اسلام آباد (سیاسی رپورٹر) سابق کور کمانڈر منگلا لیفٹیننٹ جنرل (ر) طارق خان کے حوالے سے سماجی رابطے کے ذرائع پر ایک بیان گردش کر رہا ہے جس میں انہوں نے کہا ہے کہ حال ہی میں جاوید ہاشمی نام کے ایک سیاستدان نے انہیں ان کے دوران سروس کسی قسم کی بغاوت کی منصوبہ بندی میں ملوث ہونے کا مورد الزام ٹھہرایا ہے۔ جاوید ہاشمی ماضی میں ایسے غیر سنجیدہ بیانات دیتے رہے ہیں جو ان کے ناپختہ ذہن کی احتراع ہے۔ جنرل (ر) طارق خان کے مطابق جاوید ہاشمی کے سخت بیانات سے صرف نظر کرتے رہے ہیں چونکہ مفلوج جاوید ہاشمی ہیں یہی نہیں معلوم کہ وہ کیا کہہ رہے ہیں۔ ان کا بڑھاپا بھی ایک وجہ ہے کہ جس کے باعث ان کی تمام باتیں قابل غور نہیں لیکن ان کی موجودہ لغو اور تلخ تنقید ماضی کے بیانات کے مقابلہ زیادہ سخت اور بے بنیاد ہے۔ لیفٹیننٹ جنرل (ر) طارق خان نے کہا ہے کہ اگر الزامات ان کی ذات تک محدود ہوتے تو اس بیہودگی کو برداشت کر لیتے لیکن جاوید ہاشمی نے فوج کو بحیثیت ادارہ ملوث کرنے کی مذموم کوشش کی ہے جس سے ادارہ کی ساکھ کو نقصان پہنچا ہے اور قوم کی نظروں میں ملٹری قیادت بدنام ہوئی۔ مشکوک کردار کے حامل جاوید ہاشمی کو ان کے بے بنیاد بیانات کا جواب دینا ضروری سمجھتا ہوں۔ لیفٹیننٹ جنرل (ر) طارق خان نے متعلقہ حکام کو سرکاری طور پر اس صورت حال کا نوٹس لینے کے لئے کہا ہے جس کی تصدیق بھی ہو گئی کہ ان الزامات کا نوٹس لیا جائے گا۔ جاوید ہاشمی مہران بینک سکینڈل میں ملوث ہونے کے علاوہ سازش کے الزام میں جیل میں رہ چکے ہیں۔ یاد رہے کہ جاوید ہاشمی کے خط نے جنرل پرویز مشرف کے دور میں شہرت حاصل کی تھی جس میں انہوں نے فوج پر مختلف الزامات عائد کئے تھے۔ جنرل (ر) طارق خان کا کہنا ہے کہ اخلاقیات کی دھجیاں اڑاتے ہوئے جاوید ہاشمی من گھڑت اور بے بنیاد الزامات عائد کئے ہیں۔ لیفٹیننٹ جنرل (ر) طارق خان نے کہا ہے کہ وہ جاوید ہاشمی سے کبھی ملے ہی نہ ملنے کی آئندہ خواہش ہے بلکہ کسی بھی سیاستدان سے ذاتی تعلقات یا سیاسی امور پر گفتگو کی تردید کی ہے۔ لیفٹیننٹ جنرل (ر) طارق خان نے کہا ہے کہ انہوں نے آج تک کسی سیاستدان کے گھر گئے نہ اپنے گھر مدعو کیا۔ بلکہ سماجی تقریبات اور غمی خوشی کے موقع پر بھی سیاستدانوں سے میل جول نہیں رکھا جس کی وجہ سے بیانانات کرتے ہوئے انہوں نے لکھا ہے کہ پیشہ ور فوجی تھے اور فوجی سروس میں اس طرح کے میل جول کی گنجائش نہیں ہوتی۔ جاوید ہاشمی کا بیان ان کے اپنے ذہن کی احتراع ہے اور ان کے تخیل کی پیداوار ہے۔ ہو سکتا ہے ان کی ذہنی کیفیت کو ذرائع ابلاغ نے استعمال کرنے کی کوشش کی ہو کیونکہ ان کا یہ بیانسیدھا سادہ فوج کو بدنام کرنے کا منصوبہ ہے اور اگر جاوید ہاشمی کی ذہنی کیفیت ٹھیک ہے تو یہ سب کچھ پلندہ ہے۔ جاوید ہاشمی کو اپنی عزت نفس کا احساس نہیں۔ لیفٹیننٹ جنرل طارق خان نے کہا ہے کہ حکومت پاکستان سے حکومتی سطح پر اس کی تحقیقات کا مطالبہ کرتے ہیں تا کہ اس کوڑے کو ہمیشہ کے لئے دفن کیا جا سکے۔ یاد رہے کہ جاوید ہاشمی نے حال ہی میں اپنے ایک بیان پر لیفٹیننٹ جنرل طارق خان کو جنرل راحیل شریف کو عہدے سے ہٹانے کی سازش کا انکشاف کیا تھا جس کی صورت میں لیفٹیننٹ جنرل (ر) طارق خان کے آرمی چیف بننے کی خواہش تھی لیکن لیفٹیننٹ جنرل (ر) طارق نے ان الزامات کو جھوٹ کا پلندہ قرار دیا ہے۔

سیالکوٹ (بیورو رپورٹ) وفاقی وزیر پانی و بجلی خواجہ محمد آصف نے کہا ہے کہ سوشل میڈیا پر حالیہ مہم کا مقصد کچھ اداروں کی ساکھ کو نقصان پہنچانا ہے ‘ دوسروں کو بدنام کرنے والے اب ملک کی اعلیٰ عدلیہ کو بھی نشانہ بنا رہے ہیں ‘ جسٹس ثاقب نثار کی بطور سیکرٹری قانون تعیناتی تین وجوہات کی بنا پر کی گئی تھی۔ اتوار کو اپنے ایک بیان میں خواجہ آصف نے کہا کہ دوسروں کو بدنام کرنے والے اب ملک کی اعلیٰ عدلیہ کو نشانہ بنا رہے ہیں۔ یہ عناصر اپنی موجودگی کا احساس دلانے کیلئے ایسا کر رہے ہیں۔ سوشل میڈیا پر حالیہ مہم کا مقصد کچھ اداروں کی ساکھ کو نقصان پہنچانا ہے۔ انہوں نے کہا کہ اعلیٰ عدلیہ میں چیف جسٹس سینئر ترین جج تعینات ہوتا ہے۔ 18 ویں ترمیم ‘ الجہاد ٹرسٹ اور سجاد علی شاہ کیس میں یہ طے ہو چکا ہے ۔ وزیر پانی و بجلی نے کہا کہ سینئر ترین جج کا چیف جسٹس بننا آئین کے مطابق ہے۔ سینئر ترین جج کی جگہ کسی اور جج کا تقرر آئین کی خلاف ورزی ہوتا ہے۔ بلاشبہ جسٹس ثاقب نثار سیکرٹری قانون رہے ہیں۔ خواجہ آصف نے کہا کہ جسٹس ثاقب نثار کی بطور سیکرٹری قانون تعیناتی کی تین وجوہات پر کی گئی تھی ۔ الجہاد کیس میں کہا گیا تھا کہ ججز کو ایسے عہدوں پر تعینات نہ کیا جائے اور چیف جسٹس سجاد علی شاہ نے سیکرٹری قانون کی تعیناتی کیلئے جج کی فراہمی سے معذرت کی تھی۔ اس وقت کے وزیر قانون خالد انور نے ان کا سیکرٹری قانون کے طور پر انتخاب کیا۔ خواجہ اصف نے کہاکہ ثاقب نثار کی لاہور ہائی کورٹ میں بطور جج تعیناتی چیف جسٹس ہائیکورٹ کی سفارش پر ہوئی اور اس میں چیف جسٹس آف پاکستان کی مشاورت بھی شامل تھی کیونکہ الجہاد ٹرسٹ کیس کے فیصلے کے بعد ایگزیکٹو پر چیف جسٹس کی ایڈوائس لازمی تھی۔ انہوں نے کہا کہ جسٹس ثاقب نثار کی ہائی کورٹ میں مستقلی صدر مشرف نے چیف جسٹس کی مشاورت سے کی اور انہیں چیف جسٹس افتخار محمد چوہدری کی ایڈوائس پر سپریم کورٹ تعینات کیا گیا۔ یہ تعیناتی صدر آصف علی زرداری نے افتخار چوہدری کی سفارش پر کی تھی۔ خواجہ آصف نے کہا کہ اس حلف برداری پر چیف جسٹس افتخار محمد چوہدری نے آزاد عدلیہ کیلئے ان کی خدمات کو سراہا گیا کہ جسٹس ثاقب نثار کو میرٹ پر قانون کے مطابق چیف جسٹس تعینات کیا گیا ہے۔ خواجہ آصف نے کہاکہ آئین میں واضح ہے کہ سپریم کورٹ کا سینئر ترین جج چیف جسٹس ہو گا اس میں وزیر اعظم یا حکومت کا کوئی کردار نہیں ہے کسی اور شخص کی بطور چیف جسٹس تعیناتی غیر آئینی ہوتی ہے۔

اسلام آباد (مانیٹرنگ ڈیسک) پاکستان اور بھارت کے تعلقات پر پڑی برف پگھلنے لگی ہے اور اب دونوں ممالک کے درمیان جوہری تنصیبات کی فہرستوں کا تبادلہ ہوا ہے۔ نجی ٹی وی کے مطابق پاکستان اور بھارت کے درمیان باضابطہ طور پر سفارتی سطح پر رابطہ ہوا اور دونوں ممالک نے جوہری تنصیبات کی فہرست ایک دوسرے کو دی۔ ذرائع کے مطابق پاکستان میں بھارتی ہائی کمیشن کی جانب سے قونصلررام گہورام نے پاکستانی دفترخارجہ میں تفصیلات جمع کرائیں جبکہ بھارت میں پاکستانی ہائی کمیشن کی جانب سے قونصلر فوزیہ منصور نے بھارتی دفترخارجہ میں جوہری تنصیبات کی تفصیلات جمع کرائیں۔ پاکستان اور بھارت ہر سال یکم جنوری کو جوہری تنصیبات کی فہرست کا تبادلہ کرتے ہیں۔دونوں ممالک کی جانب سے ایک دوسرے کی جیلوں میں قید ماہی گیروں کی تفصیلات کا تبادلہ بھی کیا گیا۔پڑوسی ممالک بھارت اور پاکستان کے درمیان 1988 کے معاہدے کے تحت جوہری تنصیبات کی فہرستوں کا تبادلہ ہوا ہے ۔ اس معاہدے کی شرط کے مطابق دونوں ممالک ایک دوسرے کی ایٹمی تنصیبات پر حملہ نہ کرنے کے پابند ہیں۔بھارتی وزارت خارجہ کے بیان میں کہا گیا ہے کہ نئی دہلی اور اسلام آباد 1992 سے ہر نئے سال کے دن جوہری تنصیبات کی فہرستوں کا تبادلہ کرتے ہیں۔پاکستانی دفتر خارجہ نے اسلام آباد میں پاکستانی جوہری تنصیبات کی تفصیل بھارتی ہائی کمیشن کے ایک اہلکار کے حوالے کی جبکہ بھارت کے دارالحکومت نئی دلی میں یہ فہرست پاکستانی ہائی کمیشن کے حوالے کی گئی۔بھارتی وزارت کے مطابق دونوں ممالک کی جیلوں میں قید, قیدیوں کی فہرستوں کا بھی تبادلہ کیا گیا ہے۔دونوں ممالک کے درمیان ہرسال یکم جنوری اور یکم جولائی کو قیدیوں کی فہرستوں کا تبادلہ کیا جاتا ہے ۔