لاہور (سپورٹس رپورٹر) پاکستانی کرکٹ ٹیم کے سابق کپتان مصباح الحق نے دبئی ٹیسٹ میں یاسر شاہ کو دونوں ٹیموں میں فرق قرار دے دیا۔لاہور میں تقریب کے دوران مصباح نے کہا کہ دبئی ٹیسٹ میں یاسر شاہ کی شاندار بولنگ نے ٹیم کے اعتماد میں اضافہ کردیا ہے۔ نیوزی لینڈ کے بلے بازوں کے اعصاب پر وہ سوار ہوچکے۔ اس نفسیاتی برتری کا فائدہ اگلے ٹیسٹ میں بھی ہوگا۔ بہت دیر بعد کسی لیگ اسپنر کی اتنی عمدہ بولنگ دیکھنے کا موقع ملا۔ خود یاسر شاہ کے لئے ایسی پرفارمنس بہت ضروری تھی۔مصباح الحق نے کہا کہ یاسر کے ساتھ بابر اعظم اور حارث سہیل نے بھی بہت زبردست کھیل پیش کیا۔ بابر اور حارث کی اچھی بات یہ لگی کہ وہ اپنی اننگز کو بڑھانے پر فوکس کرتے رہے۔ اس طرح کی اننگز کھیلی جائیں گی تب ہی ٹیسٹ میچز جیتیں گے۔ ان دونوں کے ساتھ ٹیم کے دوسرے بلے بازوں کو ففٹی کو سنچری میں بدلنے کی عادت ڈالنا ہوگی۔سابق کپتان کا کہنا تھا کہ ٹیسٹ کرکٹ میں کامیابی کے لیے ضروری ہے کہ وکٹ پر کھڑے رہنے کے ساتھ کوشش کی جائے کہ اگر کوئی بلے باز تیس چالیس رنز بناتا ہے تو پھر اس کو سنچری میں بدلے۔

بڑی شراکت نہ بنانے کی خامی دور کرنا ہوگی۔ اس شعبے میں بہتری سے نہ صرف حریف بولرز پر دباو پڑتا ہے بلکہ اپنی ٹیم کی پوزیشن بھی مستحکم ہوتی ہے۔ پاکستانی بیٹسمینوں کو اس میں بہتری لانے پر توجہ دینا ہوگی۔مصباح الحق نے کہا کہ قومی کھلاڑیوں کو ٹیسٹ میچز جیتنا ہیں تو وکٹ پر قیام اور لمبی اننگز کو عادت بنانا ہوگا۔ پاکستانی ٹیم کو پہلا ٹیسٹ بھی جیتنا چاہیے تھا۔ سیریز میں بھی قومی ٹیم کی کامیابی کے روشن امکانات ہیں۔

اسلام آباد (اے پی پی) سابق ٹیسٹ کرکٹرز ظہیرعباس ،جاوید میاندادنے نیوزی لینڈ کے خلاف دوسرے ٹیسٹ میں کامیابی پر قومی ٹیم کی کارکردگی کو سراہتے ہوئے کہا ہے کہ نیوزی لینڈ کےخلاف دوسرے ٹیسٹ میں قومی کھلاڑیوں کی کارکردگی شاندار رہی ہے،یاسرشاہ نے اپنی شاندارباﺅلنگ کی بدولت نیوزی لینڈکی بیٹنگ لائن کی کمرتوڑدی، توقع ہے کہ قومی کرکٹ ٹیم جیت کے اس تسلسل کو جاری رکھتے ہوئے تیسرے ٹیسٹ میچ میں بھی کامیابی حاصل کرکے سیریز اپنے نام کرے گی، ٹیسٹ میچ میں یاسر شاہ کی کارکردگی شاندار رہی جنہوں نے میچ میں 14 کھلاڑیوں کو پویلین کی راہ دکھائی۔ منگل کو سابق ٹیسٹ کرکٹر اور مایہ ناز بلے باز ظہیر عباس نے ”اے پی پی“ کو بتایا کہ پاکستان کو نیوزی لینڈ کے خلاف یہ ٹیسٹ میچ جیتنا بہت ضروری تھا کیونکہ پہلے میچ میں انہیں شکست کا سامنا کرنا پڑا تھا، اب سیریز 1-1 سے برابر ہو گئی ہے، قومی کرکٹ ٹیم نے دوسرے ٹیسٹ میچ میں جس کارکردگی کا مظاہرہ کیا ہے توقع ہے کہ وہ آئندہ میچ میں بھی کامیابی حاصل کرکے سیریز اپنے نام کرے گی۔

