لاہور(مانیٹرنگ ڈیسک) سینئر صحافی امجد اقبال نے کہا ہے کہ وفاقی کابینہ کا کل بلایا جانے والا اجلاس شیڈولڈ نہیں تھا۔172لوگوں کا نام ای سی ایل میں ڈالنے پر چیف جسٹس نے بڑے سخت الفاظ استعمال کئے اور ناراضگی کا اظہار کیا۔چینل فائیو کے پروگرام کالم نگار میں گفتگوکرتے ہوئے انہوں نے کہا کہ سیاسی صورتحال دیکھی جائے تو اس وقت حکومت اور اپوزیشن کی لڑائی چل رہی ہے۔انہوں نے کہا کہ نان ایشوز کو ایشو بنایا جا رہا ہے تاکہ عوام کی توجہ ہٹے۔انہوں نے کہا کہ مہمند ڈیم پاکستان کے لئے بہت بڑی خوشخبری ہے۔ڈیم بننے سے پانی اور بجلی کی کمی کے مسائل حل ہوں گے۔بھارت دراندازی کے بجائے مسائل کے حل کی جانب آئے۔ کالم نگارمیاں افضل نے کہا کہ عدالتی حکم پر کمیٹی بنانے کا مطلب معاملے کو لٹکانا ہے۔شاید حکومت کچھ روز ایسے ہی گزارنا چاہتی ہے۔ حکومت کا مقصد ہے کہ نظرثانی کمیٹی بنانے سے وقت مل جائے گا تب تک جسٹس ثاقب نثار ریٹائر ہو جائیں گے۔سندھ میں دو فیصد بھی ترقیاتی کام نہیں ہوئے لوگوں کے پاس پینے کا صاف پانی تک نہیں۔مہمند ڈیم کا ٹھیکہ جس کو بھی ملے ڈیم بننا چاہئے ڈیموں کی کمی بڑا گھمبیر مسئلہ ہے۔انہوں نے کہا بھارت صرف بڑھکیں لگا رہا ہے لیکن اب بڑھکوں کا دور گزر چکا۔کالم نگارآغا باقر نے کہا کہ ہو سکتا ہے ای سی ایل کے معاملے پر کمیٹی بنانے کے حوالے سے حکومت کی نیت صاف ہو ۔ہماری تو خواہش ہے نظرثانی کمیٹی شہادتوں اور ثبوتوں کو دیکھے کہ نام ای سی ایل میں ڈالنا ٹھیک ہے کہ نہیں۔انہوں نے کہا مہمند ڈیم پر پیشرفت بڑی خوشخبری ہے چار پانچ دہائیوں سے ڈیمز پر کام رکا وہوا ہے۔ کالم نگارضمیر آفاقی نے کہا کہ 172افراد کا نام ای سی ایل میں ڈالنے کے معاملے پر کمیٹی بنانے کے بجائے کابینہ کو خود فیصلہ کرنا چاہئے تھا۔تبدیلی سرکار میں کوئی تبدیلی نظر نہیں آتی بغیر سوچے اتنے لوگوں کا نا م ای سی ایل میں ڈال دیا۔سپریم کورٹ نے کہا کہ ای سی ایل میں نام ڈالنا کسی کے ماتھے پر داغ لگانے کے مترادف ہے۔انہوں نے کہا کہ کمپنیوں کو زمینیں لیز پر دینے سے کاشتکاری متاثر ہوتی ہے۔ڈیم کا ٹھیکہ جس کو بھی دیا جائے اسے صرف اہل ہونا چاہئے۔
