لاہور: (ویب ڈیسک) 24 سال بعد پاکستان کا دورہ کرنے والی آسٹریلوی ٹیم کے ٹیسٹ کپتان پیٹ کمنز نے دورہ کےلیے سکیورٹی کو تسلی بخش قرار دیتے ہوئے کہا ہے کہ ہمارے لیے ایک زبردست سیریز ہو گی۔
پیٹ کمنز نے کہا کہ ہم دورہ پاکستان کی سیکورٹی سے پوری طرح مطمئن ہیں اور سیریز کے لیے پُرجوش ہیں، سیکورٹی انتظامات بھرپور کیے گئے ہیں اور اب ہم ایسے مقام پر پہنچ گئے ہیں جہاں طیارے میں سوار ہونے والے سب پرُسکون ہوتے ہیں۔
انہوں نے کہا کہ آج کل کے حالات میں بائیوسیکور ببل کی اضافی لیئر بھی ہے اس لیے ہم اچھا محسوس کررہے ہیں اور جب ایک بار وہاں پہنچیں گے تو تمام تر توجہ کھیل پر ہی مرکوز رکھیں گے۔
کمنز نے کہا کہ ان سے بڑھ کر یہ سیریز ہمارے لیے بہت خاص ہے کیونکہ ہم وہاں جارہے ہیں جو کہ ہمارے لیے ایک نیا تجربہ ہے اس لیے ہم بہت پرُجوش ہیں اور ہر کوئی اس پر خوش ہے۔
یاد رہے کہ آسٹریلیا کے 24 سال بعد دورہ پاکستان میں شامل تین ٹیسٹ، تین ون ڈے انٹرنیشنل اور واحد ٹی ٹونٹی انٹرنیشنل میچز پر مشتمل سیریز کے لئے میچ آفیشلز کا تقرر کردیا گیا ہے۔
سیریز میں شامل تین ٹیسٹ میچز میں آئی سی سی کے ایلیٹ پینل میں شامل علیم ڈار اور پی سی بی کے انٹرنیشنل پینل میں شامل احسن رضا امپائرنگ کی ذمہ داریاں نبھائیں گے۔ آئی سی سی کے چیف میچ ریفری رنجن مدوگالے کو اس سیریز کے لئے پلیئنگ کنٹرول ٹیم کا سربراہ مقرر کیا گیا ہے۔
