اسلام آباد (ویب ڈیسک) اسلام آباد ہائیکورٹ نے سابق وزیراعظم نواز شریف اور مریم نواز کے خلاف توہین عدالت کی درخواست سماعت کے لئے منظور کر لی۔ اسلام آباد ہائیکورٹ کے جسٹس عامر فاروق نے عدنان اقبال کی درخواست پر سماعت کی۔ درخواست میں نواز شریف، مریم نواز اور پیمرا سمیت دیگر کو فریق بنایا گیا۔ درخواستگزار نے موقف اختیار کیا کہ پاناما فیصلے کے بعد نواز شریف اور مریم نواز عدالتوں کے خلاف نفرت پھیلا رہے ہیں، دونوں نے کوٹ مومن جلسے میں اور پنجاب ہاؤس میں عدلیہ مخالف تقاریر کیں، نواز شریف اور مریم نواز کے خطابات اور بیانات توہین عدالت کے زمرے میں آتے ہیں۔ درخواستگزار نے عدالت سے استدعا کی کہ نواز شریف اور مریم نواز کے خلاف توہین عدالت کی کارروائی کی جائے۔
