یوم پاکستان ملی جوش جذبے سے منایا جا رہا ہے

لاہور: (ویب ڈیسک) شاد رہے پاکستان، آج پوری قوم یوم پاکستان ملی جوش جذبے سے منا رہی ہے۔
یوم پاکستان پر دن کا آغاز وفاقی دارالحکومت میں اکتیس جبکہ صوبائی دارالحکومتوں میں اکیس، اکیس توپوں کی سلامی سے ہوا ۔لاہور گیریزن کے ایوب اسٹیڈیم اور پشاور کے کرنل شیر خان اسٹیڈیم میں اکیس اکیس توپوں کی سلامی دی گئی ۔
یومِ پاکستان پر مرکزی تقریب اسلام آباد پریڈ گراونڈ میں جاری ہے۔ مسلح افواج اور قانون نافذ کرنے والے اداروں کے دستے پریڈ کا حصہ ہیں۔
یوم پاکستان پر مصور پاکستان ڈاکٹرعلامہ محمد اقبال کے مزار پر گارڈز کی تبدیلی کی پروقار تقریب ہوئی،،،پاک فضائیہ کے چاک و چوبند دستے نے پاکستان رینجرزکی جگہ اعزازی گارڈز کے فرائض سنبھال لئے۔
تقریب کے مہمان خصوصی ایئر وائس مارشل زبیر حسن خان نے مزار اقبال پر پھولوں کی چادر چڑھائی، فاتحہ خوانی کی اور پریڈ کا معائنہ کیا۔
گورنر سندھ عمران اسماعیل اور وزیراعلیٰ سندھ سید مراد علی شاہ نے یوم پاکستان کے موقع پر مزار قائد پر حاضری دی۔وزیراعلیٰ سندھ اور گورنر سندھ نے بانی پاکستان محمد علی جناح کی مزار پر پھولوں کی چادر چڑھائی اور فاتحہ خوانی کی
گورنر سندھ اور وزیر اعلی سندھ نے مزار قائد پر مہمانوں کی کتاب میں اپنے تاثرات درج کئے۔
کراچی میں یوم پاکستان کے موقع پر ویمنز پاور رن کے عنوان سے میراتھن کا انعقاد کیا گیا ، میراتھن کا آغاز شمشیر کراس سی وی یو روڈ سے کیا گیا ، میراتھن 5 کلو میڑ پر محیط تھی، جس میں خواتین کی بڑی تعداد نے حصہ لیا