500 ارب کا بجلی بم،تیار ،کب پھٹے گا،دیکھیئے خبر کہ فی یونٹ کتنی مہنگی

اسلام آباد (خصوصی رپورٹ) موجودہ حکومت نے عالمی مالیاتی اداروں کے دباﺅ پر غریب عوام پر 500ارب روپے کا بجلی بم گرانے کی تیاریاں مکمل کر لی ہیں۔ اس ضمن میں اس بات پر غور کیا جائے گا کہ عوام کو بجلی کے بلوں میں کس نام سے نیا ٹیکس یا سرچارج لگا کر بھجوایا جائے جس کے تحت بجلی کے صارفین سے سال 2015ءسے سال 2020ءتک 500ارب روپے وصول کئے جائیں گے۔ حکومت کے اس فیصلہ کی زد میں 100یونٹ استعمال کرنے والے غریب چھوٹے صارفین بھی آئیں گے۔ دلچسپ امر یہ ہے کہ حکومت کے اس مجوزہ اقدام سے عوام کو سال 2015ءسے سال 2017ءتک کے پچھلے واجبات بھی ادا کرنا ہوں گے اور بجلی تقسیم کار کمپنیاں 250ارب روپے کا اپنا بیک لاگ بھی صارفین سے وصول کریں گی۔ وزارت بجلی کے ذرائع کے مطابق آئی ایم ایف کے پاور ریفارمز پروگرام میں یہ شرط عائد کی گئی کہ بجلی تقسیم کار کمپنیوں کو 5سالہ ٹیرف دیا جائے۔ ایشیائی ترقیاتی بینک نے بھی پاور سیکٹر کو 400ملین ڈالر کا قرض دینے کیلئے پانچ سالہ ٹیرف کی شرط رکھی جس پر عملدرآمد کرتے ہوئے ستمبر 2016ءمیں حکومت نے نیپرا میں پانچ سالہ ٹیرف کیلئے درخواست دائر کی جسے نیپرا نے صارفین کے مفادات کے منافی قراردیتے ہوئے مسترد کر دیا۔ وزارت بجلی نے نیپرا سے پانچ سالہ ٹیرف لینے کیلئے نیپرا ایکٹ میں ترمیم کر دی جس کی مشترکہ مفادات کی کونسل سے منظوری لے لی گئی اور نیپرا ایکٹ کا ترمیمی مسودہ قانون قومی اسمبلی کی قائمہ کمیٹی سے منظور کرانے کا معاملہ بھی آخری مراحل میں ہے۔ جونہی ترمیمی قانون پارلیمنٹ سے منظور ہو گا عوام سے سال 2015ءسے سال 2020ءتک پانچ سالہ ٹیرف وصول کرنے کا یہ قانون نافذالعمل ہوجائے گا جس کے بعد نیپرا حکومت کے ماتحت ادارہ بن جائے گا اور وزارت بجلی کے ڈائریکٹوز پر عملدرآمد کا پابند ہوجائے گا۔ اس سے قبل حکومت نیپرا کو صرف پالیسی گائیڈلائن جاری کرتی ہے جسے تسلیم کرنا یا نہ کرنا نیپرا کا صوابدیدی اختیار ہے۔ نئے قانون کے تحت وزارت نیپرا کو پالیسی ڈائریکٹو جاری کرے گی۔ دلچسپ امر یہ ہے کہ ترمیمی مسودہ قانون کی منظوری سے قبل نیپرا نے ملٹی لیٹرل ٹیرف کے نام سے پانچ سالہ ٹیرف جاری کر دیا ہے جس کے تحت 100یونٹ تک استعمال کرنے والے گھریلو صارفین کیلئے بجلی 60پیسے‘ 200یونٹ تک تین روپے نوے پیسے جبکہ 300یونٹ استعمال کرنے والے صارفین کیلئے بجلی ایک روپے پچاس پیسے فی یونٹ مہنگی کر دی گئی ہے جس کی وصولیاں ابھی شروع نہیں کی گئیں۔ پارلیمنٹ سے قانون کی منظوری کے بعد صارفین سے یہ وصولیاں شروع کر دی جائیں گی۔ ذرائع کا کہنا ہے کہ عالمی مالیاتی اداروں کی شرائط پر حکومت انرکان ادارے کو ختم کرنے جا رہی ہے جبکہ پرائیویٹ پاور انفراسٹرکچر بورڈ اور متبادل توانائی کے ترقیاتی ادارے اے ای ڈی پی کو ضم کرنے جا رہی ہے جس کیلئے اے ای ڈی پی نے وزارت خزانہ کو ایک خط بھی لکھا ہے کہ ادارے کو 60کروڑ کے واجبات ادا کر دیئے جائیں تو اسے بند کر دیا جائے گا۔
بجلی بم