لاہور(مانیٹرنگ ڈیسک) وفاقی وزیر ریلوے شیخ رشید نے کہا ہے کہ نوازشریف کی صحت کا مسئلہ ہے تو وہ حل ہو گیا ہے اگر میڈیا میڈیا کھیلنا ہے تو اور بات ہے شریف خاندان پہلے بھی سعودی عرب گیا تو ساری جائیداد حکومت کے نام اور پیسے دینے کے لئے حمزہ شہباز کو چھوڑ گیا تھا۔ اب تو ایسا کوئی مسئلہ نہیں ہے اگر ہے تو عدالت سے رجوع کر سکتے ہیں۔ تحریک انصاف کے اندر بڑا ردعمل سوشل میڈیا کے ذریعے سامنے آیا ہےکیونکہ ان کا نعرہ تو احتساب تھا۔ عمران خان اور کابینہ نے فیصلہ دے دیا ہے اگر انہیں اعتراض ہے تو عدالت جائیں اور اسے ختم کرا دیں، نوازشریف کی صحت کو کچھ ہونا ہے تو یہاں بھی ہو سکتا ہے اور لندن میں بھی ہو سکتا ہے اگر ان کا مقصد صرف سیاست کرنا ہے تو کون انہیں روک سکتا ہے تاہم اگر جان بچانی ہے تو آج ہی علاج کے لئے باہر جا سکتے ہیں، دونوں صورتیں ان کے سامنے ہیں ایک یہ کہ بانڈ بھر دیں یا پھر عدالت سے رجوع کر لیں نوازشریف کو جتنی چھوٹ دی جا سکتی تھی دیدی گئی ہے۔
