لاہور: (ویب ڈیسک) قومی کرکٹ ٹیم کے نوجوان فاسٹ بالر محمد حسنین نے بالنگ ایکشن تبدیل کرلیا۔ نوجوان فاسٹ بالر نے بالنگ ایکشن میں خامی پر قابو پاتے ہوئے سخت محنت کی اور ایکشن کو درست بنایا ہے جس کے بعد اب پاکستان کرکٹ بورڈ (پی سی بی) ان کی واپسی کیلئے انٹرنیشنل کرکٹ کونسل (آئی سی سی) سے رابطہ کرے گا۔ میڈیا رپورٹس کے مطابق محمد حسنین نے بالنگ ایکشن کو درست بنانے کیلئے نیشنل پائی پرفارمنس سنٹر میں عمر رشید کی نگرانی میں مکمل کیا ہے ۔مقامی لیبارٹری میں کیے گئے ٹیسٹوں کے بعد اب حسنین کا بالنگ ایکشن 15 ڈگری کے اندر ہے ، پی سی بی اب باضابطہ طور پر آئی سی سی سے نظرثانی کی درخواست کرے گا۔ حسنین کا بالنگ ایکشن جنوری میں آسٹریلیا میں بگ بیش لیگ کے ایک میچ کے دوران مشکوک قرار دیدیا گیا تھا۔ 21 سالہ فاسٹ بالر اپنے کرکٹ کیریئر میں پہلی مرتبہ بگ بیش لیگ کھیل رہے تھے ۔محمد حسنین کا بالنگ ایکشن رپورٹ ہونے کے باعث انہیں پی ایس ایل کے بقیہ میچوں سے ہٹادیا گیا تھا۔
