ہاکی ٹیم کے ساتھ حالیہ ناروا سلوک سے متعلق قرارداد پنجاب اسمبلی میں جمع

قراداد حکومتی رکن عظمیٰ کاردار نے جمع کروائی جس میں کہا گیا آسٹریلیا میں ایف آئی ایچ پرو لیگ ٹور میں قومی ہاکی ٹیم کو بدانتظامی کا سامنا رہا، کھلاڑی مناسب رہائش، خوراک اور لاجسٹک سہولیات سے محروم رہے۔

متن میں یہ بھی لکھا گیا کہ قومی کھیل ہاکی دہائیوں کی غفلت اور ناقص گورننس کا شکار ہے، اولمپک تمغے جیتنے والی ٹیم بقا کی جدوجہد تک محدود ہے، بین الاقوامی سطح پر پاکستان کو شرمندگی کا سامنا ہوا۔

قرارد اد میں کہا گیا کہ یہ ایوان وزیر اعظم پاکستان سے فوری ایکشن اور پی ایچ ایف کی تنظیم نو اور سخت احتساب کا مطالبہ کرتا ہے جب کہ فیڈریشن میں ڈھانچہ جاتی اصلاحات اور مالی شفافیت ناگزیر ہے۔

متن میں نچلی سطح پر ہاکی کی بحالی کو ترجیح دینے کی تجویز بھی دی گئی، کاسمیٹک نہیں، انقلابی اور شفاف اصلاحات کی ضرورت پر زور دیا گیا، بصورت دیگر قومی ہاکی مستقل زوال کے خطرے سے دوچار رہے گی۔