اسلام آباد: (ویب ڈیسک) شیری رحمان نے کہا ہے کہ دہشتگردی کے بڑھتے ہوئے واقعات قابل تشویش ہیں، دہشت گردی میں اضافہ ایک واضح خطرے کی نشاندہی کرتا ہے، ایسا لگتا ہے جیسے ملک میں نیشنل ایکشن پلان اب موجود ہی نہیں۔
نائب صدر پیپلز پارٹی و سینیٹر شیری رحمان نے پنجگور اور نوشکی دہشت گرد حملوں میں شہید ہونے والے جوانوں کو خراج عقیدت پیش کرتے ہوئے کہا کہ پنجگور اور نوشکی میں ہونے والے دہشت گردی کے حملوں کی شدید مذمت کرتے ہیں، ان حملوں کو ناکام بنانے پر فورسز کو سلام پیش کرتے ہیں، بہادر سکیورٹی فورسز کا بروقت ردعمل قابل تعریف ہے۔
شیری رحمان نے کہا کہ ٹی ٹی پی کی جانب سے بڑھتے ہوئے حملوں کے واقعات اور اس پر طالبان حکومت کی جانب سے عدم کارروائی پریشان کن ہے، یہ خارجہ اور سیکیورٹی پالیسی کی ناکامی کی نشانی ہے، اپیزمنٹ کوئی منصوبہ نہیں ہے، دہشتگردی کے خلاف حکومت کا عارضی بنیادوں پر ردعمل ناکافی ہے۔
