلہ دراصل سی پیک منصوبے کو ناکام بنانے اور علیحدگی پسندوں کی سرپرستی کرنے کے مترادف ہے۔ سیاسی رہنماﺅں نے میموگیٹ کے بدنام زمانہ ڈپلومیٹ حسین حقانی کی مذمت کرتے ہوئے کہا کہ انہوں نے باغی بلوچ لیڈروں کا امریکہ میں سیمینار کرایا۔ بھارت نے بھی علیحدگی پسندوں کی حمایت کر دی اور ساتھ ہی اقوام متحدہ میں بلوچستان میں انسانی حقوق کی خلاف ورزیوں کے الزامات عائد کرتے ہوئے قرارداد پیش کردی۔ سینئر سیاستدان مخدوم جاوید ہاشمی نے کہا کہ آزاد بلوچستان، گریٹر بلوچستان کے نام سے علیحدگی پسندوں نے متعدد بار تنظیمیں اور گروپ بنائے مگر محب وطن بلوچوں نے ان کی سازش کوناکام بنا دیا۔ اب بلوچستان کی صورتحال یکسر تبدیل ہو چکی ہے۔ سینکڑوں فراری اب تک ہتھیار ڈال چکے ہیں۔ سی پیک روٹ کی حفاظت پاک فوج کے دستے خود کر رہے ہیں اور بلوچستان میں معاشی خوشحالی آ رہی ہے جو علیحدگی پسندی کی لہر کو ختم کر دے گی۔ بلوچستان نیشنل پارٹی کے سربراہ سابق سنیٹر عبدالحئی بلوچ نے کہا کہ ماضی میں گریٹر بلوچستان تحریک کا شوشہ بلوچوں کے خلاف آپریشن کیلئے اٹھایا گیا۔ انہوں نے کہا کہ بلوچ دیگر پاکستانیوں کی طرح محب وطن ہیں جو گزشتہ 70سالوں سے وڈیروں اور قبائلی سرداروں کے ہاتھوں استحصال کا شکار ہیں۔ انہوں نے کہا کہ آزاد بلوچستان کا منصوبہ کبھی کامیاب نہیں ہو سکتا۔ سینئر بلوچ رہنما رﺅف خان ساسولی نے کہا کہ حسین حقانی، الطاف حسین اور خان آف قلات کے بزرگوں کو پاکستان نے عزت، شہرت اور دولت بخشی۔ استحصال زدہ غریب عوام پاکستان کے ساتھ ہیں۔ بلوچستان سے فرسودہ قبائلی نظام کا خاتمہ کیا جائے۔ تعلیم عام ہو۔ غریبوں کو بآسانی پینے کا پانی ملے۔ انہوں نے کہا بلوچستان پاﺅں سے سر تک کرپشن میں ڈوبا ہوا ہے۔ عام آدمی کو انصاف نہیں ملتا۔ ہندوستان، اسرائیل اور دیگر بیرونی قوتیں بلوچستان کی محرومیوں کا بھرپور فائدہ اٹھا رہی ہیں۔ ہمیں اپنی اندرونی ناانصافیوں کا ازالہ کرنا چاہیے اور متاثرین کی دادرسی کرنی چاہیے۔ مسلم لیگ ن کے رکن صوبائی اسمبلی شہزاد مقبول بھٹہ نے کہا کہ ان کی جماعت نے علیحدگی پسندوں کی ہر سازش کو ناکام بنایا ہے۔ مستقبل میں بھی تمام سازشوں کو ناکام بنا دیںگے۔ حسین حقانی کو واشنگٹن میں سفیر پی پی پی کی حکومت نے مقرر کیا تھا۔ انہوں نے پاکستان کی ترجمانی کرنے کے بجائے امریکہ اور علیحدگی پسندوں کی ترجمانی شروع کر دی۔ پیپلز پارٹی کے رہنما اور سابق صوبائی وزیر سید ناظم حسین شاہ نے کہا کہ عام انتخابات کے قریب آتے ہی لندن پلان، گریٹر بلوچستان، گریٹر پنجاب اور دیگر سازشوں کا پنڈورا بکس کھل جاتا ہے۔ مملکت خداداد پاکستان کو دشمن قوتیں نقصان نہیں پہنچا سکتیں۔ الطاف حسین جیسے لیڈر اب زیرو ہو گئے ہیں۔ مقامی بلوچ رہنما عبدالحمید خان بلوچ نے کہا کہ ضیا شاہد نے آزاد بلوچستان کی جلاوطن حکومت قائم کرنے کی سازش کو بے نقاب کرکے ملک دشمن قوتوں کے عزائم خاک میں ملا دیئے ہیں۔ انہوں نے کہا کہ بلوچ محب وطن پاکستانی ہیں جو پاکستان کے دفاع اور تحفظ کیلئے اپنی جانیں بھی قربان کرنے سے گریز نہیں کریںگے۔