راولپنڈی: (ویب ڈیسک) صوبہ خیبرپختونخوا کے ضلع جنوبی وزیرستان میں سکیورٹی فورسز نے دہشت گردوں کے ٹھکانے پر کارروائی کرکے کالعدم تحریک طالبان پاکستان (ٹی ٹی پی) کے دہشت گرد اللہ نور کو گرفتار کر لیا۔
پاک فوج کے شعبہ تعلقات عامہ (آئی ایس پی آر) کے مطابق جنوبی وزیرستان میں گاؤں سرواکئی میں خفیہ اطلاعات پر آپریشن کیا گیا جس میں کالعدم ٹی ٹی پی کا دہشت گرد اللہ نور پکڑا گیا۔
آئی ایس پی آر کا کہنا ہے کہ دہشت گرد اللہ نور برقع پہن کر فرار کی کوشش کر رہا تھا تاہم پکڑا گیا۔
آئی ایس پی آر نے بتایا کہ آپریشن میں بھاری مقدار میں اسلحہ، دھماکہ خیز مواد، مارٹرز اور مواصلاتی آلات قبضے میں لیے گئے۔
دوسری جانب قانون نافذ کرنے والے اداروں نے خفیہ اطلاعات پر جنوبی وزیرستان میں ایک اور آپریشن میں ایم 16 رائفلز و دیگر اسلحہ برآمد کر لیا اور درہ آدم خیل میں اسلحہ منتقل کرنے والے 4 افراد کو گرفتار کر لیا۔
