فیصل آباد(سٹاف رپورٹر) کمسن بچیوں کو زیادتی کا نشانہ بنانے کا سلسلہ نہ رک سکا ہے۔ فیصل آباد کے نواحی تھانہ چک جھمرہ کے علاقہ میں درندہ صفت نوجوان نے 10سالہ بچی کو زیادتی کا نشانہ بنا ڈالا اور فرار ہو گیا جبکہ بچی کو تشویشناک حالت میں چک جھمرہ کے ہسپتال میں منتقل کر دیا گیا۔”آسمان گرا نہ زمین پھٹی“ بچی کی نشاندہی پر اوباش گرفتار، بتایا گیا ہے کہ چک جھمرہ کے علاقہ قائدآباد کی رہائشی دس سالہ (ص ر) کو اس کا محلہ دار علی حسنین ورغلا پھسلا کر اپنے ساتھ کھیتوں میں لے گیا۔ جہاں اس نے ڈرا دھمکا کر بچی کو اپنی ہوس کا نشانہ بنا ڈالا اور اسے حالت غیر میں چھوڑ کر فرار ہو گیا۔ واقعہ کا علم ہونے پر بچی کے والدین اور اہل علاقہ نے متاثرہ بچی کو ہسپتال پہنچایا۔ حالت سنبھل جانے پر بیٹی نے اپنے والدین کو تمام صورتحال سے آگاہ کیا۔ جس پر ورثاءاور اہل دیہہ تھانہ چک جھمرہ پہنچ گئے۔ پولیس نے متاثرہ بچی اور اس کے والدین کی نشاندہی پر ملزم کو گرفتار کر کے حوالات میں بند کر دیااور پولیس نے متاثرہ بچی کی والدہ حلیمہ سعدیہ کی مدعیت میں مقدمہ درج کر لیا۔ اس امر پر ظلم و زیادتی کا شکار ہونےوالی بچی کے والدین اور اہل علاقہ نے وزیراعلیٰ، آئی جی پنجاب، آر پی او اور سی پی او فیصل آباد سے مطالبہ کیا ہے کہ نوٹس لےکر ملزم کو کیفر کردار تک پہنچا کر انصاف فراہم کیا جائے جبکہ اس حوالہ سے تھانہ چک جھمرہ میں مقدمہ کے تفتیشی افسر سے رابطہ کیا گیا تو اس نے بتایا کہ ملزم علی حسنین چار روزہ ریمانڈ پر ہے۔ اس سے تفتیش کی جا رہی ہے۔
