لاہور(خبریں رپورٹر ) چیف جسٹس آف پاکستان مسٹر جسٹس میاں ثاقب نثا ر نے کہا ہے کہ کسی بھی جج کو قانون سے باہر نکل کر اپنی صوابدید اورمن مرضی سے فیصلے کرنے کا اختیار نہیں ہے۔ انہوں نے کہا کہ ان کے نزدیک سپریم کورٹ کے فاضل جج اورضلعی عدلیہ کے سول جج میں کوئی فرق نہیں ہے، سپریم کورٹ کے جج کے پاس بھی انصاف کرنے کا اختیار ہے اور سول جج کے پاس بھی فراہمی انصاف کا ہی اختیار ہے۔ فاضل چیف جسٹس نے ان خیالات کا اظہار پنجاب جوڈیشل اکیڈمی میں صوبہ بھر کے ڈسٹرکٹ اینڈ سیشن ججز اور سینئر سول ججز سے خطاب کرتے ہوئے کیا۔ چیف جسٹس لاہور ہائی کورٹ مسٹر جسٹس سید منصور علی شاہ، رجسٹرار سید خورشید انور رضوی، ممبر انسپکشن ٹیم محمد اکمل خان اور ڈائریکٹر جنرل پنجاب جوڈیشل اکیڈمی عظمیٰ اختر چغتائی بھی اس موقع پر موجود تھے۔ چیف جسٹس سپریم کورٹ آف پاکستان میاں ثاقب نثار نے کہا کہ ان کی خواہش تھی کہ وہ اپنے جوڈیشل آفیسرز سے ملاقات کریں، وہ ایک کمانڈر کی طرح اپنے سپاہیوں سے ہر ضلع میں جا کر کے ملنا چاہتے تھے مگر کچھ مصروفیات کے باعث ایسا ممکن نہ ہوسکا، اس لئے وہ چیف جسٹس لاہور ہائی کورٹ کے مشکور ہیں جنہوں نے ایک چھت کے نیچے صوبہ بھر کے سیشن ججز اور سینئر سول ججز کو اکٹھا کر کے ملاقات کروائی۔ انہوں نے کہا کہ انسان کے وجود اور انصاف کی طلب ایک دوسرے سے جد ا نہیں ہوسکتے، ان کا کہنا تھا کہ چھوٹے سے چھوٹے معاشرے میں بھی کسی انسان کے بنیادی حقوق کی خلاف ورزی ہوتی ہوگی اوراس بناءپر اختلافات جنم لیتے ہوں گے اور ان مسائل کے حل کےلئے وہاں کوئی ایسا شخص بھی موجود ہوگاجس کی ایمانداری پر سب کو اعتماد ہوتا ہوگا ، جسے وہ منصف سمجھتے ہوں گے۔ فاضل چیف جسٹس نے کہا کہ انصاف کی یہ ابتدائی شکل اپنی ارتقائی مراحل طے کر تے ہوئے آج ایک ادارے کی شکل اختیار کر چکی ہے لیکن منصف میں غیرجانبداری، آزادی، سوچ اور دیانتداری کے عناصر ساتھ ساتھ چلتے رہے ، آ ج یہ ادارہ مختلف قوانین کے طابع ہے اور منصف کوانہی مروجہ قوانین کے مطابق فیصلہ کرنا ہوتا ہے۔ فاضل چیف جسٹس نے کہا کہ قانون کے علم پر دسترس رکھنا منصف کا بنیادی فرض ہے، قانون جانے بغیر وہ فیصلہ نہیں کر سکتا۔ انہوں نے کہا کہ یہ امر باعث افسوس ہے کہ بعض اوقات ضلعی عدلیہ کے ججز کی جانب سے جاری کئے جانے والے فیصلہ جات سپریم کورٹ آف پاکستان اور ہائی کورٹس کے وضع کردہ اصولوں اور قوانین کے مطابق نہیں ہوتے۔ ان کا کہنا تھاکہ ہمیں یہ دیکھنا ہوگا کہ آیا جو قوانین سپریم کورٹ یا ہائی کورٹس نے سیٹ کئے ہیں ہم اس کے مطابق فیصلے کر رہے ہیں یا نہیں۔ فاضل چیف جسٹس نے کہا کہ قانون کے مطابق کئے جانے والے سول ججز کے فیصلوں کو بھی ہم معتبر سمجھتے ہیں اور وہ سپریم کورٹ تک بھی تبدیل نہیں ہوتے۔ انہوں نے مزید کہا کہ سپریم کورٹ آف پاکستان کو تمام جوڈیشل آفیسرز پر مکمل اعتماد ہے وہ اس ادارے کی سربلندی کےلئے سخت محنت اور لگن سے کام کر رہے ہیں۔ چیف جسٹس میاں ثاقب نثار نے کہا کہ مجھے جوڈیشل افسران سے ایک سال کی کارکردگی تحفے میں چاہیے، ایک سال پوری ایمانداری، دیانتداری، محنت و لگن سے کام کریں، پھر ایک سال کے بعد آپ کو اسکی عادت ہو جائے گا اور آپ مکمل انصاف کئے بغیر نہیں رہ سکیں گے۔ ان کا کہنا تھا کہ جوڈیشل افسران کی ضروریات اور تقاضے ان کے علم میں ہیں، جوڈیشل افسران کی عزت نفس کا تحفظ ہر قیمت پر یقینی بنایا جائے گا، انہوں نے کہا کہ جوڈیشل افسران خصوصاََ فی میل ججز کی سہولت ، تحفظ اور تمام مسائل کا حل متعلقہ ڈسٹرکٹ اینڈ سیشن جج پر لازم ہے۔ فاضل چیف جسٹس نے جوڈیشل افسران کی ٹریننگ کے حوالے سے بات کرتے ہوئے کہا کہ اپنے اندر سے سیکھنے سے متعلق ہچکچاہت ختم کریں، ترقی یافتہ اور ترقی پذیر ممالک میں واضح فرق علم کی طلب اور قانون کی عملداری ہے، جہاں سیکھنے میں آر محسوس کی جاتی ہے وہ معاشرہ کبھی ترقی نہیں کر سکتا ، سیکھنے کی اہمیت کا اس بات سے بھی اندازہ کیا جا سکتا ہے کہ میں بطور چیف جسٹس آف پاکستان خود کو بھی ٹریننگ کےلئے پیش کرتا ہوں۔ان کا کہنا تھا کہ ہمارے لئے بہت اہم ہے کہ ہم اپنی تمام تر صلاحیتوں کو برائے کار لاتے ہوئے انصاف کی کشتی کو منزل کی جانب لے کر چلیں۔ فاضل چیف جسٹس نے مزید کہا کہ مجھے امید ہے کہ ججز میرا مان رکھیں گے اورانکے اندر ایک مثبت تبدیلی کا تاثر نظر آئے گا، جوڈیشل افسران کی طاقت کے بھروسے پر ہم ایک متحرک اور موثر عدلیہ کی بنیاد رکھ رہے ہیں، مجھے امید ہے میں اس سفر میں تمام جوڈیشل افسران کو اپنے شانہ بشانہ پاﺅں گا۔اس موقع پر چیف جسٹس لاہور ہائی کورٹ مسٹر جسٹس سید منصور علی شاہ نے چیف جسٹس آف پاکستان کی آمد پر خصوصی شکریہ ادا کرتے ہوئے کہا کہ پنجاب کی عدلیہ فاضل چیف جسٹس کی سربراہی اور رہنمائی میں بہتر سے بہتر کام کرے گی، انہوں نے کہا کہ ہمارے فیصلے آئین اور قانون کے مطابق ہوں گے۔ فاضل چیف جسٹس کا مزید کہنا تھا کہ جوڈیشل سروسز کے امتحانی طریقہ کار کو سپیئریر سول سروسز کے برابر لا رہے ہیں، اکیڈمی میں پری سروس ٹریننگ کا دورانیہ چھ ماہ کر دیا گیا ، اس عرصہ میں جوڈیشل افسران نا صرف اکیڈمی میں تربیتی کورسز کریں بلکہ عدالتوںمیں بیٹھ کر بھی ٹریننگ کریں گے۔ فاضل چیف جسٹس نے مزید کہا کہ صوبہ بھر کے ججز کےلئے ٹرانسفر پالیسی بنائی جارہی ہے جو پورے صوبے میں یکساں لاگو ہو گی، ساتھ ہی ساتھ فی میل ججز کو بھی مضبوط کر رہے ہیں، پنجاب میں مثبت تبدیلی کا آغاز کیا جا چکا ہے،عدلیہ میں تبدیلی آ نہیں رہی بلکہ تبدیلی آ گئی ہے۔ قبل ازیں ڈسٹرکٹ اینڈ سیشن جج اٹک سہیل ناصر اور ڈائریکٹرجنرل پنجاب جوڈیشل اکیڈمی عظمیٰ اخترچغتائی نے بھی اپنے خیالات کا اظہار کیا۔ تقریب کے اختتام پر ڈسٹرکٹ جوڈیشری اور اکیڈمی کی جانب سے چیف جسٹس آف پاکستان کو یادگاری تحائف بھی پیش کئے گئے۔علاوہ ازیں چیف جسٹس آ ف پاکستان مسٹر جسٹس میاں ثاقب نثارکا کہنا ہے کہ ایسا کوئی معاملہ نہیں جس کا حل افہام و تفہیم سے حل نہ ہو سکے، ہماری آج کی نشست کا مقصد یہ احساس کرنا ہے کہ ہمارے کچھ مسائل ہیں اور ہم نے مل جل کر ان کو حل کرنا ہے،انہوں نے کہا کہ یہ خوشی کی بات ہے کہ میٹنگ میں کوئی سیاسی بات نہیں ہوئی سب نے اپنے دل کی باتیں کی ہیں اور یہ امر بھی باعث مسرت ہے کہ تمام بار ایسو سی ایشنوں اور بار کونسلز نے ہرتال کلچر ختم کرنے کا فیصلہ کیا ہے اور تمام پروفیشنل وکلاءعدالتوں میں غیر سنجیدہ عناصر کی جانب سے نازیبا رویے کی مذمت کر رہے ہیں۔ فاضل چیف جسٹس آف پاکستان نے ان خیالات کا اظہار وکلاءرہنماﺅں کے ساتھ ملاقات کے موقع پر کیا۔ چیف جسٹس لاہور لاہور ہائی کورٹ مسٹر جسٹس سید منصور علی شاہ، وائس چیئرمین پاکستان بار کونسل احسن بھون، ممبر پاکستان بار کونسل اعظم نذیر تارڑ، عابد ساقی، وائس چیئرمین پنجاب بار کونسل ملک عنایت اللہ اعوان، چیئرمین ایگزیکٹو کمیٹی عظمت علی بخاری، جنرل سیکرٹری سپریم کورٹ بار ایسو سی ایشن آفتاب احمد باجوہ، صدر لاہور ہائی کورٹ بار ایسو سی ایشن رانا ضیاءعبد الرحمان ، صدر ہائی کورٹ بار ایسو ایشن ملتان شیخ جمشید حیات اور صدر لاہور بار ایسو سی ایشن چودھری تنویر اختر سمیت دیگر وکلاءرہنمابھی موجود تھے۔سپریم کورٹ آف پاکستان کے فاضل چیف جسٹس نے کہا کہ ہمیں آج یہ بات یاد رکھنا ہوگی کہ عوام کا اعتماد ہمارے ادارے سے اٹھنا شروع ہوچکا ہے، ہمیں اپنی اپنی ذمہ داریوں کا احساس کرنا ہوگا اور جو ذمہ داریاں ہم پر عائد ہوتی ہیں ہم ان کے ضامن ہوں گے۔ فاضل چیف جسٹس نے کہا کہ اس ملک کی بقاءاس انصاف کے ادارے سے جڑی ہے، اگر کسی ملک کی عدلیہ فنکشنل ہوتو اس ملک کے خلاف کوئی سازش کامیاب نہیں ہوسکتی۔ فاضل چیف جسٹس نے کہا کہ آج کی نشست کا مقصد ہمیں اپنے مسائل پر تبادلہ خیال کرنا تھا، ہمیں اپنی گفتگو کے حوالے سے ہوم ورک کرنا ہے، کسی بھی سیاست سے بالاتر ہوکر اس ادارے کی بالادستی کےلئے کام کرنا ہے۔ فاضل چیف جسٹس نے کہا کہ عدلیہ کے ادارے کے دو ٹولز ہیں، جج اور وکیل ۔ ہمیں ان دونوں ٹولز کو غلط ہاتھوں میں جانے سے روکنا ہے، ان کا کہنا تھا کہ نوجوان وکلاءہمارا مستقبل ہیں، جن کی فلاح و بہبود اور مالی تعاون کےلئے تجاویز مرتب کی جانی چاہیں،ہمیں خود کو دغا نہیں دینا، اگر کچھ کرنا ہے تو کرنا ہے اوراگر نہیں کرنا تو پیچھے ہٹ جائیں، لوگ تو اپنی آئندہ نسلوں کےلئے پیٹ پر پتھر باندھ لیتے ہیں، فاضل چیف جسٹس نے کہا کہ فیک ڈگریوں کا معاملہ بہت سنگین ہے ، اس کے خاتمے کےلئے بھی اپنی تجاویز دیں، سپریم کورٹ آف پاکستان اور لاہور ہائی کورٹ کا بھرپور تعاون آپ کو میسر ہوگا۔ اجلاس کے آخر میں سینئر قانون دان ملک سعید حسن (مرحوم) کے ایصال ثواب کےلئے دعا بھی کئی گئی،فاضل چیف جسٹس کا کہنا تھا کہ ملک سعید حسن کی اصل فیملی بار تھی اور میں انکی اس فیملی کے ساتھ تعزیت کرنا چاہتا ہوں۔ اجلاس میں موجود تمام وکلاءرہنماﺅں نے ہڑتالوں کے کلچر کے خاتمے کا فیصلہ کیا اور عدالتوںمیںہونے والے واقعات کی بھرپور مذمت کرتے ہوئے کہا کہ ججز کے ساتھ بدتمیزی نان پروفیشنل رویہ ہے، اگر کسی وکیل کو جج کے حوالے سے کوئی شکایت ہوتو وہ اپنی متعلقہ تحصیل بار ایسو سی ایشن یا ڈسٹرکٹ بار ایسوسی ایشن سے رجوع کریں۔

