سری لنکا میں جاری ٹی ٹوئنٹی ورلڈ کپ میں پاکستانی کپتان سلمان علی آغا اور بابر اعظم سمیت پاکستانی ٹاپ آرڈر بیٹنگ لائن اپ بری طرح ناکام رہی جس نے پاکستانی کشتی کو ایک بار پھر طوفان میں پھنسا دیا ہے۔
پاکستان کا سیمی فائنل میں پہنچنا مشکل ہوگیا ہے ، بظاہر ایسا لگ رہا ہے کہ کوئی بھی ایشیائی ٹیم ایشیا میں ہونے والے ورلڈ کپ کی فائنل فور میں شامل نہیں ہوگی۔
میزبان سری لنکا سیمی فائنل کی دوڑ سے با ہرہوچکی ہے، سلمان علی آغا اور مائیک ہیسن نے سلیکشن میں جو ہارڈ لائن اختیار کی اس کا خمیازہ پاکستان ٹیم کو بھگتنا پڑا ہے ۔
کپتان فرنٹ سے لیڈ نہ کرسکے اور اب پاکستان کو سیمی فائنل میں جگہ بنانے مشکل دکھائی دے رہا ہے۔
پیاسا کنویں کے پاس آتا ہے: وسیم اکرم کا شکوہ
ماضی کے عظیم کھلاڑی وسیم اکرم نے شکوہ کیا کہ پیاسا کنویں کے پاس آتا ہے ، مجھ سے پاکستانی کھلاڑی پوچھنے کی زحمت نہ کرتے اب کیا میں خود ڈریسنگ روم کے باہر جاکر کھڑا ہوجاؤں کہ مجھ سے مشورے لیے جائیں۔
فخر زمان جیسا بیٹر ٹی ٹوئنٹی فارمیٹ سے ٹیم سے ڈراپ نہیں ہوتا: ناصر حسین
انگلینڈ کے سابق کپتان ناصر حسین کا کہنا ہے کہ فخر زمان جیسا بیٹر ٹی ٹوئنٹی فارمیٹ سے ٹیم سے ڈراپ نہیں ہوتا، مسٹری اسپنر ابرارا حمد دنیا کے صف اول کے بولر ہیں لیکن ابتدائی تین میچوں کے بعد ٹورنامنٹ کےاگلے تین میچوں میں انہیں ٹیم سے باہر بٹھا دیا گیا ہے۔
آدھا تیتر آدھا بیٹر والی پالیسی کے تحت بہت سارے آل راؤنڈرز کھلا کر اسپیشلسٹ بیٹرز اور بولرز کو کھلانے سے گریز کیا جارہا ہے۔
تحقیق کے مطابق ناقص حکمت عملی کی وجہ سے پاکستانی ٹیم کو بڑی ٹیموں کے خلاف مشکلات کا سامنا ہے۔
اوپنر صاحبزادہ فرحان نے ورلڈ کپ کے چھ میچوں میں 70.75کی اوسط سے283رنز بنائے ہیں انہوں نے ایک سنچری دو نصف سنچریاں 28چوکوں اور13چھکوں کی مدد سے بنائے ہیں
۔وہ ابھی تک ٹورنامنٹ میں سب سے زیادہ رنز بنانے والے بیٹسمین ہیں۔
بابر اعظم کو ایشیا کپ کے بعد ٹی ٹوئنٹی ٹیم میں واپس لایا گیا، وہ چھ میچوں میں22کی اوسط سے صرف91رنز بناسکے ہیں اور ان کا سب سے زیادہ اسکور46رنز امریکا کے خلاف ہے۔
اوپنر صائم ایوب چھ میچوں میں14کی اوسط سے صرف70رنز بناسکے ہیں۔ کپتان سلمان علی آغا گراؤنڈ میں درست وقت پر غلط فیصلے کرتے دکھائی دیے، ان کا بیٹ بھی خاموش رہا، انہوں نے12کی بیٹنگ اوسط سے صرف60رنز بنائے ہیں۔
وکٹ کیپر عثمان خان 13کی اوسط سےصرف52رنز بناسکے، انہیں محمد رضوان اور محمد حارث پر ترجیح دے کر ٹیم میں شامل کیا گیا۔
فہیم اشرف بولنگ آل راؤنڈر ہیں انہوں نےپانچ میچوں میں40رنز بنائے ہیں تاہم نیدر لینڈز کے خلاف 29ناٹ آؤٹ بناکر فہیم اشرف نے پاکستان کو پہلی کامیابی دلوائی، بولنگ میں انہیں نمیبیا کے خلاف دو اوورز ملے ہیں بقیہ میچوں میں فہیم کو بولنگ نہیں دی گئی۔
فخر زمان نے ایک اننگز میں25رنز بنائے، آل راؤنڈر شاداب خان نے پانچ میچوں میں 103رنز بنائے ہیں اور پانچ وکٹیں لی ہیں جب کہ محمد نواز نے 9رنز بنانے کے علاوہ چار کھلاڑیوں کو آؤٹ کیا ہے۔
اسپنر عثمان طارق نے پانچ میچوں میں پاکستان کے لیے سب سے زیادہ دس وکٹیں حاصل کیں، شاہین آفریدی نے 7 کھلاڑیوں کو آؤٹ کیا۔
