لاہور (خصوصی رپورٹ) مسلم لیگ (ن) کے صدر نوازشریف کی صاحبزادی مریم نواز نے کہا ہے کہ کارکردگی کی بنیاد پر 2018ءمیں بھی عوام مسلم لیگ ن کو ہی کامیاب کرائیں گے اور سازشیوں کی سیاست کو دفن کر دیں گے۔ عوام نے ثابت کر دیا کہ لاہور مسلم لیگ ن کا قلعہ ہے اور نوازشریف عوام کے حقیقی لیڈر ہیں۔ سیاسی مہرے کا کوئی مستقبل نہیں‘ انہیں مایوسی کے سوا کچھ نہیں ملے گا اور عوام ان کو بار بار مسترد کرتے رہیں گے۔ ان خیالات کا اظہار انہوں نے قومی اسمبلی کے حلقہ این اے 120میں ن لیگ کی شاندار کامیابی کے بعد حلقے کے عوام سے اظہار تشکر کیلئے مسلسل دوسرے روز مزنگ میں واقع ن لیگ کے مرکزی دفتر میں اظہارخیال کرتے ہوئے کیا۔ کارکنوں نے ان پر پھولوں کی پتیاں نچھاور کیں اور نعرے لگائے۔ انہوں نے رکن پنجاب اسمبلی ماجد ظہور‘ مختلف یونین کونسلز سے تعلق رکھنے والے چیئرمینوں سمیت دیگر عہدیداروں سے ملاقات کی اور ضمنی انتخابات میں بھرپور مہم چلانے پر ان کا شکریہ ادا کیا۔ انہوں نے حلقے اور عوام کے مسائل دریافت کئے اور انہیں حل کرنے کی یقین دہانی کرائی۔ بعدازاں مریم نواز نے اسلام پورہ عمر روڈ پر یونین کونسل 56کے کونسلر علی ذوالقرنین لالی (مرحوم) کے اہل خانہ سے ملاقات کر کے تعزیت کا اظہار کیا اور مرحوم کی روح کے ایصال ثواب کیلئے فاتحہ خوانی بھی کی۔ یاد رہے کہ علی ذوالقرنین لالی این اے 120کے ضمنی انتخاب والے دن انتقال کر گئے تھے۔ کارکنوں سے خطاب کرتے ہوئے مریم نواز نے کہا کہ این اے 120کے عوام نے ثابت کر دیا کہ این اے 120کے عوام کے دیرینہ مسائل حل ہونے کا وقت آ گیا ہے۔ ہم صاف پانی کی فراہمی سمیت عوام کے دیگر مطالبات پورے کریں گے۔
