امریکی صدر ڈونلڈ ٹرمپ نے اقوام متحدہ کی جنرل اسمبلی کے 81ویں اجلاس سے خطاب کرتے ہوئے کہا ہے کہ انہیں توقع ہے کہ امریکا اور ایران کے درمیان وسط مدتی انتخابات کے فوراً بعد معاہدہ طے پا جائے گا۔ امریکی وسط مدتی انتخابات 3 نومبر 2026 کو ہونے ہیں۔
ٹرمپ نے کہا کہ ایران ممکنہ طور پر امریکی وسط مدتی انتخابات کے نتائج کا انتظار کر رہا ہے، تاہم ان کے بقول وہ خود انتخابات میں امیدوار نہیں ہیں اور انتخابات کے نتائج ایران کے حوالے سے ان کی پالیسی پر اثرانداز نہیں ہوں گے۔
امریکی صدر نے کہا کہ ان کے سامنے یہ فیصلہ ہے کہ ایران کے ساتھ ایسا معاہدہ کیا جائے جس کے ذریعے ایران دوبارہ تعمیر ہو اور ایک مضبوط ملک بن سکے، یا پھر ایران کے خلاف مزید سخت کارروائی کی جائے۔ انہوں نے ایران کو جوہری ہتھیار حاصل نہ کرنے دینے کے عزم کا بھی اظہار کیا۔
اس سے قبل 9 ستمبر کو ٹرمپ نے کہا تھا کہ ایران کے ساتھ جاری جنگ امریکی وسط مدتی انتخابات کے فوراً بعد ختم ہو سکتی ہے۔ تاہم اس وقت انہوں نے یہ بھی کہا تھا کہ مذاکرات دوبارہ شروع کرنا ان کی ترجیح نہیں ہے۔
دریں اثنا امریکی وزیر خارجہ مارکو روبیو نے کہا ہے کہ امریکا اقوام متحدہ جنرل اسمبلی کے موقع پر ایرانی نمائندوں سے ملاقات کے لیے تیار ہے، تاہم فی الحال کوئی ملاقات طے نہیں ہوئی۔