اسلام آباد‘ لاہور (اے پی پی‘ ایجوکیشن رپورٹر) صدر مملکت پاکستان ممنون حسین نے کہا ہے کہ خطے میں امن کا خواب اسی وقت شرمندہ تعبیر ہوسکتا ہے ، جب کشمیریوں کی خواہشات کے مطابق مسئلہ کشمیر کا حل نکالا جائے کشمیر کا مسئلہ پاکستان اور بھارت کے درمیان بنیادی تنازعہ ہے، خطے کے ایک ارب 50کروڑسے زائد لوگ امن اور خوشحالی کی صبح کے متمنی ہیں لیکن بھارت کی جانب سے اقوام متحدہ کی سلامتی کونسل کی کشمیر کے حل کے حوالے سے قراردادوں پر عمل سے انکاری ہونے کی وجہ سے وہ یہ صبح نہیں دیکھ سکے۔ ہفتہ کو یوم یکجہتی کے حوالے سے اپنے پیغام میں صد رمملکت نے کہا کہ بھارت نہ صرف تسلسل کے ساتھ گزشتہ سات دھائیوں سے کشمیریوں کو حق خودارادیت دینے سے انکار کر رہا ہے بلکہ وہ مقبوضہ کشمیر میں انسانی حقوق کی خلاف ورزیوں، تشدد اور جبر میں بھی ملوث ہے۔انہوں نے کہا کہ کشمیر کا تنازعہ برصغیر کی تقسیم کا نامکمل ایجنڈا ہے،اور یہ اقوام متحدہ کی سلامتی کونسل کے ایجنڈے پر سب سے پرانا زیر التوا تنازع ہے۔ انہوں نے کہا کہ پاکستان عالمی برادری سے مطالبہ کرتا ہے کہ وہ اس معاملہ میں اپنے ذمہ داریوں کا ادراک کرے۔ وزیر اعظم محمد نواز شریف نے بھارت پر زور دیا ہے کہ وہ مقبوضہ جموں و کشمیر میں خونریزی بند کرے اور اقوم متحدہ کی زیر نگرانی شفاف اور منصفانہ استصواب رائے منعقد کرنیکی اجازت دے۔بھارت گزشتی سات دہائیوں سے مقبوضہ کشمیر کے بہادر عوام کو حق خود ارادیت دینے سے انکار کررہا ہے جس کا عالمی برادری نے اقوام متحدہ کی سلامتی کونسل کے متعدد قراردادوں کے زریعے ان سے وعدہ کیا ہے۔عالمی برادری بھارتی مقبوضہ کشمیر میں بڑے پیمانے پر انسانی حقوق کی خلاف ورزیوں بھارتی فورسز کی جانب سے بیگناہ کشمیریوں پر مظالم کیخلاف آواز بلند کرے اور جموں و کشمیر کے عوام سے ستر سال قبل کئے گئے وعدوں کو عملی جامہ پہنائیں۔یوم یکجہتی کشمیر کے موقع پر وزیر اعظم نواز شریف نے اپنے ایک پیغام میں کہاکہ پاکستانی عوام ’یوم یکجہتی کشمیر‘ منانے میں اپنے کشمیری بھائیوں کیساتھ شریک ہیں۔ وزیراعلیٰ پنجاب محمد شہبازشریف نے کہا ہے کہ مقبوضہ جموں و کشمیر کے عوام اپنی آزادی اور بقاکی جنگ لڑ رہے ہیں ۔ حق خود ارادیت کے حصول کیلئے کشمیری عوام نے اپنے لہو سے نئی تاریخ رقم کی ہے۔پاکستانی حکومت اور عوام نے ہمیشہ مقبوضہ کشمیر میںریاستی جبروتشدد اور انسانی حقوق کی پامالی کے خلاف بھرپور آواز اٹھائی ہے۔کشمیریوں کے حق خود ارادیت سے انکار دراصل اخلاقی ، سفارتی اور سیاسی رویوں میں خامیوں کی نشاندہی کرتا ہے۔وزیراعلیٰ پنجاب محمد شہبازشریف نے یوم یکجہتی کشمیر کے موقع پر اپنے پیغام میں کہا کہ کشمیر تقسیم ہند کا نا مکمل ایجنڈا ہے۔ قائد ملت جعفریہ پاکستان علامہ سید ساجد علی نقوی نے کہا ہے کہ کشمیری مسلمانوں کے ساتھ ہمدردی اوران کے مو¿قف کی ترجمانی پاکستانی قوم کا فریضہ اور عدل و انصاف کا تقاضا ہے لہٰذا اس فریضے کی ادائیگی کے لئے ہم 5 فروری کو اپنے مظلوم کشمیری بھائیوں کے ساتھ یکجہتی کے لئے یوم یکجہتی کشمیر منا رہے ہیں۔ مظلوم کشمیری مسلمان نصف صدی سے زائد بھارتی ظلم و بربریت کا شکار ہیں۔ جمعیت علماءاسلام کے مر کزی امیر اور قومی کشمیر کمیٹی کے چیئر مین مو لا نا فضل الرحمن نے کہا ہے کہ قوم آج 5 فروری کو کشمیر ی عوام کے ساتھ یکجہتی کے طور پر منائے گی اور یہ ثابت کرے گی قوم کا بچہ بچہ کشمیری عوام کے ساتھ ہے ملک بھر میں جلسے، جلوس اورریلیاں ہوںگئی انہوں نے کہا کہ مسئلہ کشمیر پر عالمی برادری کاامتیازی رویہ افسوسناک مر کزی میڈیاآفس کے مطابق وہ جماعتی عہدے داروں ،مولانا محمد امجد خان ،مولانا فضل علی حقانی،مولانا عبد القیوم ہالیجوی،مفتی ابرار احمد ،حاجی شمس الرحمن شمسی اور دیگر سے گفتگو کر رہے تھے ۔

اسلام آباد (مانیٹرنگ ڈیسک) نوازشریف پر پانامہ کیس کا انتہائی پریشر ہے کہ وہ آدھی آدھی تیار ہوئی سڑک کا افتتاح کررہ ہیں۔ پرویز خٹک ”ملنگ“ آدمی ہیں اشتہارات کے ذریعے شہرت حاصل ہی نہیں کرنا چاہتے۔ کے پی کے میں ہم نے تمام اداروں کو مثالی بنادیا ہے چیئرمین تحریک انصاف عمران خان نے نجی ٹی وی کے ساتھ گفتگو کرتے ہوئے کہا ہے کہ انہوں نے مزید کہا کہ حکمرانوں پر پانامہ کا اتنا خوف ہے کہ وہ آدھی سڑکیں بناکر افتتاح کررہے ہیں۔ پرویز الہیٰ دور میں جتنا کام پنجاب میں ہوا اتنا کسی دور میں نہیں ہوا۔ شہبازشریف نے 20ارب کے اشتہار دیئے ہیں ترقی صرف اشتہاروں پر نظر آتی ہے ایک طرف بڑے بھائی کی تصویر ہوتی ہے دوسری طرف چھوٹے بھائی کی بانی پنجاب کا حال کیا ہے۔ ایک سوال کے جواب میں عمران خان نے کہا ہے کہ سوشل میڈیا نے عوام میں بہت آگاہی بڑھا دی ہے اب حکمران قطری خط کے پیچھے نہیں چھپ پائیں گے۔ ہم وہی کررہے ہیں جو دنیا میں اپوزیشن کرتی ہے کے پی کے میں سرمایہ کاروں کی لائنیں لگی ہوئی ہیں۔ ہم یہاں مثالی تبدیلیاں لے کر آئی ہیں۔ پولیس سے 5ہزار لوگ نکالے گئے ہیں۔ یہاں کی پولیس انٹرنیشنل پولیس دکھائی دے گی۔ تمام ادارے تبدیل ہوچکے ہیں پرویز خٹک ”ملنگ“ آدمی ہے۔ اشتہار کے ذریعے شہرت حاصل ہی نہیں کرنا جاسکتا۔ 1ارب کا اشتہاروں کیلئے بجٹ رکھا ہے اس نے صرف 16کروڑ روپے خرچ کئے ہیں۔ کے پی کے میں ہسپتال، ایجوکیشن، بلدیات تمام محکمے مقامی ہوچکے ہیں۔ میاں فیملی پولیس کو انتقامی کارروائی کیلئے استعمال کرتی ہے انہوں نے پولیس تباہ کردی ہے۔ پنجاب میں میرے خلاف مقدمات درج ہیں۔ انہوں نے مجھے اشتہاری بنادیا ہے۔ کے پی کے میں کسی کے خلاف پرچہ درج نہیں ہے۔ آئی جی تین سالوں وہی مقرر کیا ہوا ہے۔ ہم نے احتساب کو حکومت سے علیحدہ کردیا ہے اس کیلئے اسمبلی سے قانون پاس کروایا۔ اس بار الیکشن پوری تیاری سے لڑیں گے۔ نوازشریف الیکشن کمیشن کی مشنری کو خود کنٹرول کرتے ہیں۔ وہ الیکشن جیتنے کیلئے اربوں روپے خرچ کرتے ہیں۔ انہوں نے پورے پنجاب کے بجٹ کا 60فیصد لاہور میں خرچ کردیا۔ باقی پنجاب کا حال خراب ہے۔ ہسپتالوں میں بستر موجود نہیں ہیں۔ دودھ کی جگہ پانی بک رہا ہے صاف پانی تک عوام کو میسر نہیں۔ انہوں نے کہا کہ شاہد آفریدی کو کیا پتہ کیسے ہوتی ہے وہ جانتے ہی نہیں ہیں کہ معاملات کیسے چلتے ہیں اگرانہیں معلوم ہوتا تو میرے بارے میں ایسے الفاظ نہ کہتے ٹرمپ نے ویزے بند کرکے احمقانہ فیصلہ کیا ہے اس سے پوری دنیا میں امریکہ کا کردار خراب ہوا ہے۔ سوائے ایران کے کوئی ملک بول نہیں رہا۔ پاکستان بھی کہ دیا ہے کہ اس کی اپنی مرضی ہے یہ انکا اپنا مسئلہ ہے میں نے درست کہا ہے کہ ٹرمپ ہم پر پابندی لگادے۔ ہم اپنے پیروں پر کھڑے ہوجائیں گے۔ حافظ سعید کی گرفتاری اگر غیرملکی پریشر کے تحت کی گئی ہے تو یہ غلط ہے۔ تو یہ غلط ہے اگر یہ حکومتی پالیسی کے تحت دہشت گرد تنظیم کے خلاف کارروائی ہے تو درست ہے۔ نوازشریف نے قطری کے خط کے بدلے انہیں اربوں روپوں کے ٹھیکے دے دیئے ہیں۔ تاریخ میں پہلی دفعہ عدالت میں ان سے پوچھ گچھ ہورہی ہے۔ یہ این آر او لے کر باہر چلے جاتے تھے۔ اب کے پھنس گئے ہیں۔ نوازشریف کو اگر عدالت نااہل کردیتی ہے تو (ن) لیگ اپنا دوسرا بندہ لے آئے گی۔ 2017ءمیں الیکشن ہوتے دکھائی نہیں دے رہے۔

لاہور (اپنے سٹاف رپورٹر سے) وزیر اعلیٰ پنجاب محمدشہبازشریف سے یہاں مختلف ممالک کے سفیروں، ہائی کمشنرز، سفارتکاروں اور بین الاقوامی اداروں کے اعلیٰ حکام نے ملاقات کی جن میں یورپی یونین کے سفیر جین فرانسواکوٹین (Mr.Jean Francois Cautain)، فرانس کی سفیر مارٹین ڈارینس(Mrs. Martine Dorance)، برطانیہ کے ہائی کمشنر تھامس ڈریو (Mr.Thomas Drew)، بھارتی ہائی کمشنر گوتم بمبانوالہ(Mr. Gautam Bambawale)، آسٹریلیا کی ہائی کمشنر مارگریٹ ایڈمسن(Ms. Margaret Adamson)، تاجکستان کے سفیر جینوف شیرالی(Mr. Jononov Sherali)، امریکہ کے قونصل جنرل یوری فیڈکیو (Mr. Yuri Fedkiw)، کنٹری ڈائریکٹر ورلڈ بینک الانگوپچا موتھو(Mr.Illangova Patchamutu)، جرمن سفارتخانے کے ڈپٹی چیف آف مشن ڈاکٹر جنز جوسیچ(Dr. Jens Jokisch)، ڈائریکٹر یونیسکو ویبکے جینسن(Ms. Vibeke Jensen) اور دیگر اعلیٰ حکام شامل تھے۔وزیر اعلیٰ محمد شہباز شریف نے اس موقع پر گفتگو کرتے ہوئے کہا کہ و زیراعظم محمد نوازشریف کی قیادت میں پاکستان ترقی اور خوشحالی کے سفر پر گامزن ہو چکا ہے اور پاکستان آج پہلے سے کہیں زیادہ محفوظ، پرامن اور معاشی طور پر مستحکم ہے۔ دہشت گردی و انتہا پسندی اور توانائی بحران کے خاتمے کیلئے موجودہ حکومت کے موثر اقدامات سے صورتحال میں بہت بہتری آئی ہے۔ دہشت گرد اور ان کے سہولت کار پاک دھرتی کا ناسور ہیں جن کا مکمل خاتمہ ہمارا مشن ہے۔دہشت گردی کے خلاف جنگ میں پاکستان کی لازوال قربانیوں کی کوئی نظیر نہیں ملتی۔ سیاسی و عسکری قیادت دہشت گردی کے ناسور کے خاتمے کیلئے ایک صفحے پر ہیں۔ موجودہ حکومت کے 3 برس کے دوران کرپشن میں نمایاں کمی اور شفافیت میں اضافہ ہوا ہے۔ ٹرانسپرنسی انٹرنیشنل جرمنی کی حالیہ رپورٹ میں بھی پاکستان کی درجہ بندی 9 درجے بہتر ہوئی ہے اور کرپشن کے خاتمے کیلئے تسلسل کے ساتھ اقدامات کے مثبت نتائج سامنے آئے ہیں۔ انہوں نے کہا کہ چائنہ پاکستان اکنامک کوریڈور نے پاکستان میں معاشی سرگرمیوں کو تیز کیا ہے۔ ماضی میں پاکستان میں ترقیاتی منصوبے کئی وجوہات کی بنا پر تاخیر کا شکار رہے لیکن موجودہ حکومت نے اس کلچر کو دفن کر دیا ہے اوراب ترقیاتی منصوبے جس تیزرفتاری سے مکمل کئے جا رہے ہیں اس کی مثال دنیا میں نہیں ملتی ۔ وزیر اعلیٰ نے کہا کہ پاکستان خصوصاً پنجاب میں سیاحت کو فروغ دینے کیلئے موثر اقدامات کئے گئے ہیں۔ انہوں نے کہا کہ پاکستان خصوصاً پنجاب کی تہذیب صدیوں پرانی ہے اور پاکستان خصوصاً پنجاب کا ثقافتی ورثہ انتہائی منفرد اور شاندار ہے۔ انہوں نے کہا کہ پنجاب میں سکھ برادری اور بدھ مذہب کے پیروکاروں کے تاریخی مقامات کی دیکھ بھال کی جا رہی ہے۔ سیاحت کے فروغ سے معاشی سرگرمیوں میں اضافہ ہوگا۔ وزیر اعلیٰ نے کہا کہ حکومت قومی وسائل کی پائی پائی عام آدمی کا معیار زندگی بلند کرنے پر خرچ کر رہی ہے اور عام آدمی کی ترقی اور خوشحالی ہماری ترجیحات ہیں۔ وزیر اعلیٰ نے کہا کہ پاکستان کی تعمیر و ترقی میں دوست ممالک اور عالمی ادارو ںکا تعاون لائق تحسین ہے۔ آئیے! پاکستان کی تعمیر، ترقی و خوشحالی کے اس سفر کی شراکت کو کثیرالجہت تعلقات میں بدلیں۔ وزیراعلیٰ پنجاب سے کیڈٹ کالج پشین کے طلباءنے ملاقات کی اس موقع پر وزیر اعلی پنجاب محمد شہباز شریف نے کہا کہ پاکستان اسی وقت ترقی کرے گا اور خوشحال ہو گا جب اس کی تمام اکائیاں ترقی کریں گی۔ ہماری خوشیاں اور غم سانجھے ہیں اور ہمیں روکھی سوکھی مل بانٹ کر کھانا ہے۔ خوشحالی اسی وقت آتی ہے جب محنت کو جزو ایمان سمجھ کر مل کر کام کیا جائے ، امانت ، دیانت کو شعار بنایا جائے، کرپشن کے خاتمے کیلئے کام کیا جائے اور قومی دولت کو قوم کی امانت سمجھتے ہوئے عوام کی ترقی و خوشحالی پر صرف کیا جائے اور قومی دولت لوٹنے والوں کا احتساب ہو۔ اس طرح بدحالی خوشحالی میںاور بدقسمتی خوش قسمتی میں بدلے گی اور کامیابی و کامرانی پاکستان کے قدم چومے گی۔ پاکستان چار اکائیوں، آزاد کشمیر اور گلگت بلتستان پر مشتمل ہے – بلوچستان پاکستان کا آبادی کے لحاظ سے چھوٹا اور جغرافیائی لحاظ سے بڑا صوبہ ہے – بلوچستان ہمارا عظیم اور پیارا صوبہ ہے – وزیر اعظم محمد نواز شریف کی قیادت میں بلوچستان میں ترقیاتی منصوبوں پر اربوں روپے صرف کئے جا رہے ہیں – بلوچستان میں سڑکوں کا جال بچھایا جا رہا ہے – میرے بھائی بلوچستان کے وزیر اعلی سردار ثناءاللہ زہری بھی بلوچستان کی ترقی و خوشحالی پر بھرپور توجہ دے رہے ہیںاور بلوچستان میں جلد بڑی مثبت تبدیلی آئے گی – سی پیک کے تحت گوادر سے کاشغر تک سڑک کے ذریعے رابطہ ممکن بنایا جا رہا ہے – فرنٹیئر ورکس آرگنائزیشن اس منصوبے پر دن رات کام کر رہی ہے- گوادر معاشی سرگرمیوں کا مرکز بنے گا اور یہاں ٹریلین ڈالر کی تجارت ہو گی- چین کی برآمدات اور درآمدات اسی راستے سے ہوں گی جس سے بلوچستان میں ترقی و خوشحالی کا نیادور آئے گااور سرمایہ کاری میں اضافہ ہو گا-سی پیک سے معیشت مضبوط ہو گی اور سماجی شعبے کو بے پناہ فائدہ پہنچے گا- پنجاب کے تعلیمی پروگراموں میں پاکستان کی تمام اکائیوں کے ہزاروں طلباءو طالبات کو شامل کر کے قومی یکجہتی کے عمل کو مضبوط کیا گیا ہے اور پنجاب کے تعلیمی اداروں میں بلوچستان سمیت دیگر صوبوں آزاد کشمیر اور گلگت بلتستان کے طلباءو طالبات کا بھی کوٹہ مختص کیا گیا ہے- بلوچستان کے 1032 طلباءو طالبات مختص کوٹے کے تحت پنجاب کی مختلف یونیورسٹیوں میں تعلیم حاصل کر رہے ہیں – بلوچستان کے 3223 بچوں کو پنجاب ایجوکیشنل انڈوومنٹ فنڈ کے ذریعے 14 کروڑ روپے کے وظائف دیئے جا چکے ہیں۔ انہوں نے کہا کہ وزیر اعظم نواز شریف کی قیادت میں بلوچستان میں اربوں روپے کے منصوبے مکمل کئے جا رہے ہیں – پنجاب حکومت کے تعلیمی پروگراموں میں دیگر صوبوں کے ساتھ بلوچستان کے طلباءو طالبات شامل ہوتے ہیں – میں نے 2010ءمیں وزیر اعلی ہا¶س، مری کے ایک حصے کو پوزیشن ہولڈرز طلباءو طالبات کیلئے وقف کر دیا تھا اور اب یہاں طلباءو طالبات اور اساتذہ کیلئے تربیتی پروگرام اور ریفریشر کورسز کا انعقاد کیا جا رہا ہے – انہوںنے کہا کہ چاروں صوبوں سے پوزیشن ہولڈرطلباءو طالبات کو بیرون ممالک کی معروف یونیورسٹیوں کے مطالعاتی دوروں پر بھجوایا جاتا ہے اور پوزیشن ہولڈر بچوں کی حوصلہ افزائی کیلئے انہیں چار لاکھ روپے نقد انعام بھی دیا جاتا ہے – بیرون ممالک کی معروف درس گاہوں میں ان بچوں کو سیکھنے کا موقع ملتا ہے جس سے ان میں نیا اعتماد پیدا ہوتا ہے – پنجاب ایجوکیشنل انڈومنٹ فنڈ کے ذریعے اب تک گیارہ ارب روپے کے وظائف ذہین مگر کم وسیلہ خاندانوںکے طلباءو طالبات میں تقسیم کئے جا چکے ہیں اور ایک لاکھ 75 ہزار بچے اور بچیاں یہ وظائف حاصل کر رہے ہیں – اس فنڈ سے تعلیم مکمل کرنے والے پیف سکالرز ،ڈاکٹر ، انجینئر، بینکرز اور سائنسدان بن کر ملک کی تعمیر و ترقی میں اپنا حصہ ڈال رہے ہیں – وزیر اعلی نے طلباءو طالبات کے سوالات کا جواب دیتے ہوئے کہا کہ چائنہ پاکستان اقتصادی راہداری کے تحت چین پاکستان میں 52 ارب ڈالر کی سرمایہ کاری کر رہا ہے جس کے تحت پاکستان کی تمام اکائیوں میں توانائی ، انفراسٹرکچر ، ٹرانسپورٹ کے منصوبے لگ رہے ہیں – ان منصوبوں کی تکمیل سے چاروں صوبوں میں روزگار کے لاکھوں نئے مواقع پیدا ہوں گے ، پیداوار بڑھے گی اور پاکستان معاشی طور پر مضبوط ملک بنے گا – سوشل سیکٹر کا فروغ صوبوں کی ذمہ داری ہے اور تمام صوبائی حکومتوں کو اس عمل میں بڑھ چڑھ کر حصہ لینا چاہیے – ایک سوال کے جواب میں وزیر اعلی نے کہا کہ بلوچستان کے وسائل میں پنجاب کا کوئی عمل دخل نہیں ، یہ بلوچستان کا حق ہے اور انہیں مبارک ہو- ریکوڈیک قدرتی وسائل کا بڑا منصوبہ ہے لیکن بدقسمتی سے یہ قانونی تنازعات کی نذر ہو گیا ہے – شفاف منصوبے کبھی تاخیر کا شکار نہیں ہو تے اگر منصوبوں کو شفاف انداز سے آگے بڑھایا جائے تو وہ قانونی تنازعات کا شکار نہیں ہو تے اور اگر کبھی ایسی صورتحال پیدا ہو تو بھی عدالتوں میں نہیں ٹھہر سکتے- ریکوڈیک منصوبے پر کروڑوں روپے خرچ ہو چکے ہیں لیکن اس کا فائدہ ابھی تک پاکستان یا بلوچستان کے عوام کو نہیں پہنچا- اللہ تعالی ترقیاتی منصوبوں پر عملدرآمد کرنے والوں کو ہدایت دے کہ وہ امانت ، دیانت اور شفافیت کے اصولوں کو اپنا کر آگے بڑھیں – اسی صورت ہی ریکوڈیک کامنصوبہ بھی آگے بڑھ سکتا ہے۔وزیر اعلیٰ پنجاب محمد شہباز شریف نے محی الدین اسلامک یونیورسٹی کے بانی اور عالمی مبلغ پیر علاﺅ الدین صدیقی کے انتقال پر گہرے دکھ اور افسوس کا اظہار کیا ہے۔
شہبازشریف