کراچی(ویب ڈیسک)وزیر اعلیٰ سندھ مراد علی شاہ کی سربراہی میں صوبائی ایپکس کمیٹی کا اجلاس ہوا جس میں کور کمانڈر کراچی لیفٹیننٹ جنرل شاہد بیگ مرزا، ڈی جی رینجرز سندھ میجر جنرل محمد سعید ، صوبائی چیف سیکریٹری، سینیئر وزیر نثار کھوڑو اور مشیر اطلاعات مولا بخش چانڈیو کے علاوہ آئی جی سندھ اللہ ڈنو خواجہ نے بھی شرکت کی، کور کمانڈر کراچی لیفٹیننٹ جنرل شاہد بیگ مرزا اور ڈی جی رینجرز سندھ میجر جنرل محمد سعید نے اپنا چارج سنبھالنے کے بعد پہلی مرتبہ ایپکس کمیٹی کے اجلاس میں شرکت کی جب کہ آئی جی سندھ اے ڈی خواجہ نے بھی 12 روز کی جبری رخصت کے بعد دوبارہ چارج سنبھالا ہے۔وزیر اعلیٰ سندھ مراد علی شاہ نے صوبائی اپیکس کمیٹی کے اجلاس کے دوران وفاق کی جانب سے نیشنل ایکشن پلان پر عملدرآمد سے متعلق اپنی ذمہ داریاں پوری نہ کرنے پر تحفظات کا اظہار کیا ہے۔اجلاس میں سیکرٹری داخلہ نے شرکا کو بتایا کہ 16 دہشت گردوں کو ملٹری کورٹ سزائے موت کی سزا دے چکی ہے جب کہ 19 مقدمات اب بھی زیر سماعت ہیں۔ سندھ کی لیگل کمیٹی نے مزید 9 کیسز ملٹری کورٹس کے لئے کلئیر کئے ہیں۔اجلاس کے بعد مولا بخش چانڈیو نے میڈیا بریفنگ میں کہا کہ اجلاس کے دوران کراچی میں امن کی صورتحال پر اطمینان کا اظہار کیا گیا ہے، سندھ میں اداروں کو لڑانے کی کوشش کی گئی لیکن ایپکس کمیٹی کے اجلاس سے یہ تاثر ختم ہوگیا ہے۔ انہوں نے کہا کہ اجلاس میں وزیراعلیٰ نے تحفظات کا اظہار کیا ہے کہ وفاق نیشنل ایکشن پلان پر عمل درآمد سے متعلق اپنی ذمہ داری پوری نہیں کررہا، کالعدم تنظیموں سے متعلق وفاق کی کوئی واضح پالیسی نہیں۔

لندن (وجاہت علی خان سے) ”متحدہ“ میں مجموعی طور پر گروہ بندی کے بعد ”ایم کیو ایم“ لندن میں بھی اندرونی اختلافات عروج پر ہیں، ذرائع کے مطابق مصطفی کمال، انیس قائم خانی، رضا ہارون کے پارٹی چھوڑنے اور الطاف حسین کی 22 اگست کی تقریر کے بعد فاروق ستار کی طرف سے بھی بانی ”ایم کیو ایم“ سے ناطہ توڑنے کی وجہ سے بانی جماعت نے خود کو تمام قسم کے پارٹی معاملات سے الگ کر لیا ہے اور سوشل میڈیا پر آنے سے بھی گریزاں ہیں، ذرائع کا کہنا ہے گو کہ الطاف حسین نے اپنے تمام اختیارات پارٹی کنوینر ندیم نصرت کو سونپ رکھے ہیں اور محمد انور، مصطفی عزیز آبادی ان کی معاونت کرتے ہیں لیکن اندرونی صورتحال یہ ہے کہ الطاف حسین ندیم نصرت سے مطمئن نہیں ہیں اور انہیں پارٹی میں ہونے والی ٹوٹ پھوٹ کا ذمہ دار سمجھتے ہیں ندیم نصرت جو کبھی الطاف حسین کے سیکرٹری کا کردار ادا کرتے تھے ان دنوں نئی پارٹی کے انفراسٹرکچر کے لئے کوشاں ہیں لیکن اس کے باوجود الطاف حسین الگ تھلگ گوشہ نشین ہو چکے ہیں، افدھر ”ایم کیو ایم“ انٹرنیشنل سیکرٹریٹ کی حالت بھی یوں ہے کہ بارہا فون پر رابطہ کرنے کے باوجود کوئی کلیدی رہنما میڈیا کے نمائندوں سے بات نہیں کرتا لیکن ذرائع کے مطابق بانی ”ایم کیو ایم“ ایک عرصہ سے دفتر نہیں آئے اُن کا زیادہ وقت اپنے گھر یا مختلف کلینکس میں گزرتا ہے۔ ذرائع کا کہنا ہے کہ بانی پارٹی پاکستان اور فوج مخالف اپنی تقاریر پر نہیں بلکہ اپنے ساتھیوں کی دھوکہ دہی پر زیادہ افسردہ اور مایوس ہیں۔ ذرائع کے مطابق ایم کیو ایم لندن کے چند دیگر سینئر رہنما بھی ندیم نصرت کو دیئے گئے اختیارات سے متفق نہیں ہیں ان رہنماﺅں میں محمد انور سرفہرست ہیں جو سمجھتے ہیں کہ الطاف حسین کے بعد پارٹی کی قیادت اُن کا حق ہے لیکن دوسری طرف یہ خبر بھی گزشتہ سال سے گردش میں ہے کہ الطاف حسین کی سابق اہلیہ کی خواہش ہے کہ الطاف حسین اپنی بیٹی افضا کو اپنا جانشین اور اپنے بعد پارٹی کی سربراہ مقرر کریں پارٹی کے اندر بھی بعض رہنماﺅں کا یہی خیال ہے لیکن الطاف حسین اس سوچ کے حق میں نہیں اُن کا کہنا ہے کہ وہ اپنی بیٹی کو پاکستان کی سیاست میں نہیں دھکیل سکتے یوں بھی افضا الطاف کی عمر ابھی تقریباً پندرہ سال ہے اور وہ ہائی سکول میں ہے۔

نواب شاہ (خصوصی رپورٹ) چیئرمین پیپلزپارٹی آصف زرداری اتوار کو اچانک ملک سے باہر چلے گئے۔ انگریزی اخبار بزنس ریکارڈر کے مطابق پارٹی ذرائع کا کہنا ہے کہ وہ میڈیکل چیک اپ کیلئے باہر گئے ہیں۔ رپورٹ کے مطابق اتوار کو وہ لعل شہباز قلندر کے مزار پر گئے‘ حاضری دی‘ پھول چڑھائے اور فاتحہ پڑھی۔ انہوں نے پاکستان خصوصاً سندھ کی ترقی و خوشحالی کیلئے دعا کی۔ انہوں نے مزار پر تعمیراتی کام کا بھی جائزہ لیا اور متعلقہ حکام کو ہدایت کی کہ کام جلد از جلد مکمل کیا جائے پھر اچانک غائب ہوگئے۔ پتہ چلا کہ وہ بیرون ملک چلے گئے ہیں۔ اس ضمن میں جب پارٹی سے رابطہ کیا گیا تو ذرائع نے بتایا کہ زرداری میڈیکل چیک اپ کیلئے گئے ہیں اور ان کی منزل کے بارے میں فی الحال کچھ نہیں بتایا گیا۔