انہوں نے کہا کہ دوسرے ٹیسٹ میں یاسر شاہ نے تباہ کن باﺅلنگ کا مظاہرہ کرتے ہوئے نیوزی لینڈ کے بلے بازوں کو کھیلنے کا موقع نہیں دیا۔ ٹیسٹ کرکٹر اور سابق کپتان جاوید میانداد نے ”اے پی پی“ کو بتایا کہ پاکستان نے نیوزی لینڈ کے خلاف شاندار کارکردگی کا مظاہرہ کیا ہے، پہلی اننگز میں جب ٹیم زیادہ سکور کرنے میں کامیاب ہو جاتی ہے تو دوسری ٹیم پر پریشر بڑھ جاتا ہے، نیوزی لینڈ کی ٹیم اس کنڈیشن میں پاکستان سے زیادہ اچھا نہیں کھیل سکتی اور یہ کنڈیشن پاکستان کے سپنرز کیلئے سازگار ہے۔ انہوں نے کہا کہ میچ میں یاسر شاہ، بابر اعظم اور حارث سہیل کی کارکردگی قابل ستائش رہی۔ انہوں نے کہا کہ اس کنڈیشن میں یاسر شاہ کے خلاف کھیلنا بلے بازوں کیلئے مشکل ہوتا ہے۔ انہوں نے کہا کہ تیسرا اور آخری ٹیسٹ میچ میں دونوں ممالک کے مابین کانٹے دار مقابلہ کی توقع ہے کیونکہ دونوں نے سیریز میں 1-1 کامیابی حاصل کی ہے۔ آئندہ میچ میں پاکستان کو اسی ٹیم کو برقرار رکھنا چاہئے جس نے دوسرے ٹیسٹ میچ میں کامیابی حاصل کی ہے۔ ٹیسٹ کرکٹر سکندر بخت نے اپنے انٹرویو میں بتایا کہ دوسرے ٹیسٹ میچ میں پاکستان کی کارکردگی قابل ستائش رہی ہے۔ انہوں نے کہا کہ محمد حفیظ کو ٹیسٹ کرکٹ سے ریٹائر ہونا چاہئے اور وہ صرف ون ڈے اور ٹی 20 کھیلیں۔ سابق قومی کھلاڑی سعید اجمل اور سابق ٹیسٹ کرکٹر ندیم خان نے دوسرے کرکٹ ٹیسٹ میچ میں نیوزی لینڈ کے خلاف کامیابی پر پاکستانی ٹیم اور مینجمنٹ کو مبارکباد دی ہے۔ انہوں نے کہا کہ میچ میں یاسر شاہ نے تباہ کن باﺅلنگ کی ہے اور وہ نیوزی لینڈ کو کھیلنے نہیں دیا۔ توقع ہے کہ پاکستان آئندہ بھی جیت کے اس تسلسل کو جاری رکھے گا۔

دبئی (اے پی پی) یاسر شاہ کی تباہ کن باﺅلنگ کی بدولت پاکستان نے نیوزی لینڈ کو دوسرے کرکٹ ٹیسٹ میچ میں اننگز اور 16 رنز سے شکست دے کر تین میچوں کی سیریز 1-1 سے برابر کر دی، میچ کے چوتھے روز نیوزی لینڈ کی ٹیم اپنی دوسری اننگز میں 312 رنز بنا کر پویلین لوٹ گئی، کیوی ٹیم دونوں اننگز کھیل کر بھی پاکستان کی پہلی اننگز کا سکور برابر کرنے میں ناکام رہی، روز ٹیلر، ہنری نیکولز اور ٹام لیتھم کی مزاحمتی بیٹنگ بھی ٹیم کے کام نہ آئیں، ٹیلر 82، نیکولز 77 اور لیتھم 50 رنز بنا کر نمایاں رہے، یاسر شاہ نے ریکارڈ ساز باﺅلنگ کا مظاہرہ کرتے ہوئے 14 وکٹیں لیکر ٹیم کی جیت میں کلیدی کردار ادا کیا اور میچ کے بہترین کھلاڑی قرار پائے۔ منگل کو دبئی ٹیسٹ کے چوتھے روز نیوزی لینڈ نے 131 رنز 2 کھلاڑی آﺅٹ پر دوسری ادھوری اننگز دوبارہ شروع کی تو اسے اننگز کی شکست سے بچنے کیلئے مزید 197 رنز درکار تھے جبکہ روز ٹیلر 49 اور ٹام لیتھم 44 رنز پر بیٹنگ کر رہے تھے، دن کے ساتویں اوور میں حسن علی نے لیتھم کو آﺅٹ کر کے اہم پارٹنرشپ توڑ دی، انہوں نے 50 رنز بنائے، اس کے بعد ٹیلر نے ہنری نیکولز کے ساتھ مل کر ٹیم کو سہارا دینے کی کوشش کی تاہم 198 کے مجموعی سکور پر بلال آصف نے ٹیلر کو آﺅٹ کر کے ٹیم کو بڑی کامیابی دلائی، ٹیلر نے 82 رنز کی اننگز کھیلی، 255 کے سکور پر نیوزی لینڈ کی پانچویں وکٹ گری جب بی جے واٹلنگ 27 رنز بنانے کے بعد یاسرشاہ کی گیند پر ایل بی ڈبلیو ہوئے، کولن ڈی گرینڈہوم 14 رنز بنا کر حسن علی کی گیند کا نشانہ بنے، آئش سودھی 4 رنز بنا کر چلتے بنے، انہیں یاسرشاہ نے کلین بولڈ کیا،301 کے مجموعی سکور پر نیوزی لینڈ کی آخری امید بھی دم توڑ گئی جب نیکولز 77 رنز کی عمدہ اننگز کھیلنے کے بعد حسن علی کی گیند پر کلین بولڈ ہوئے، نیل واگنر 10 رنز بنا کر یاسر کی گیند پر کیچ آﺅٹ ہوئے، 312 کے سکور پر نیوزی لینڈ کی آخری وکٹ گری جب ٹرینٹ بولٹ بغیر کوئی رن بنائے یاسر شاہ کی گیند پر سرفراز کے ہاتھوں کیچ آﺅٹ ہوئے، یاسر شاہ نے 6، حسن علی نے 3 اور بلال آصف نے ایک وکٹ لی۔

