جکارتہ ( نیو ز ا یجنسیا ں ) ایشین گیمز 2018 ءمیں پاکستانی ہاکی ٹیم نے عمدہ کارکردگی کا سلسلہ برقرار رکھتے ہوئے ملائیشیا کو 1-4 سے شکست دے کر پوائنٹس ٹیبل پر پہلی پوزیشن حاصل کرنے کے ساتھ ساتھ سیمی فائنل کے لیے بھی کوالیفائی کر لیا۔دیگرمیچزمیں سری لنکانے انڈونیشیاکو3-1،جاپان نے ہانگ کانگ کو13-0،اومان نے قازقستان کو4-0،بھارت نے جنوبی کوریاکو5-3اوربنگلہ دیش نے تھائی لینڈکو3-1سے زیرکیا۔ابتدائی تین میچوں میں تھائی لینڈ، اومان اور قازقستان کو زیر کر کے مجموعی طور پر ایونٹ میں 36 گول اسکور کرنے والی پاکستانی ٹیم نے اپنی عمدہ کارکردگی کا سلسلہ ملائیشیا کے خلاف بھی جاری رکھا۔گزشتہ تین میچوں کے مقابلے میں گزشتہ روزپاکستان کا مقابلہ گروپ کے سب سے مضبوط حریف ملائیشیا سے تھا تاہم اس میچ میں بھی پاکستان کو پہلے گول کے لیے زیادہ انتظار نہیں کرنا پڑا۔میچ کے چھٹے ہی منٹ میں محمد عرفان نے پینالٹی کارنر پر گول اسکور کر کے پاکستان کو برتری دلا دی لیکن 4منٹ بعد ہی پاکستان کے دفاع کی کمزوری کا فائدہ اٹھاتے ہوئے ملائیشیا نے فیض حلمی جلی کے گول کی بدولت مقابلہ برابر کردیا اور یہ پاکستان کے خلاف ایونٹ میں ہونے والا پہلا گول ثابت ہوا۔میچ کے ابتدائی 10منٹ میں ہی دو گو ل سکور ہونے کے بعد ایسا محسوس ہونے لگا کہ ایک مرتبہ ہائی اسکورنگ میچ دیکھنے کو ملے گا لیکن اس کے بعد 38ویں منٹ تک کوئی بھی ٹیم گول کرنے میں کامیاب نہیں ہو سکی۔تاہم پاکستان کے اعجاز احمد نے اس جمود کو توڑتے ہوئے پاکستان کے لیے گول اسکور کر کے قومی ٹیم کو ایک مرتبہ پھر برتری دلا دی۔ابھی ملائیشین ٹیم اس حملے سے سنبھلی بھی نہ تھی کہ مبشر علی نے گیند کو گول پوسٹ میں پہنچا کر پاکستان کی برتری کو دگنا کرتے ہوئے مضبوط پوزیشن میں لا کھڑا کیا۔چوتھے کوارٹرکے دوسرے منٹ میںاعجاز نے اپنا دوسرا گول اسکور کرتے ہوئے پاکستان کو میچ میں 1-4 کی برتری دلا دی اور یہ گول ملائیشیا کے تابوت میں آخری کیل ثابت ہوا۔لگاتار چوتھے میچ میں فتح کے ساتھ ہی پاکستان 12پوائنٹس کے ساتھ ٹیبل پر سرفہرست ہے جبکہ ملائیشیا کی ٹیم دوسرے نمبر پر موجود ہے۔ پاکستان ہاکی ٹیم اپنا آخری گروپ میچ منگل کو بنگلہ دیش کے خلاف کھیلے گی۔ایشین گیمز میں پاکستان نے اب تک صرف دو کانسی کے تمغے ہی جیتے ہیں اور گولڈ میڈل کے حصول کے لیے سب کی نظریں قومی ہاکی ٹیم پر مرکوز ہیں جس نے عمدہ کارکردگی سے خود کو سونے کے تمغے کے لیے فیورٹ ثابت کر دیا ہے۔
