اسلام آباد ( ویب ڈیسک ) وفاقی حکومت نے پٹرولیم مصنوعات پرعائدجنرل سیلز ٹیکس کی شرح میں 4فیصدسے 16.5فیصدتک اضافہ کردیا۔گزشتہ روزایف بی آرکی طرف سے جاری باضابطہ نوٹیفیکیشن کے مطابق پٹرول پرعائدجی ایس ٹی کی شرح میں9فیصد ،ہائی اسپیڈڈیزل پر4 فیصد،مٹی کے تیل پرجی ایس ٹی کی شرح میں15فیصداورلائٹ ڈیزل آئل پرجی ایس ٹی کی شرح میں 16.5فیصد اضافہ کردیا گیا۔ ذرائع کاکہناہے کہ پٹرول پر عائد جی ایس ٹی کی شرح 8 فیصدسے بڑھا کر17فیصد،ہائی اسپیڈ ڈیزل پر 13 فیصد سے بڑھا کر 17 فیصد،مٹی کے تیل پر جی ایس ٹی کی شرح 2 فیصد سے بڑھا کر17 فیصد اورلائٹ ڈیزل آئل پر جی ایس ٹی کی شرح میں 0.5 فیصد سے بڑھا کر17 فیصد اضافہ کردیا گیا۔ذرائع کاکہناہے کہ عالمی منڈی میں تیل قیمتوں میں کمی کے باعث ملک میں پٹرولیم مصنوعات کی قیمتوں میں کمی کی گئی ہے جی ایس ٹی کی شرح بڑھانے کی وجہ سے عوام کوپٹرولیم مصنوعات کی قیمتوں میں کمی کاپورا فائدہ منتقل نہیں کیاگیا اگر پٹرولیم مصنوعات پرجی ایس ٹی کی سابقہ شرح برقراررکھی جاتی تو مصنوعات کی قیمتوں میں زیادہ کمی عوام کومنتقل ہونا تھی۔ایف بی آرحکام کاکہناہے کہ ہرماہ پٹرولیم مصنوعات کی قیمتوں میں ردوبدل کے مطابق جی ایس ٹی کی شرح میں ردوبدل کی جاتی ہے۔

اسلام آباد(ویب ڈیسک ) ٹیکسٹائل سمیت 5 برآمدی صنعتوں کیلئے خوشخبری ملک بھر میں زیروریٹڈ صنعتوں کیلئے بجلی کے ٹیرف میں کمی کردی گئی۔برآمدی صنعتوں کیلئے بجلی کے نرخ 14 روپے سے کم کرکے ساڑھے 10 روپے فی یونٹ ہو گئے ہیں۔ آل پاکستان ٹیکسٹائل ملز ایسوسی ایشن (اپٹما)کی جانب سے یہ مطالبہ کہا گیا تھا کہ اس وقت خطے کے دیگر ممالک کی نسبت پاکستان کی ٹیکسٹائل انڈسٹری کو بجلی زیادہ نرخ پر مل رہی ہے جس سے ٹیکسٹائل سیکٹر خطے کے دیگر ممالک کا مقابلہ نہیں کر پا رہا۔اپٹما نے حکومت سے مطالبہ کیاکہ حکومت آئندہ 5 سال کیلئے برآمدات پر مبنی ٹیکسٹائل انڈسٹری کیلئے 7 روپے یونٹ کے کا نرخ مقرر کرے۔

کراچی (ویب ڈیسک ) محکمہ ایکسائزسندھ نے ٹیکس نادہندہ گاڑیوں کے خلاف مہم چلانے کافیصلہ کیا ہے۔یہ مہم ٹیکس نادہندہ گاڑیوں کے خلاف 9 جنوری سے 15جنوری تک جاری رہے گی اس بات کا فیصلہ صوبائی وزیر ایکسائز مکیش کمار چاو¿لہ کی زیر صدارت اجلاس میں کیا گیا ڈائریکٹر جنرل شبیراحمد شیخ نے اجلاس کو بریفنگ میں بتایا کہ روڈ چیکنگ مہم کے تمام انتظامات مکمل کرلیے گئے ہیں،مہم کے لیے ٹیمیں تشکیل دیدی گئی ہیں۔مکیش کمار چاو¿لہ نے افسران کو ہدایت دیتے ہوئے کہا کہ وہ اپنی صلاحیتوں کا بھرپور استعمال کرتے ہوئے روڈ چیکنگ مہم کو کامیاب بنائیں اور روڈ چیکنگ مہم شروع کرنے سے پہلے اس سلسلے میں ایک بھرپور آگاہی مہم بھی چلائی جائے تاکہ ٹیکس نادہندہ گاڑیوں کے مالکان اس مہم کے شروع سے قبل اپنے ٹیکس جمع کرواسکیں،وزیر ایکسائز نے ٹیکس نادہندہ گاڑیوں کے مالکان سے بھی درخواست کی ہے کہ وہ روڈ چیکنگ مہم شروع ہونے سے قبل اپنے ٹیکس جمع کرادیں۔

