اسلام آباد: (ویب ڈیسک) متحدہ عرب امارات نے پاکستان میں سرمایہ کاری کرنے میں دلچسپی ظاہر کر دی۔
وزیرخزانہ اسحاق ڈار سے گزشتہ روز اسلام آباد میں متحدہ عرب امارات کے سفیر حمد عبیدابراہیم سلیم الزعابی نے ملاقات کی اور انہیں وزارت خزانہ کا قلمدان سنبھالنے پر مبارکباد دی۔
دونوں رہنماﺅں کی اس ملاقات میں پاکستان اور متحدہ عرب امارات کے مابین دوطرفہ تعاون کو فروغ دینے کے حوالے سے تبادلہ خیال کیا گیا۔ اس موقع پر اماراتی سفیر نے کہا کہ ابوظہبی سرمایہ کاری اتھارٹی پاکستان میں سرمایہ کاری کرنے میں گہری دلچسپی رکھتی ہے۔ ملاقات میں وزیرخزانہ اسحاق ڈار نے کہا کہ ”پاکستان اور متحدہ عرب امارات کے مابین طویل مدتی دوطرفہ تعلقات ہیں اور ہم ان تعلقات میں مزید فروغ کے خواہاں ہیں۔“
