پاکستان کرکٹ بورڈ (پی سی بی) نے انگلینڈ کے خلاف تیسرے ٹیسٹ سے قبل پاکستان ٹیسٹ اسکواڈ میں بڑی تبدیلیاں کرتے ہوئے 7 کھلاڑیوں اور 2 کوچز کو ریلیز کردیا۔
پی سی بی کے مطابق محمد رضوان، امام الحق، سلمان علی آغا، عامر جمال، علی عثمان، اویس ظفر اور خرم شہزاد کو ٹیسٹ اسکواڈ سے ریلیز کیا گیا ہے۔
ان کی جگہ 7 متبادل کھلاڑیوں کو اسکواڈ میں شامل کرلیا گیا ہے، جن میں صائم ایوب، عبداللہ فضل، عرفات منہاس، محمد عمران جونیئر، سعد بیگ، محمد عمران رندھاوا اور رضا اللہ شامل ہیں۔
پی سی بی کے مطابق متبادل کھلاڑی تیسرے ٹیسٹ سے قبل انگلینڈ میں قومی اسکواڈ کو جوائن کریں گے۔ ان 7 کھلاڑیوں میں 5 کو ابھی ٹیسٹ ڈیبیو کا موقع نہیں ملا، جبکہ 2 کھلاڑی پہلے ہی ٹیسٹ کرکٹ کھیل چکے ہیں۔
دوسری جانب پاکستان ٹیسٹ ٹیم کی کوچنگ میں بھی تبدیلی کردی گئی ہے۔ ہیڈ کوچ سرفراز احمد اور بولنگ کوچ عمر گل کو بھی ذمہ داریوں سے ریلیز کردیا گیا ہے۔
پاکستان اور انگلینڈ کے درمیان تین ٹیسٹ میچز کی سیریز کا تیسرا اور آخری میچ برمنگھم میں کھیلا جائے گا۔ پاکستان پہلے دونوں ٹیسٹ ہار کر سیریز 0-2 سے گنوا چکا ہے، جبکہ قومی ٹیم آخری ٹیسٹ میں کم بیک اور وائٹ واش سے بچنے کی کوشش کرے گی۔
ناقص کارکردگی، ہیڈ کوچ،بولنگ کوچ سمیت7 کھلاڑی ریلیز
