لاہور(ویب ڈیسک) وزیراعظم عمران خان سے وزیر اعلیٰ پنجاب نے ملاقات کی اور سانحہ ساہیوال پر پیش رفت سے آگاہ کیا۔ وزیراعظم عمران خان ایک روزہ دورے پر لاہور پہنچے جہاں انہوں نے وزیر اعلیٰ پنجاب عثمان بزدار سے ملاقات کی جس کے دوران صوبے میں امن و امان کی صورتحال پر تفصیلی بات چیت کی گئی، اس موقع پر وزیراعلیٰ پنجاب عثمان بزدار نے وزیراعظم عمران خان کو سانحہ ساہیوال پر پیش رفت سے آگاہ کیا اور پولیس اصلاحات کے بارے میں بریفنگ دی۔وزیر اعظم عمران خان سے گورنر پنجاب چوہدری محمد سرور نے بھی ملاقات کی جس میں پنجاب کی صورتحال پر تبادلہ خیال کیا گیا، ایوان وزیراعلیٰ میں وزیراعظم عمران خان کی زیر صدارت اعلیٰ سطح کا اجلاس بھی ہوا جس میں وزیراعظم نے پنجاب میں صاف پانی کی فراہمی کے لیے واٹر اتھارٹی کے قیام کی اصولی منظوری دیتے ہوئے جلد قانون سازی کرنے کی ہدایت کی۔وزیر اعظم عمران خان کی زیر صدارت میڈیا اسٹریجک کمیٹی کا اجلاس بھی ہوا جس میں وزیر اعظم نے میڈیا کے ساتھ روابط کو مضبوط بنانے کی ہدایت کرتے ہوئے کہا کہ میڈیا کو عوام کی فلاح و بہبود کے حوالے سے جاری منصوبوں سے آگاہ کیا جائے اور میڈیا میں موثر انداز میں حکومت کا دفاع کیا جائے۔