دبئی (اے پی پی) پاکستانی ٹیم کے کپتان اور وکٹ کیپر بلے باز سرفراز احمد نے کہا ہے کہ نیوزی لینڈ کے خلاف دوسرے ٹیسٹ میچ میں کامیابی ٹیم کی اجتماعی کوششوں کا نتیجہ ہے، حارث، بابر اور اظہر علی نے شاندار بیٹنگ کر کے بہترین پلیٹ فارم دیا، یاسر شاہ کی باﺅلنگ میرے چار سالہ ٹیسٹ کیریئر کا بہترین سپل تھا، امید ہے کہ وہ آئندہ بھی عمدہ کارکردگی کے تسلسل کو برقرار رکھتے ہوئے ٹیم کو فتوحات دلانے میں کردار ادا کریں گے۔ نیوزی لینڈ ٹیم کے قائد کین ولیمسن نے کہا کہ ناقص بیٹنگ شکست کی وجہ بنی، دوسری اننگز میں بلے بازوں کی کارکردگی تسلی بخش رہی تاہم ابھی مزید بہتری کی ضرورت ہے، یاسر شاہ غیرمعمولی باﺅلر ہیں، ان کا سامنا کرنا چیلنجنگ ہوتا ہے۔ پاکستان نے نیوزی لینڈ کو دوسرے ٹیسٹ میں اننگز اور 16 رنز سے شکست دے کر تین میچوں کی سیریز 1-1 سے برابر کر دی ہے، یاسر نے 14 وکٹیں لیکر ٹیم کی جیت میں کلیدی کردار ادا کیا۔ منگل کو دوسرے ٹیسٹ میں فتح کے بعد پاکستانی قائد نے کہا کہ پہلے ٹیسٹ میں شکست کے بعد جس طرح سے ٹیم نے ٹیسٹ سیریز میں کم بیک کیا ہے وہ قابل ستائش ہے۔

، کامیابی میں ہر کھلاڑی نے کردار ادا کیا، بلے بازوں کی کارکردگی بھی حوصلہ افزا ہے، اب تمام تر توجہ اگلے میچ پر مرکوز ہے، کوشش ہو گی کہ میچ جیت کر سیریز اپنے نام کریں اور مقصد کے حصول کیلئے کھلاڑیوں کو سو فیصد کارکردگی دکھانا ہو گی۔ انہوں نے کہا کہ یاسر شاہ کی باﺅلنگ یادگار رہے گی، ان سے توقعات مزید بڑھ گئی ہیں، امید ہے کہ وہ آئندہ بھی عمدہ کارکردگی کے تسلسل کو برقرار رکھتے ہوئے ٹیم کو فتوحات دلانے میں کردار ادا کریں گے۔ دوسری جانب کیوی کپتان نے کہا کہ پہلی اننگز میں ناقص بیٹنگ شکست کی وجہ بنی، دوسری اننگز میں بلے بازوں نے کافی امپروو کیا لیکن ابھی مزید بہتری کی ضرورت ہے، اگلے ٹیسٹ میں پوری تیاری کے ساتھ میدان میں اتریں گے۔ انہوں نے کہا کہ یاسر شاہ نے غیرمعمولی باﺅلنگ کی، بلاشبہ ان کا باﺅلنگ سپل بہترین تھا اور بلے بازوں کیلئے ان کا سامنا کرنا چیلنجنگ ہوتا ہے۔ث