کراچی  (ویب ڈیسک ) پاکستان اسٹاک ایکس چینج میں سال2019 کے پہلے دن منگل کو تیزی کی بڑی لہر رونما ہوئی جس سے انڈیکس کی 100 پوائنٹس 9 حدیں بیک وقت بحال ہو گئیں۔تیزی کے سبب 69فیصد حصص کی قیمتیں بڑھ گئیں جبکہ حصص کی مالیت میں 1 کھرب 59 ارب54 کروڑ9 لاکھ 56 ہزار 495 روپے کا اضافہ ہو گیا۔ ماہرین اسٹاک کا کہنا تھا کہ خام تیل کی عالمی قیمت میں 2 فیصد اضافے سے مارکیٹ میں آئل اینڈ گیس ایکسپلوریشن سیکٹرمیں وسیع پیمانے پر سرمایہ کاری کی گئی اور انسٹیٹیوشنز سمیت سرمایہ کاری کے دیگر شعبوں نے نئے سال کیلئے متعین کردہ ترجیحات کے مطابق خریداری کی جس سے ایک موقع پر979پوائنٹس کی تیزی سے انڈیکس کی38000 پوائنٹس کی نفسیاتی حد بھی بحال ہوگئی تھی۔تاہم اختتامی لمحات میں پرافٹ ٹیکنگ کی وجہ سے تیزی کی مذکورہ شرح میں قدرے کمی واقع ہوئی جس کے نتیجے میں کاروبار کے اختتام پرکے ایس ای 100 انڈیکس 929.10 پوائنٹس کے اضافے سے37995.77ہوگیا جبکہ کے ایس ای 30 انڈیکس 579.33 پوائنٹس کے اضافے سے 17753.05، کے ایم ا?ئی30 انڈیکس 2194.60 پوائنٹس کے اضافے سے 63368.16 اور پی ایس ایکس کے ایم آئی انڈیکس 491.96 پوائنٹس کے اضافے سے 42 18587. ہوگیا۔ کاروباری حجم پیرکی نسبت 57.24 فیصدکم رہا۔ مجموعی طورپر 9کروڑ 66لاکھ62 ہزار 990 حصص کے سودے ہوئے۔ کاروباری سرگرمیوں کا دائرہ کار 339کمپنیوں کے حصص تک محدود رہا۔ جن کمپنیوں کے حصص کی قیمتوں میں نمایاں اضافہ ہوا ان میں نیسلے پاکستان کے بھاو¿ 400 روپے بڑھ کر 9400 روپے اور پاکستان ٹوبیکوکے بھاو?99روپے بڑھ کر روپے 2999 ہو گئے۔

اسلام آباد(ویب ڈیسک ) قومی بچت اسکیموں پر منافع کی شرح میں پونے 3 فیصد تک اضافہ کردیا گیا ہے۔سال ِ نو کے آغاز پر عوام کو بڑی خوشخبری مل گئی، محکمہ قومی بچت نے اسکیموں پر منافع کی شرح میں اضافہ کردیا ہے جس کا باضابطہ نوٹی فکیشن بھی جاری کردیا گیا ہے۔سیونگ اکاو¿نٹس پر منافع کی شرح میں 1.50 فیصد جب کہ ریگولر انکم سرٹیفکیٹس پر منافع کی شر ح میں 2.28 فیصد اضافہ کیا گیا ہے۔اسپیشل سیونگ سرٹیفکیٹس پر منافع کی شرح میں2.74 فیصد اضافہ کیا گیا ہے، ڈیفنس سیونگ سرٹیفکیٹس پر منافع کی شرح میں2.44 فصد اور پنشنر بینفٹس اکاونٹس پر منافع کی شرح میں2.40 فیصد اضافہ کیا گیا۔ اسی طرح بہبود سیونگ سرٹیفکیٹ پر منافع کی شرح 2.40 فیصد اضافہ ہوا ہے۔

کراچی (ویب ڈیسک ) اسٹیٹ بینک پاکستان نے مجاز ڈیلروں کو خام مال،معاونتی اشیا اور پرزے درآمد کرنے کی غرض سے درآمد و برآمد کنندگان کی طرف سے 10000 ڈالر تک کی پیشگی ادائیگی کے لین دین کی اجازت دے دی ہے۔یہ فیصلہ برآمدات کے فروغ اور ان صنعتی یونٹس کے ذریعے معاشی سرگرمیوں میں اضافے کی خاطر کیا گیا ہے جو تیار اشیا برآمد کرنے کے لیے پرزے اور خام مال درآمد کرنے کے خواہاں ہیں۔یہ بات قابل ذکر ہے کہ قبل ازیں جولائی میں اسٹیٹ بینک نے پیشگی ادائیگی کی سہولت پر پابندی عائد کردی تھی جو درآمد کنندگان کو پہلے مجاز ڈیلروں کے ذریعے دستیاب تھی۔