ملالہ کی شادی پر کترینہ، پریانکا اور بختاور سمیت متعدد شخصیات کی مبارکباد

نوبیل انعام یافتہ ملالہ یوسف زئی کی شادی پر بالی ووڈ اور لالی ووڈ سمیت دنیا بھر سے متعدد مشہور شخصیات انہیں نئی زندگی کی مبارکباد دے رہی ہیں۔
ملالہ یوسف زئی گزشتہ روز پی سی بی کے جنرل مینجر عصر ملک کے ساتھ نکاح کے بندھن میں بندھیں۔ انہوں نے نکاح کی تصاویر سوشل میڈیا پر شیئر کرکے یہ خوشخبری پوری دنیا کوسنائی۔
ملالہ کی جانب سے ان کے نکاح کی خبر شیئر کرنے کے بعد پاکستان اور بھارت سمیت دنیا بھرسے لوگ انہیں مبارکباد دے رہے ہیں۔ ملالہ کو نکاح کی مبارکباد دینے والوں میں بالی ووڈ اداکارہ کترینہ کیف، پریانکا چوپڑا شامل ہیں۔ جب کہ بختاور اور آصفہ بھٹو زرداری سمیت پاکستان شوبز کی اداکارہ زارا نور عباس اور آئمہ بیگ نے بھی انہیں نئی زندگی کی مبارکباد دی۔
پریانکا چوپڑا نے نا صرف ملالہ کی پوسٹ پر انہیں مبارکباد دی بلکہ اپنی انسٹااسٹوری پر ملالہ کے نکاح کی تصویر شیئر کراکر ان کے لیے نیک تمناؤں کا اظہار کیا۔ بالی ووڈ اداکارہ کترینہ کیف سمیت دیگر افراد نے بھی انہیں مبارکباد دی اور ان کے لیے نیک تمناؤں کا اظہار کیا۔