اداکارہ وینا ملک نےسابق شوہراسدخٹک کيخلاف خود کو بدنام کرنے کے الزام میں ایک ارب روپے کے ہتک عزت کا دعویٰ دائرکردیا۔
سیشن کورٹ میں دعویٰ دائرکرنے والی وینا ملک کا موقف ہے کہ سابق شوہر جھوٹے الزامات عائد کررہا ہے۔
ہرجانے کی درخواست کے متن کے مطابق وینا کا کہنا ہے کہ سابق شوہرسےخلع لے رکھی ہے اور عدالت نے بچوں کی حوالگی میرے سپردکی ہے۔ اسدخٹک جھوٹے الزامات عائد کرکے شہرت متاثرکررہا ہے۔
وینا نے استدعا کی کہ عدالت اسد خٹک کو 100 کروڑ روپے ہرجانہ ادا کرنے کا حکم دے۔
زاہدہ ملک المعروف کے مطابق اسد خٹک نے ٹوئٹر پر پاسپورٹ اور شناختی کارڈ سمیت گھر کا پتہ بھی شیئرکیا۔ لگائے جانے والے الزامات سے ساکھ متاثر ہوسکتی ہے۔
اسد خٹک نے حال ہی میں پاکستان پہنچ کر پریس کانفرنس بچوں کو دبئی سے اسمگل کرنے اور دیگرالزامات عائد کرتے ہوئے وزیر اعظم عمران خان اور آرمی چیف جنرل قمر جاوید باجوہ سے مدد کی اپیل بھی کی تھی۔
اس سے قبل اسد خٹک نے بچوں کے معاملے پر وینا کو50 کروڑ روپے پرجانے کا نوٹس بھجوایا تھا جس کے بعد وین نے ٹوئٹرپردعویٰ کیا تھا کہ 25 ستمبر2019 سے بچوں کی سرپرستی ان کے پاس ہے۔
جمعرات 12 نومبرکو ٹویٹس اور ویڈیوبیان میں اسد خٹک نے کہا کہ وینا ملک نے ڈیڑھ سال سے زائد عرصہ گزرنے کے باجود بچوں سے ملنے دیا نہ بات کرنے دے رہی ہے۔ تنگ آکر قانونی راستہ اپنانا پڑا اور دبئی کورٹ نے بھی میرے حق میں فیصلہ دیا، لیکن وینا فرار ہوئی اور بچے متحدہ عرب امارات سے پاکستان سمگل کر دیے گئے۔ دونوں بچے امریکن شہری ہیں۔
اسد نے وينا ملک کا ايک مبينہ آڈيو کلپ شيئر کرتے ہوئے ان پر دھمکياں دينے کا الزام بھی عائد کيا۔ آڈیو کلپ میں انتہائی نازیبا زبان کا استعمال سنا جاسکتا ہے۔
سنگین نوعیت کے الزامات کے بعد وینا نے 2017 میں اسد خٹک سے لی جانے والی طلاق کی دستاویز شیئرکرتے ہوئے بچوں کی سرپرستی کے حوالے سے عدالت کے فیصلے کی کاپی بھی شیئر کرتے ہوئے لکھا کہ قانون اور شریعت کی رو سے بچوں کی سرپرست وہی ہیں۔
اسد خٹک کے مطابق انہوں نے بچوں کی غيرقانونی منتقلی اور پاسپورٹ جاری کیے جانے کے خلاف ايف آئی اے، وزارت داخلہ، اماراتی اورامريکی سفارت خانے ميں درخواستيں جمع کرادی ہیں۔
ڈیڑھ سال کی خاموشی کی وجہ بتاتے ہوئے اسد خٹک نے لکھاتھا کہ نامور لوگوں اور علما کے کہنے پر زبان بند رکھی، بچوں کی خاطر ہر چیز برداشت کی، لیکن وقت آ گیا ہے کہ اصلیت سب کے سامنے رکھی جائے۔ ہراتھارٹی سے درخواست کرتا ہوں کہ مجھے انصاف دلوائیں۔
اسد خٹک نے ان نامور لوگوں اور علماء کے نام نہیں بتائے جن کے کہنے پر وہ خاموش تھے البتہ دونوں کا نکاح مولانا طارق جمیل نے پڑھایا تھا۔
بھارتی رئیلٹی شو ” بگ باس” اور متنازع فوٹو شوٹس سے شہرت حاصل کرنے والی وینا ملک نے اچانک شوبز سے کنارہ کشی اختیار کرنے کے بعد 25 دسمبر 2013 کو دبئی میں اسد خٹک سے شادی کی تھی۔
